U Biełarusi siaredniasutačnaja tempieratura ŭ pieršaj pałovie krasavika vahałasia ad 6 da 12 hradusaŭ ciapła, tolki časam na poŭnačy krainy jana nie pieravyšała 2‑5 hradusaŭ ciapła.
Taki tempieraturny fon na 2‑8 hradusaŭ ciaplejšy, čym zvyčajna, paviedamiła hałoŭny sinoptyk Respublikanskaha hidramieteacentra Volha Fiadotava.
15 krasavika charaktar nadvorja ŭ Biełarusi istotna nie źmienicca, choć pry pastupleńni pavietranych mas z Bałtyjskaha mora miescami čakajucca karotkačasovyja daždžy. Pad ranicu ŭ nizinach — tuman. Tempieratura pavietra ŭnačy budzie vahacca ad 0 da 6 hradusaŭ ciapła, pa paŭdniovym zachadzie Biełarusi da plus 8 hradusaŭ,
dniom u čaćvier prahnazujecca 12‑18 hradusaŭ ciapła.
Adnak u piatnicu atmaśfierny front, što budzie pieramiaščacca z paŭdniovaha zachadu Jeŭropy, pryniasie daždžy nočču ŭ paŭdniova‑zachodnija rehijony Biełarusi, a ŭdzień — na bolšuju častku terytoryi krainy. Dzie‑nidzie mahčymyja navalnicy. Tempieratura pavietra ŭ načnyja hadziny składzie plus 2—8 hradusaŭ, a dniom čakajecca 9—16 hradusaŭ ciapła.
U subotu, 17 krasavika, stanie zaŭvažna chałodna.
Na terytoryju Biełarusi skirujecca pavietranyja masy sa Skandynaŭskaj paŭvyspy. Nočču ŭ mnohich rajonach, a dniom pieravažna pa ŭschodzie krainy projduć karotkačasovyja daždžy. U načnyja hadziny ŭ paŭnočnych rajonach jość vierahodnaść mokraha śniehu.
Tempieratura pavietra ŭnačy budzie vahacca ad minus 1 hradusa da plus 6. Dniom jana nie pieravysić 5—12 hradusaŭ ciapła.
U niadzielu, 18 krasavika, čakajecca niaŭstojlivy charaktar nadvorja. Nočču na bolšaj častcy terytoryi, a dniom pieravažna na paŭnočnym zachadzie projduć daždžy. U načnyja hadziny pa poŭnačy Biełarusi mahčymy mokry śnieh. Tempieratura pavietra ŭ noč na niadzielu čakajecca ŭ miežach ad minus 2 hradusaŭ da plus 5. Dniom u niadzielu tempieratura budzie vahacca ad plus 5 hradusaŭ pa paŭnočnym zachadzie da 16 hradusaŭ ciapła pa paŭdniovym uschodzie.
U pačatku nastupnaha tydnia čakajecca davoli chałodnaje i niaŭstojlivaje nadvorje.
U načnyja hadziny tempieratura pavietra budzie ad minus 4 da plus 5 hradusaŭ, a dniom jana składzie 4—11 hradusaŭ ciapła. Pa papiarednich prahnozach, adčuvalna paciapleje tolki ŭ druhoj pałovie nastupnaha tydni.
