U dolščykaŭ elitnaha «Holf-kłuba» źjavilisia pytańni da dyrekcyi 2

Pryčynu prablem jany bačać u novaj dyrekcyi budavanaha abjekta.

2012 hod vydaŭsia niadrennym dla Biełarusi, i kraina trochi pryjšła ŭ siabie paśla chvali niadaŭniaha kryzisu. Pastupova razmarožvajucca budaŭničyja abjekty, rychtujucca novyja inviestycyjnyja prajekty i zaviaršajucca pačatyja budoŭli. Kaniec hoda ŭ Biełarusi i asabliva vosień — tradycyjna samy haračy čas dla zdačy hatovych abjektaŭ.

«Holf-kłub» — badaj, samy ambicyjny prajekt na karcie žyłoj nieruchomaści krainy. Heta bolš za 300 ha ziamli, na jakoj raźmieścicca spartyŭna-turystyčnaja infrastruktura, što ŭklučaje holf-pali sa štučnymi aziorami, kłubny dom dla siabraŭ holf-kłuba i elitny katedžny pasiołak «Hrynvič», abstalavany ŭsim, čaho duša pažadaje. Zakazčykam prajekta stała STAA «Holf-Kłub», za jakim stajać inviestary z Ukrainy.

«Biełaruski holf-kłub — najlepšy prajekt Jeŭropy» — raniej vykazaŭsia adzin z najlepšych dyzajnieraŭ holf-paloŭ Jeŭropy Poł Tomas, syn znakamitaha halfista i hrynkipiera Dejva Tomasa. Prajekt žyłoha pasiołka «Hrynvič» raspracoŭvaŭsia ŭ Łondanie firmaj «Čapmen Tejłar», jakaja ŭvachodzić u piaciorku samych viadomych suśvietnych dyzajn-kampanij. Taki pierśpiektyŭny prajekt nie moh nie pryciahnuć u svaje šerahi dolščykaŭ, siarod jakich — viadomyja i ŭpłyvovyja biełarusy.

Adnak ich upłyŭ zakančvajecca pierad aharodžaj, za jakoj budujecca kompleks.

Naprykład, niekatorym dolščykam admaŭlajuć u dostupie na abjekt, zaprajektavanaje pobač z domam adnaho z dolščykaŭ voziera prosta źnikła z prajekta. Bolš za toje, zatrymlivajucca terminy zdačy ŭ ekspłuatacyju važnych sistem narmalnaha funkcyjanavańnia abjektaŭ, naprykład, sistem elektra-, voda- i hazazabiaśpiečańnia. U dolščykaŭ uźnikaje łahičnaje pytańnie: ci budzie abjekt zdadzieny ŭ tyja terminy, jak heta prapisana va ŭkazie prezidenta? «Ježiednievnik» pahutaryŭ z dolščykam i navat rabotnikam «Holf-kłuba», jakija pralili śviatło na niekatoryja pryčyny roznahałośsiaŭ.

Siarhiej Parfionaŭ, dolščyk.

— Što zaachvociła vas zaklučyć inviestycyjnuju damovu na budaŭnictva žylla mienavita ŭ katedžnym pasiołku holf-kłuba?

— Vy viedajecie, žyllo ŭ ekałahična čystym pryharadzie — prestyžnym i elitnym — było majoj maraj ź dziacinstva. I, na žal, na siońniašni dzień jaje realizacyja pad vialikim pytańniem.

— I ŭ čym prablema?

