Адзін з дамоў, які «трымае на сабе» грунт
Апоўзень сышоў вуліцы Струшня падчас залевы 22 ліпеня. Паколькі наступныя дні прагназуюцца дажджы, то людзі непакояцца, што абвал грунту можа паўтарыцца, піша Радыё Свабода.
Дамы на Струшні ўзьведзеныя ўздоўж аднайменнай невялікай рачулкі, якая вымыла глыбокую пойму. Яе высокія схілы навісаюць над хатамі.
Апоўзень сышоў на дамы №47А і 49. Амаль мэтровы ўзровень зямлі трымаюць сьцены хат і гаспадарчых будынкаў. Скалянелы за два дні грунт людзі не кранаюць, каб не справакаваць паўторнага абвалу.
Ганна Пятроўна ў сваім двары пасьля сыходу апоўзьню
Гаспадыня аднаго з дамоў Ганна Пятроўна лічыць 22 ліпеня другім днём народзінаў. Увечары яна выйшла ў двор пакарміць сабаку і ўбачыла, як на яе сунецца вал зямлі. Жанчына пасьпела ўскочыць у хату, якую, як яна кажа, ледзьве не абярнуў апоўзень. Зямлёй заваліла двор і агарод. Вадой заліло ў хаце склеп. Двор гаспадары расчысьцілі самі, каб было як прайсьці на вуліцу ды да хляўка.
«Куды толькі не тэлефанавала за гэтыя дні. Маліла, каб мне падказалі, да каго зьвярнуцца па дапамогу. З адной арганізацыі мяне скіроўвалі да другой. Ніхто, выходзіць, ні за што не адказвае. Падатак за зямлю я ж плачу ўсе трыццаць гадоў, што тут жыву. Куды гэта ўсё дзяваецца?» — плачучы, расказвае жанчына.
Як кажа Ганна Пятроўна, ратаваць яе пасьля шматлікіх званкоў прыехалі супрацоўнікі МНС, якія адпампавалі ваду ды сьпілавалі заваленыя апоўзьнем дрэвы. Прапанавалі перабыць небясьпеку ў гатэлі. Некаторыя ратавальнікі, адзначыла Ганна Пятроўна, прызналіся ёй, што пасьля апоўзьню тут не засталіся б жыць ні дня. Паводле жанчыны, камунальнікі ж пакуль толькі абяцаюць даць тэхніку і работнікаў для вывазу грунту.
Хату Ганны Пятроўны толькі пачалі рамантаваць. Апоўзень усю працу спляжыў
Людзі баяцца паўторнага апоўзьню
Дом па суседзтве таксама «трымае на сабе грунт». Яго гаспадар Уладзімер таксама бачыў на ўласныя вочы з акна, як сунуўся на ягоную хату апоўзень. Зямлі пад хатай — да аканіц. Уладзімер засьцерагае суседзяў брацца самім за расчыстку, бо лічыць, што яны могуць справакуюць паўторнае абрываньне грунту. На яго думку, такой справай маюць займацца адмыслоўцы.
Частка апоўзьню на Струшні
Пацярпела ад апоўзьню і яшчэ адна хата на Струшні. Грунтам завалены агарод і частка двара.
Месцамі размытыя і берагі рачулкі. Падчас залевы яна ператварылася ў паўнаводную рэчку. За апошнія тры дзясяткі гадоў такой залевы мясцовыя жыхары ня бачылі.
Ручай Дзебра, які размыў у залеву берагі
Гаспадары дамоў адзначылі, што іх ніколі не папярэджвалі пра небясьпеку сыходу апоўзьняў. Паводле суразмоўцаў, іхныя суседзі, што жывуць вышэй, на краі схілаў скідаюць сьмецьце, якое разам з грунтам звалілася ў двары.
