Рыгору Барадуліну — 78 павіншуйце дзядзьку Рыгора ў каментах! 82

24 лютага Рыгору Барадуліну спаўняецца 78 гадоў. Жадаем патрыярху беларускай паэзіі здароўя, творчай і жыццёвай моцы, радасці.

«Эпоха Барадуліна». Фільм рэжысёра Віктара Корзуна.

Рыгор Барадулін. Уцякала зіма ад вясны

Уцякала зіма ад вясны
Па кустах вербалозаў рагатых, —
Ёй каптан абарвалі яны,
I на голлі матляецца вата.

Уцякала зіма ад вясны,
Уцякала па рэках, азёрах,
Лёд затрэскаў, закрэктаў, заныў,
Здрадзіў лёд — і вада на прасторы.

Толькі звон крыгалому ачах —
Брод шукаюць бярозы-бяглянкі
I трымаюць на ніцых плячах,
Як дзяцей палахлівых, буслянкі.

А вясна даганяла зіму;
Заяц скочыў у лужу блакіту,
Бо на хвост наступіла яму,
I пралескі распырскаў, раскідаў.

I ўцякала зіма ад вясны,
Пад нагамі ламачча затлела,
Парастрэсла па сцежках лясных
Снег апошні свой з ландышаў белых.

Уцякала зіма ад вясны —
Уцякала…

nn.by

Хочаш падзяліцца важнай інфармацыяй ананімна і канфідэнцыйна? Пішыце рэдактару «Нашай Нівы» ў ТГ