Мы, выкладчыкі Еўрапейскага гуманітарнага ўніверсітэта і законна абраныя чальцы Сената ЕГУ, атрымалі з афіцыйнай электроннай адрэсы прарэктара па акадэмічных пытаннях Аляксандра Калбаскі запыт наступнага зместу (пераклад з ангельскай):
«Пасля вывучэння вашай заявы на замяшчэнне пасады ў Еўрапейскім гуманітарным універсітэце было б вельмі пажадана растлумачыць шэраг пытанняў, якія паўсталі, каб падаць нашыя рэкамендацыі рэктару з нагоды прызначэння. Вы неаднаразова дэманстравалі прынцыповую нязгоду з наяўным курсам і рашэннямі ўніверсітэта. Гэта рабілася як у пісьмовай форме, так і ў публічных заявах, для зацікаўленых асоб ва ўніверсітэце і за ягонымі межамі.
З улікам гэтых заяў, натуральна, узнікае пытанне: чаму вы жадаеце працаваць ва ўстанове, з якой у вас істотныя рознагалоссі і чый курс вы не падтрымліваеце? Калі ласка, апішыце больш дакладна для камісіі па найме вашае бачанне таго, як вы можаце і жадаеце працаваць на карысць і садзейнічаць рэалізацыі місіі і курсу універсітэта як цэласнай арганізацыі пад кіраўніцтвам органаў кіравання універсітэтам.
З падзякай за ваш адказ,
камісія па найманні прафесарска-выкладчыцкага складу».
У гэтай сувязі хочам заявіць наступнае:
1. Мы не падавалі ніякіх заяваў на замяшчэнне пасады. Цяпер ідзе размеркаванне нагрузкі, якая засталася пасля адкрытага конкурсу. Гэтая працэдура прадугледжвае прапанову супрацоўніцтва з боку ўніверсітэта, а не спаборніцтва заяваў ахвотных папрацаваць.
2. У сваім лісце адміністрацыя ЕГУ фактычна прызнаецца ў палітычнай матывацыі ўласных кадравых рашэнняў. Гэтыя дзеянні мы расцэньваем як адкрыты ціск на нязгодных з курсам кіраўніцтва. ЕГУ — не толькі адміністрацыя. Гэта, у першую чаргу, акадэмічная супольнасць. Мы маем права не пагаджацца з палітыкай топ-менеджменту, калі яна супярэчыць статуту універсітэта і іншым законам, якія рэгулююць сферу вышэйшай адукацыі. Без перспектывы пагроз, дыскрымінацыі або звальнення.
3. З універсітэта пасьлядоўна выціскаюцца дэмакратычныя актывісты. Ужо на стадыі папярэдняга размеркавання нагрузкі на наступны навучальны год застаюцца без працы сенатары ад дэмакратычнай платформы і чальцы Рады прафсаюза выкладчыкаў і супрацоўнікаў EHUnion Андрэй Лаўрухін і Андрэй Ралёнак, намеснік старшыні прафсаюза Канстанцін Ткачоў. Раней быў датэрмінова звольнены старшыня Сената прафесар Павел Церашковіч.
4. Падмена ацэнкі прафесіяналізму праверкай на лаяльнасць не мае нічога супольнага ні з «барацьбой за якасць выкладання», ні з працоўным заканадаўствам Літвы, ні з акадэмічнымі свабодамі.
5. На нашу думку, зачыстка ад іншадумцаў у імя кіраванай зверху стабільнасці зводзіць на нуль разрэкламаваную місію ЕГУ як «вострава свабоды» і ставіць пад пытанне ягоную эфектыўнасць як адукацыйнага праекта.
Для абароны сваіх законных правоў мы маем намер выкарыстоўваць усе легальныя сродкі, уключна са зваротам у суд. Два судовыя працэсы ў сувязі са сваімі нядаўнімі дзеяннямі кіраўніцтва ЕГУ ўжо атрымала.
Максім Жбанкоў, кандыдат філасофскіх навук, дацэнт, сенатар ЕГУ (8 гадоў працы ў ЕГУ),
Аляксей Крывалап, кандыдат культуралогіі, сенатар ЕГУ (13 гадоў працы ў ЕГУ),
Вольга Шпарага, кандыдат філасофскіх навук, дацэнт, намесніца старшыні Сената ЕГУ (13 гадоў працы ў ЕГУ).
