Дарожна-транспартнае здарэнне адбылося днём 19 жніўня на трасе Ракаў — Курдуны — Баравікоўшчына паблізу вёскі Юржышкі ў Валожынскім раёне.
Паводле папярэдняй версіі, кіроўца, мінчанін 1988 года нараджэння, рухаючыся на аўтамабілі «Фальксваген Кэдзі», няправільна выбраў бяспечную хуткасць руху, у выніку чаго машыну занесла і яна перакулілася на праезнай частцы.
Сын кіроўцы 2009 года нараджэння атрымаў цялесныя пашкоджанні, ад якіх памёр па дарозе ў бальніцу.
Як высветлілася, сам мужчына і яго жонка былі прышпіленыя рамянямі бяспекі, а дзіця знаходзілася на заднім сядзенні аўтамабіля ў дзіцячым бустэры, прычым той не быў замацаваны, а сам хлопчык не быў прышпілены рамянём бяспекі.
Акрамя таго, багажнік аўтамабіля быў нагружаны будаўнічымі матэрыяламі (драўлянымі брускамі, дошкамі, інструментамі), і пры перакульванні аўтамабіля малалетні пасажыр атрымаў цялесныя пашкоджанні гэтым грузам, а затым ужо выпаў з салона на праезную частку.
Па факце ДТЗ распачата крымінальная справа па ч.2 арт. 317 КК.
