Прадастаўленне права бясплатнага праезду па платных аўтамабільных дарогах Беларусі для аўтамабіляў з Данецкай і Луганскай абласцей тычыцца толькі тых грамадзян, якія выказалі жаданне пераехаць у Беларусь на перыяд гэтай цяжкай сітуацыі. Такую заяву зрабіў міністр замежных спраў Уладзімір Макей на брыфінгу ў Кіеве 12 жніўня.
«Гэта тычыцца толькі бежанцаў, якіх у нас налічваецца каля 100 тыс. чалавек, — сказаў Макей, словы якога прыводзіць прэс-служба знешнепалітычнага ведамства. — Але гэта ні ў якой меры не азначае нейкага асобнага прызнання Данецкай і Луганскай абласцей у якасці асобных нейкіх рэспублік. Прэзідэнт Беларусі наконт гэтага выказаўся адназначна: і Данецкая, і Луганская вобласці былі, ёсць і будуць у складзе Украіны. Гэтым усё сказана».
Як паведамлялася раней, 10 жніўня Аляксандр Лукашэнка ўнёс змяненні і дапаўненні ў некаторыя ўказы па пытаннях функцыянавання сістэмы збірання платы за праезд па платных аўтамабільных дарогах. У прыватнасці, ад платы за праезд вызваляюцца карыстальнікі, якія выкарыстоўваюць транспартныя сродкі, зарэгістраваныя на тэрыторыі Данецкай і Луганскай абласцей Украіны, з тэхнічна дапушчальнай агульнай масай не больш чым 3,5 тоны, і прычэпы, якія імі буксуюцца. Некаторыя ўкраінскія СМІ выказалі меркаванне, што размова ідзе аб транспартных сродках, якія маюць рэгістрацыю т.з. ДНР і ЛНР.
Пытанне Макею, зададзенае тэлеканалам «112 Украіна», гучала менавіта ў такім кантэксце: «Пытанне аб інфармацыі, якая з'явілася ўчора, што платныя дарогі ў Беларусі будуць адкрытыя і бясплатныя для праезду транспартных сродкаў т.з. ЛНР і ДНР. Што гэта азначае: прызнанне самаабвешчаных рэспублік або нейкія ўступкі Расіі? Як можна растлумачыць такое рашэнне?»
