Пра гэта распавёў пасол Расіі ў Беларусі Дзмітрый Мезенцаў у інтэрв'ю «КП в Беларуси».
У Свята-Успенскім Жыровіцкім мужчынскім манастыры плануюць узвесці новую 57-метровую званіцу з 12 званамі. Гэты праект фінансуецца банкам ВТБ (Беларусь) пры ўдзеле губернатара Свярдлоўскай вобласці Куйвашава, кіраўнікоў Варонежскай і Наўгародскай абласцей Гусева і Нікіціна.
Ужо завершана будаўніцтва часовай званіцы, дзе да моманту ўзвядзення асноўнай будуць захоўвацца званы, якія былі адлітыя на Варонежскім званочным заводзе ў красавіку.
Пасол паведаміў, што ініцыятыву падтрымала кіраўніцтва Беларусі, упаўнаважаны па справах рэлігій Леанід Гуляка, Міністэрства культуры, спецыялісты ў галіне аховы помнікаў.
Мезенцаў адзначыў, што інфармаваў аб праекце кіраўніка Беларусі летась восенню. Пасол пацвердзіў, што на вялікім звоне ёсць імёны Лукашэнкі і Пуціна.
«У бронзе раўнапраўна адлітыя словы: «Апякунствам Прэзідэнта Рэспублікі Беларусь Аляксандра Рыгоравіча Лукашэнкі, Прэзідэнта Расійскай Федэрацыі Уладзіміра Уладзіміравіча Пуціна», — сказаў ён.
Асвячэнне званоў плануецца правесці 20 мая.
