Andrej Pačobut źviarnuŭsia da hienprakurora Ryhora Vasileviča.
Hienieralnamu Prakuroru Respubliki Biełaruś
Vasileviču Ryhoru Alaksiejeviču
Spadar Hienieralny Prakuror!
Źviarnucca da vas z zajavaj vyrašyŭ tolki tamu, što daviedaŭsia, što vy — doktar jurydyčnych navuk, prafiesar i zasłužany juryst Respubliki Biełaruś. Apošniaje zvańnie prysvojena ŭ dalokim 1994 hodzie, kali prava jašče niešta značyła na prastorach našaj Radzimy i adpaviedna jaho, to bok biełaruskaha prava, los nie pavinien być vam abyjakavy.
Takim čynam, da sutnaści prablemy. 11 lutaha sudom Kastryčnickaha rajona h. Minska ja byŭ pryznany vinavatym u aktyŭnym udziele ŭ niesankcyjanavanym mitynhu 19 śniežni 2010 hoda.
Adkiniem u bok i toje, što ja žurnalist, jaki vykonvaŭ tam svaju pracu, i toje, što sud, admoviŭšysia zadavolić ceły šerah maich chadajnictvaŭ, faktyčna pazbaviŭ mianie prava na abaronu ... Pakiniem, što nazyvajecca, hołyja fakty.
Pavodle rašeńnia suda, ja byŭ zatrymany supracoŭnikami milicyi ŭ 21.45, kala budynka Minharvykankama. Jak vy vierahodna viedajecie, dźviery ŭ Domie ŭrada byli paškodžany ŭ 22.21, a začystka płoščy Niezaležnaści śpiecpadraździaleńniami i zatrymańni pravodziłasia z 23.05 da 23.30 («Sovietskaja Biełoruśsija» «Za kulisami adnaj zmovy» 15 studzienia 2011 hoda). I adpaviedna zatrymany ja byŭ paśla 23.00. Sud «na takuju drobiaź» jak čas zatrymańnia naležnaj ŭvahi nie źviarnuŭ, stvaryŭšy svaim rašeńniem jurydyčny kazus.
Sprava ŭ tym, što 12 studzienia paśla pieratrusu ŭ majoj kvatery ja byŭ zatrymany supracoŭnikami UKDB pa Hrodzienskaj vobłaści i dastaŭleny ŭ budynak UKDB pa adrasie Telmana, 3 u Hrodnie. Tam ja byŭ dapytany ŭ jakaści śviedki pa kryminalnaj spravie, raspačataj pavodle padziej 19 śniežnia. Na pytańnie śledčaha UKDB majora Ivana Stojlika, što dapytvaŭ mianie, «Ci bačyŭ ja, jak raźbivali dźviery ŭ Domie ŭrada i ci mahu ja nazvać tych, chto heta rabiŭ?», ja adkazaŭ, što bačyŭ, jak raźbivali dźviery i vokny, ale nikoha z hetych asob nie viedaju.
A zaraz vierniemsia da rašeńnia suda Kastryčnickaha rajona h. Minska. Kali ja byŭ zatrymany ŭ 21.45, to jak ja moh bačyć, jak bili vokny ŭ Domie ŭrada ŭ 22.21? Spadar prakuror, nie treba być doktaram, prafiesaram i zasłužanym jurystam, kab zrazumieć, što heta nie mahčyma. Ci ja byŭ zatrymany ŭ 21.45, ci bačyŭ, jak bili vokny ŭ 22.21. Inšaha nie dadziena.
Mianie, nie doktara, nie prafiesara i tym bolš nie zasłužanaha, ale ŭsio ž jurysta pa adukacyi i žurnalista pa pryznačeńni nie pakidaje abyjakavaja hety pravavaja niespadziavanka. Tamu budźcie łaskavy, spadar Hienieralny Prakuror, albo prynieści pratest na rašeńnie suda Kastryčnickaha rajona h. Minska, albo raspačać u dačynieńni da mianie kryminalnuju spravu za daču zahadzia iłžyvych pakazańniaŭ.
Vieru, što vaša sumleńnie jurysta, choć u hetym kankretnym vypadku, padkaža vam pravilnaje rašeńnie i PRAŬDA, a za joj i PRAVA pieramohuć.
A. Pačobut
Žurnalist, vypusknik jurydyčnaha fakulteta HrDU
