Следчы камітэт распачаў некалькі крымінальных справаў у дачыненні да службовых асобаў ААТ «Белшына» і афіляваных з імі бізнесменаў. Нанесеная імі шкода ацэньваецца ў больш чым мільярд рублёў.
Як паведамілі ў Следчым камітэце Беларусі, у выніку атрыманай ад аператыўных службаў МУС матэрыялаў было заведзена некалькі крымінальных спраў як у дачыненні да службовых асобаў «Белшыны», так і да шэрагу афіляваных з імі бізнесменаў, сярод якіх ёсць нават дырэктар расійскай кампаніі. Аднак у працэсе аб'яднання розных вытворчасцяў засталося толькі дзве крымінальныя справы, адна з якіх знаходзіцца на расследаванні ў Бабруйскім міжраённым аддзеле СК, а другая — у цэнтральным апараце Следчага камітэта.
Па першай крымінальнай справе галоўным падазраваным лічыцца начальнік бюро забеспячэння металам ААТ «Белшына», якому інкрымінуецца здзяйсненне злачынства па ч.3 арт.426 Крымінальнага кодэкса (перавышэнне ўлады або службовых паўнамоцтваў, здзейсненае асобай, якая займае адказнае становішча, якое пацягнула цяжкія наступствы). Паводле звестак праваахоўных органаў, службовая асоба прадпрыемства па змове з нявызначанымі асобамі пракруціла ў сакавіку-лістападзе 2012 шэраг сумнеўных аперацый з металаломам, у выніку чаго прадпрыемства была нанесена шкода на больш чым 465 мільёнаў рублёў.
Па другой крымінальнай справе галоўным падазраваным праходзіць былы намеснік начальніка аддзела матэрыяльна-тэхнічнага забеспячэння ААТ «Белшына». Яму інкрымінуецца здзяйсненне злачынства па ч.4 арт.210 Крымінальнага кодэкса Беларусі (крадзеж шляхам злоўжывання службовымі паўнамоцтвамі, здзейснены арганізаванай групай альбо ў адмыслова буйным памеры). Паводле дадзеных Галоўнага ўпраўлення па барацьбе з эканамічнымі злачынствамі (ГУБЭЗ) МУС, падазраваны па змове з двума бізнэсмэнамі, якія праз свае структуры маюць дагаворныя ўзаемаадносіны з ААТ «Белшына», здзейснілі крадзеж сродкаў прадпрыемства ў памеры больш за 514 мільёнаў рублёў. Цікава, што арыштаваныя цяпер бізнесмены апынуліся замяшаныя і ў іншых схемах крадзяжу сродкаў беларускіх прадпрыемстваў.
Варта адзначыць, што ў апошні час МУС і Следчы камітэт надаюць асаблівую ўвагу як самому канцэрну «Белнафтахім», так яго прадпрыемствам. Пачалося ўсё яшчэ ў сакавіку, калі УСК па Віцебскай вобласці па матэрыялах БЭЗ УУС Віцебскага аблвыканкама была заведзеная крымінальная справа па ч.4 арт.210 Крымінальнага кодэкса Беларусі ў дачыненні да намесніка начальніка цэха завода «Палімір» ААТ «Нафтан». Яму ставілі ў віну крадзеж на суму больш за 80 мільёнаў рублёў.
Затым зноў жа ў сакавіку УБЭП УУС Магілёўскага аблвыканкама знайшло злоўжыванні з боку дырэктара філіі «Белшына-Агра» ААТ «Белшына» на 130 мільёнаў рублёў. Пасля гэтага аператыўныя службы МУС прыйшлі на саму «Белшыну», а таксама пачалі прыглядацца да дзейнасці канцэрна «Белнафтахім».
Новыя крымінальныя справы на ААТ «Белшына» супалі па часе з затрыманнем намесніка старшыні канцэрна «Белнафтахім», якому інкрымінуецца атрыманне хабару ў памеры 19 тысяч долараў. Гэтыя справы вельмі добра адлюстроўваюць тэндэнцыю.
