Ігар Кізім, фота Надзеі Бужан
У Мінску прайшла нефармальная сустрэча прадстаўнікоў некантраляваных Кіевам раёнаў Данецкай і Луганскай абласцей (г.зв. ДНР і ЛНР) з нямецкім парламентарыем Ульрыхам Ёмэ.
Дэпутат Бундэстага Ёмэ сярод іншага заявіў пра міратворчы характар сваёй місіі і пра тое, што ён нібыта інфармаваў пра мінскую сустрэчу амбасаду Украіны.
Пры гэтым пасол Украіны ў Мінску Ігар Кізім заявіў Радыё Свабода, што яго і амбасаду ніхто не інфармаваў пра такую сустрэчу.
«Дэпутаты Бундэстага свабодныя ў сваіх паводзінах, не пракантралюеш кожнага дэпутата, магчыма, нямецкі дэпутат праінфармаваў пасольства Украіны ў Берліне, а не ў Мінску, перад ад’ездам», — дапусціў амбасадар Кізім.
«Але калі б нас праінфармавалі і я пагаварыў бы з гэтым дэпутатам, то я б пратэставаў: мы супраць такіх сустрэч, якія ў пэўнай ступені легітымізуюць незаконныя ўзброеныя фармаванні, якімі з'яўляюцца так званыя ЛНР і ДНР.
Усе перамовы павінны праходзіць у межах Трохбаковай кантактнай групы, наступнае пасяджэнне якой запланавана на 18 снежня. У цяперашні час мы вывучаем абставіны гэтай сустрэчы праз МЗС Беларусі і хацелі б пагаварыць таксама з паслом Нямеччыны ў Беларусі», — заявіў Ігар Кізім.
У Міністэрстве замежных спраў Беларусі пакуль няма інфармацыі пра гэтую сустрэчу, магчыма пазней будзе афіцыйны каментар, сказаў Радыё Свабода прэс-сакратар ведамства Анатоль Глаз.
