Staličny praśpiekt Dziaržynskaha, jaki płaŭna pierachodzić u trasu Minsk—Brest, doŭhi čas zastavaŭsia zabudavany małapaviarchovym pryvatnym siektaram. Na dumku haradskich uładaŭ, darahaja ziamla prastojvała, tamu jaje prapanavali inviestaram, vysieliŭšy raniejšych žycharoŭ. Niekatoryja haspadary źbirajucca zmahacca za svajo žyllo da apošniaha, ale praśpiekt užo nie paznać — paŭsiul viadziecca budaŭnictva vysačeznych žyłych damoŭ, ofisnych i zabaŭlalnych centraŭ. Choć całkam daroha adkryjecca tolki praź niekalki hadoŭ, kali na vyjeździe z horada budzie adkrytaja stancyja mietro «Malinaŭka».
Biznes-centr «Lekt»
Hatel «Maryjot». Fota Onliner.by
«Kaliziej» eks-deputata Vahanava. Fota Realt.onliner.by
Žyły kompleks «Maskoŭski». Fota Realt.by
Studenckaja vioska. Fota Prof-Press.by
Zabaŭlalny centr «Tytan» z ZAHSam
Mikrarajon «Brylevičy-2»
Ofisny centr z aŭtasałonam Opel.
1. Try stancyi mietro
Hałoŭny ruchavik usiaho budaŭnictva na praśpiekcie — mietro. «Piatroŭščyna», «Michałova» i «Hrušaŭka» źviažuć centr Minska sa spalnymi rajonami Paŭdniovy Zachad, Malinaŭka i Brylevičy. Darečy, heta aŭtamatyčna pavialičyć košt tamtejšaj nieruchomaści.
Budaŭniki abiacali paśpieć adkryć mietro ŭ pačatku vieraśnia, adnak ciapier na hety miesiac płanujecca tolki vyprabavalny zapusk. A pasažyraŭ stancyi prymuć, imavierna, u listapadzie.
2. Biznes-centr «Lekt»
Adno z samych kanfliktnych budaŭnictvaŭ stalicy viadziecca prosta za budynkam administracyi Maskoŭskaha rajona. Biznesmen Andrej Bałabin, jaki vałodaje kramami bytavoj techniki «Piaty elemient», buduje tut 16-paviarchovy ofisny budynak. Takoje susiedstva pryjšłosia niedaspadoby miascovym žycharam. Jany sabrali bolš za paŭtysiačy podpisaŭ suprać budaŭnictva, u vyniku inviestar byŭ vymušany admovicca ad budaŭnictva parkinha na 600 mašynaŭ. Voś tolki ekałohii heta dapamoža słaba — praź niekalki hadoŭ kala biznes-centra pačniecca budaŭnictva pieršaha transpartnaha koła.
3. Hatel «Maryjot»
Placoŭka, raniej vydzielenaja pad ofisny centr, u vyniku dastałasia hatelu rasijskaj kampanii «Masprambud». Jaje asnoŭnym akcyjanieram źjaŭlajecca aliharch Michaił Huceryjeŭ, kapitał jakoha pieravyšaje $6 miljardaŭ. Absłuhoŭvać čatyrochzorkavuju haścinicu budzie najbujniejšy hatelny apieratar śvietu «Maryjot». 11-paviarchovy budynak raźličany na 264 numary. Miarkujecca, što budaŭničyja pracy skončacca da Čempijanatu śvietu pa chakiei 2014 hoda. Košt prajekta aceńvajecca ŭ $50 miljonaŭ.
4. «Kaliziej» eks-deputata Vahanava
Supolnamu biełaruska-brytanskamu pradpryjemstvu «Łada-Harant» na čale z eks-deputatam Alaksiejem Vahanavym daručyli zabudoŭvać kvartał «Novaja Hrušaŭka», jaki adnym z bakoŭ vychodzić na praśpiekt Dziaržynskaha. Raniej tut byŭ pryvatny siektar.
Pradstaŭničy žyły dom «Kaliziej» amal na paŭtysiačy kvateraŭ voknami jakraz vychodzić na niadaŭna adkrytuju trochuzroŭnievuju raźviazku, tamu pra cišyniu i śviežaje pavietra žycharam možna zabycca. Dom maje być zdadzieny da kanca hoda, ale apošnim časam pracy na im spynilisia.
5. Žyły kompleks «Maskoŭski»
«Maskoŭski» byŭ adnym ź pieršych prykładaŭ vydzialeńnia inviestaram cełaha kvartała pasiarod Minska. «Maskoŭskaja inviestycyjnaja bu-daŭničaja kampanija», intaresy ŭ jakoj mieli były mer Maskvy Juryj Łužkoŭ i jahonaja žonka miljarderka Alena Baturyna, była zasnavanaja jašče šeść hadoŭ tamu. U płanach było budaŭnictva siami žyłych damoŭ. Adnak impet va ŭźviadzieńni 25-paviarchovych słupkoŭ zhas, jak tolki vysokaja maskoŭskaja siamja trapiła ŭ Rasii ŭ niamiłaść. Na dadzieny momant dabudavanyja tolki dva damy, na padychodzie i treci.
6. Studenckaja vioska
Hučny sacyjalny prajekt pačaŭ realizoŭvacca čatyry hady tamu. Tady jon kaštavaŭ kala $300 miljonaŭ! Z vaśmi zapłanavanych studenckich internataŭ pakul što adkrytyja tolki try, jašče dva miarkujecca zdać da pačatku vieraśnia. Darečy, minskija ŭłady zdoleli prałabiravać rašeńnie, zhodna ź jakim finansavańnie budaŭnictva viałosia nie tolki z haradskoha biudžetu, ale i za košt usich abłaściej krainy.
7. Zabaŭlalny centr «Tytan» z ZAHSam
U kompleks «Tytan» užo ŭvachodziać handlovy cetr, načny kłub, boŭlinh, restaran, dziciačy łabirynt, 5D-kinateatr i placoŭka dla łaziernych bajoŭ. Adnak biznesmen Vital Sinicki, uładalnik kampanii «Sihmapolus», źbirajecca pašyryć jaho, dadaŭšy ofisnyja viežy. Aproč taho, na terytoryju «Tytana» pierajedzie ZAHS Maskoŭskaha rajona, vyzvaliŭšy dla rajvykankama niatannyja pamiaškańni kala płoščy Niezaležnaści.
Što jašče?
8. Ofisny centr z aŭtasałonam Opel.
9. Žyły dom na miescy barakaŭ pabuduje kampanija «Star RM», nibyta na hrošy zahadkavaha anhlijskaha inviestara.
10. Treciaja čarha handlovaha centra «Hłoba».
11. Ladovaja placoŭka Juryja Čyža kala studenckaj vioski.
12. Mikrarajon «Brylevičy-2» zabudoŭvaje biełaruskaja kampanija «Aresa-Servis» na čale ź Siarhiejem Kareńkam.
