Чацвёра беларусаў-будаўнікоў асуджаныя ў Расіі за забойства калег 2

Прысуд быў вынесены 28-гадоваму Сяргею Лабзову, 22-гадоваму Юрыю Ганковічу, 41-гадоваму Алегу Чыкмізаву і 32-гадоваму Аляксандру Афатніцкаму.

Лабзову і Ганковічу прызначана пакаранне ў выглядзе 12 гадоў пазбаўлення волі ў калоніі строгага рэжыму, Чыкмізаву — 8,5 года, Афатніцкаму — 10 гадоў.

Устаноўлена, што гэтыя людзі працавалі ў адной брыгадзе на вытворчай базе «Фаустава» ў Васкрасенскім раёне Маскоўскай вобласці.

9 лютага 2012 года яны разам пілі ў бытоўцы. Адзін з мужчын перакуліў на падлогу рондаль з прыгатаванай ежай. Сварка, якая пачалася пасля гэтага, хутка перарасла ў бойку, падчас якой раней неаднаразова судзімыя Лабзоў і Ганковіч спачатку збілі сабутэльніка, а потым задушылі яго падручным матэрыялам. Пры гэтым трэці фігурант Чыкмізаў, які бачыў забойства, не толькі не паведаміў пра злачынства ў праваахоўныя органы, але і неаднаразова перахоўваў труп і дапамагаў яго расчляняць.

У сакавіку 2012 года гэтыя людзі працавалі ўжо на вытворчай базе «Куроўскі» у Арэхава-Зуеўскім раёне.

Падчас чарговай сваркі Афатніцкі нанёс каля дзевяці колата-рэзаных раненняў аднаму з сваіх землякоў, ад якіх той памёр на месцы здарэння. Чыкмізаў, каб прыбраць сведку гэтага злачынства, нанёс некалькі удараў кухонным нажом яшчэ аднаму свайму земляку, які прысутнічаў пры забойстве.

Паводле БелТА

Хочаш падзяліцца важнай інфармацыяй ананімна і канфідэнцыйна? Пішыце рэдактару «Нашай Нівы» ў ТГ