Padčas sustrečy staršynia Słonimskaha rajvykankama Hienadź Chomič razmaŭlaŭ z dyrektaram kampanii «Ahienctva raźvićcia prajektnych technałohij» (ARPT) z Maskvy Dzianisam Dudaravym.
Mienavita ARPT 22 lutaha nabyło na tarhach budynak byłoj słonimskaj charalnaj sinahohi. Zapłacić daviałosia tolki simvaličnuju sumu — usiaho 42 rubli.
Ciapier uładalnik pavinien adnavić pomnik architektury za piać hadoŭ, pry hetym zachavaŭšy jaho stylistyčnyja i kanstruktyŭnyja asablivaści.
Dzianis Dudaraŭ zajaviŭ, što jahonyja namiery — «samyja surjoznyja», a ciapierašniaja sustreča «dała start pačatku adnaŭlenčych rabot na abjekcie kulturnaj spadčyny».
Praŭda, kolki raboty buduć praciahvacca, rasijski pradprymalnik kazać pakul nie biarecca, heta «možna budzie skazać tolki paśla detalovaha abśledavańnia. Treba vielmi mnohaje vyśvietlić: kanstrukcyjnyja asablivaści, stan asnovy, najaŭnaść niejkich zhublenych elemientaŭ, jakija treba budzie adnaŭlać na padstavie histaryčnych daviedak».
Nahadajem, što ŭ pačatku 2020 hoda pamiatny budynak byŭ užo pradadzieny za 30 tysiač rubloŭ, abo 9300 dalaraŭ pa kursie. Haspadyniaj sinahohi stała dziciačaja piśmieńnica i piedahoh ź Minska Iłona Karavajeva (psieŭdanim Ryŭz Iaana). Pa słovach žančyny, kupla stała daninaj pavahi jaje blizkim svajakam, jakija paśla vajny žyli ŭ Słonimie.
Budynak sinahohi byŭ u avaryjnym stanie, tamu na jaje rekanstrukcyju patrabavałasia bolš za 50 000 dalaraŭ. Žančyna nie zmahła sabrać patrebnuju sumu, tamu pomnik architektury viarnuli miascovamu rajvykankamu.
Karavajevaj vielmi nie pašancavała ŭ tym liku i tamu, što ŭziałasia realizoŭvać svaju zadumu jana ŭ vielmi niespryjalny čas. Jakraz tady pačałasia pandemija karanavirusu, tady vybary z pratestami, a potym zachodnija sankcyi i vajna va Ukrainie. U takich umovach zasnavany Karavajevaj fond «Ratujučy spadčynu» za čas svajoj pracy sabraŭ usiaho 2700 rubloŭ, što było kroplaj u mory patrebaŭ. A paśla pačatku vajny va Ukrainie achviaravańni ad biełarusaŭ spynilisia, a finansavańnie mižnarodnymi arhanizacyjami, pa słovach Karavajevaj, stała niemahčymym z-za sankcyj, «pakolki ź biełaruskimi bankami zachodni bok nie supracoŭničaje ci nie ryzykuje supracoŭničać».
Čytajcie taksama:
Budynak byłoj słonimskaj sinahohi nabyŭ za biescań rasijanin
Słonimskuju sinahohu, jakuju marna sprabavała adnavić biełaruskaja piśmieńnica, znoŭ pradajuć