— U tym, što ja siońnia vymušany spynić płaciažy pa damovie dolevaha budaŭnictva praz parušeńni terminaŭ budaŭnictva abjektaŭ infrastruktury. Heta značyć, praz poŭnuju adsutnaść sistem elektra-, haza- i vodazabiaśpiečańnia. I ŭ mianie ŭźnikaje pytańnie: kudy patračanyja maje hrošy? Nizkaja efiektyŭnaść kiravańnia prajektam, na maju dumku, vidavočnaja. Akramia hetaha, z kanca vieraśnia 2012 hoda mnie admovili ŭ naviedvańni budaŭnictva z farmalnaj pryčyny. Ale ŭ toj ža čas novyja klijenty, pakupniki katedžaŭ, jakija źbirajucca zaklučyć damovy, pryjazdžajuć na budaŭnictva holf-kompleksu ŭ luby čas. Ja viedaju, i vy napeŭna čuli, kolki dolščykaŭ u Rasii, va Ukrainie zastalisia ŭ vyniku i biez katedžaŭ, i biez hrošaj. U Biełarusi taksama byli takija vypadki. Tamu ŭsio, što siońnia adbyvajecca na abjekcie, prosta nie moža nie navodzić na peŭnyja dumki.

Pry zaklučeńni damovy dolevaha budaŭnictva ŭ prajekcie pasiołka było 4 voziery, a niadaŭna ja daviedaŭsia, što praz ekanomiju srodkaŭ dva z hetych azioraŭ z kaskadami vadaspadaŭ la ŭčastkaŭ z numarami damoŭ 1–4 vyklučanyja z prajekta. Ja ŭžo bajusia dumać, jakija abjekty pasiołka jany jašče źbirajucca vyklučyć.

— Heta značyć, parušajucca terminy budaŭnictva i ŭvodu holf-paloŭ?

— Tak. Prajekt byŭ zaćvierdžany Ukazam prezidenta Respubliki Biełaruś № 56 u 2007 hodzie, i heta vyklikała peŭny davier da zabudoŭščyka. U śniežni 2012, zhodna z ukazam, pavinnyja być pabudavanyja holf-pali (vialikaje i małoje), centr navučańnia holfu, inžyniernaja i transpartnaja infrastruktura, kłubny dom, budynak holf-akademii. U siaredzinie vieraśnia 2012 hoda ja naviedvaŭ budplacoŭku holf-kompleksu. Tam niama ni kłubnaha doma, ni budynka holf-akademii, ni haspadarčaj zony. Holf-pali, pa-mojmu, buduć budavać nie mienš za dva hady, a žyły pasiołak, spartovy i haściničny kompleksy — jašče daŭžej.

Budučym dolščykam, kali b jany da mianie źviarnulisia pa paradu, ja b paraiŭ nie śpiašacca rasstavacca z hrašyma, a pačakać jak minimum da siaredziny nastupnaha hoda.

Adzin z supracoŭnikaŭ «Holf-kłuba» Kanstancin Dajnieka raskazaŭ nastupnaje:

— Šmat što z taho, što niepakoić dolščykaŭ, sapraŭdy maje miesca. Pry ciapierašniaj dyrekcyi (jana pryznačanaja ŭ studzieni 2012 hoda — red.) kolkaść štatnych supracoŭnikaŭ vytvorča-techničnaha adździeła «Holf-kłuba» skaraciłasia da adnaho. Ujaŭlajecie, takaja maštabnaja budoŭla kantralujecca adnym čałaviekam. I ciapier jamu ciažka kantralavać jakaść budaŭnictva: u jaho prosta niama času, jon uvieś sychodzić na techničnaje padpisańnie aktaŭ, pracentovak.

Ukrainskaje kiraŭnictva štotydzień lotaje ŭ Kijeŭ, źjaŭlajecca na abjekcie ŭ aŭtorak, a lacić nazad u čaćvier abo piatnicu. Pry hetym ich zarpłata składaje niekalki dziasiatkaŭ miljonaŭ rubloŭ, a heta hrošy tych ža dolščykaŭ. U toj ža čas asnoŭnaja masa supracoŭnikaŭ «Holf-kłuba» atrymlivaje zarobak 4–5 miljonaŭ rubloŭ.

Ci viedajuć pra heta inviestary — zasnavalniki prajektu? Miarkujučy pa ŭsim, nie.

realty.ej.by

Chočaš padzialicca važnaj infarmacyjaj ananimna i kanfidencyjna? Pišycie redaktaru «Našaj Nivy» ŭ TH