Пад Слуцкам ужо больш за месяц жывуць вандроўныя цыркачы са сланом, жывёл дапамагаюць карміць людзі з усёй краіны 2

Тут і далей фота Максіма Магера

У кастрычніку дрэсіроўшчыца Майлі Моні яшчэ гастралявала па краіне разам з цыркам «DZIVA». Артысты па праграме накіроўваліся ў Баку. Але італьянскае пасольства не рэкамендавала сваёй грамадзянцы ехаць у Азербайджан з-за канфлікту ў Нагорным Карабаху. Майлі рэкамендацыі паслухала і засталася ў Беларусі разам са сланом, коньмі, поні і гусямі. Уся гэтая гаспадарка ляжыць на плячах адной дрэсіроўшчыцы.

Уладкавацца дапамог мясцовы сябар. Руслан Марохаў калісьці сам трымаў вандроўны цырк, але падчас пандэміі збанкрутаваў. Ён і прытуліў качэўнікаў у вёсцы Навінкі Слуцкага раёна.

Гісторыю дрэсіроўшчыцы, якой няма чым карміць слана, распавялі мясцовыя журналісты. Самая магутная хваля ўвагі паднялася пасля роліка блогера MilTOP. І народ паехаў дапамагаць.

Заслужаная артыстка

У вёсцы назіраецца пастаянны рух. Двары застаўленыя аўто з нумарамі розных рэгіёнаў. Мясцовыя не супраць, ім гэта не перашкаджае. Людзі вязуць гародніну і садавіну, нават цэлымі прычэпамі.

Сланіха Мара есць па 100 кілаграмаў у дзень: сена, батоны, буракі, моркву, камбікорм. На дэсерт — цукар, сушкі або пячэнне.

Пакарміць і пагладзіць слана выстраіліся чэргі. За дзень паглядзець на Мару прыязджае некалькі соцень чалавек. Сланіха радая ўсім. А калі стоміцца — прыляжа. Значыць, час зрабіць перапынак.

«Мара сапраўдная артыстка — працуе на публіку», — хваліцца Майлі Моні.

Чарнагрывыя прыгажуны пароды фрыз нават зайздросцяць Мары. Яны — не галоўныя зоркі.

Ежы ўжо навезлі больш, чым трэба. Мара пераядае і нават крыху патаўсцела. Але тэлефон Руслана Марохава ўсё гэтак жа звоніць без перапынку. Салярка, сена або рубель — такая дапамога больш актуальная.

Каб жывёлы заставаліся ў форме, дрэсіроўшчыца рэгулярна рэпеціруе праграму. Паглядзець яе бясплатна можа любы ахвотны.

Дарога на ўсход

Майлі Моні працавала з мужам Крысціянам. У 2020 годзе ён загінуў у аўтакатастрофе. Майлі працягнула сямейную справу адна. Яна добра гаворыць па-руску, а яе дзеці — яшчэ і па-беларуску. Вучацца яны дыстанцыйна ў Кобрынскай школе.

Цівану сем гадоў, а Крыстэль — 12. Усё дзяцінства яны правялі ў пераездах паміж гарадамі і краінамі. Жывуць у аўтадамах або гасцініцах.

Праз месяц Майлі Моні рыхтуе свае грузавікі для гастроляў у Тулу. Кантракт — на год. А далей — хто ведае.

Nashaniva.com

Хочаш падзяліцца важнай інфармацыяй ананімна і канфідэнцыйна? Пішыце рэдактару «Нашай Нівы» ў ТГ