Па выніках мерапрыемства кіраўнік замежнапалітычнага ведамства краіны распавёў журналістам, пра што інфармаваў кіраўніка дзяржавы, піша БелТА.
Уладзімір Макей, у прыватнасці, праінфармаваў Лукашэнку аб сваім нядаўнім удзеле ў сустрэчы міністраў замежных спраў краін — удзельніц «Усходняга партнёрства» і краін — членаў ЕС 15 кастрычніка ў Люксембургу.
«Было паведамлена аб рабоце над тымі дакументамі, якія мы зараз адпрацоўваем разам з Еўрасаюзам, — гэта прыярытэты партнёрства, пагадненні аб палягчэнні візавага рэжыму і рэадмісіі. У цэлым ёсць істотныя зрухі па ўсіх дакументах, але, на жаль, не па нашай віне перыядычна з'яўляюцца нейкія новыя нюансы, якія патрабуюць дадатковага часу для аналізу, удакладнення або прыняцця рашэнняў», — адзначыў міністр.
Паводле яго слоў, беларускі бок мае намер спакойна працаваць над гэтымі дакументамі з улікам нацыянальных інтарэсаў. «Ёсць выразная ўстаноўка кіраўніка дзяржавы наконт працягу курсу на развіццё нармальных адносін з Еўрапейскім саюзам, у першую чаргу эканамічных, палітычных і гуманітарных», — падкрэсліў дыпламат
«Кіраўнік дзяржавы таксама быў праінфармаваны аб графіку знешнепалітычных сустрэч, візітаў замежных прадстаўнікоў да нас і візітаў кіраўніка дзяржавы за мяжу», — паведаміў міністр.
Ён адзначыў, што канец года абяцае быць багатым на мерапрыемствы на найвышэйшым і высокім узроўнях.
Сярод іх, напрыклад, запланаваны на 25—26 кастрычніка Форум рэгіёнаў Беларусі і Украіны.
У Гомелі бакі плануюць падпісаць вялікі пакет дакументаў — пагадненняў і кантрактаў — на некалькі дзясяткаў мільёнаў даляраў. «Ідзе актыўная праца, нейкіх нявырашаных пытанняў няма. Кіраўнік дзяржавы даручыў, каб гэтая падзея была арганізавана на найвышэйшым узроўні», — дадаў дыпламат.
Акрамя таго, Лукашэнка быў праінфармаваны аб падрыхтоўцы сустрэчы Асноўнай групы Мюнхенскай канферэнцыі па бяспецы. Міжнародны форум пройдзе ў Мінску 30 кастрычніка — 1 лістапада.
Удзел у мерапрыемстве ўжо пацвердзілі прэзідэнты і прэм'ер-міністры з іншых краін, кіраўнікі знешнепалітычных ведамстваў, кіраўнікі і прадстаўнікі спецслужбаў, аналітычных супольнасцяў.
«Парадак дня вельмі актуальны і заключаецца ў тым, як пазбегнуць далейшага нагнятання канфрантацыі, якая сёння існуе ў рэгіёне. Кіраўнік дзяржавы таксама даў адпаведныя даручэнні па падрыхтоўцы і правядзенні гэтага мерапрыемства», — рэзюмаваў Уладзімір Макей.
