Nemo — The Code (Šviejcaryja)
Hety zavadny trek, jaki ciažka vykinuć z hałavy, ciapier lidziruje ŭ staŭkach na pieramožcu Jeŭrabačańnia. Za try chviliny, adviedzienyja jamu na pieśniu, Nema paśpiavaje pakazać siabie ŭ pop-muzycy, repie i opiernych śpievach.
Paralelna z hetym u klipie chłopiec (Nema nazyvaje siabie niebinarnym čałaviekam) prachodzić pa vahonie ciahnika i źmianiaje niekalki ŭboraŭ — ad kaściuma pravadnika da sukienki a-la Maryja Kałas i ŭ advarotny bok. Kali jon zachavaje taki ž temp na scenie, nas čakaje jarkaje šou.
Baby Lasagna — Rim Tim Tagi Dim (Charvatyja)
Charvacki vykanaŭca da niadaŭniaha času byŭ lidaram u raźlikach bukmiekieraŭ, i tolki dniami tyja pačali schilacca ŭ bok Šviejcaryi. Tym nie mienš, u Baby Lasagna pa-minułamu vysokija šansy na pieramohu.
Heta pieśnia pra chłopca, jaki źjazdžaje ź vioski ŭ horad i choča na raźvitańnie dobra patančyć. Jak i ŭ minułym treku, tut namiašanyja roznyja styli: jość i pop-muzyka, i chevi-mietał, i, jak časta ŭ bałkancaŭ na Jeŭrabačańni, etničnyja notki. A taksama frykavatyja kaściumy i doška dla prańnia bializny, jakuju pryniasuć na scenu.
Joost Klein — Europapa (Niderłandy)
Pieśnia pra jeŭratatu maje niemałyja šansy na pieramohu i bujnyja 22 miljony prahladaŭ na aficyjnym jutub-kanale Jeŭrabačańnia. Tekst vielmi prosty: na niekalkich jeŭrapiejskich movach nam raskažuć, jak žyviecca čałavieku ŭ šenhienie — možna i naviedać siabroŭ u Francyi, i sieści na aŭtobus u Polšču abo ciahnik da Bierlina.
Na kožnym Jeŭrabačańni svaje fryki, i repier Jost Klajn — adzin ź ich. Reč nie tolki ŭ ahałamšalnym sinim pinžaku, jaki jon nadzieŭ na siabie ŭ klipie. Da Klajna jość pytańni pa palitycy: jon supracoŭničaje z rasijskimi muzykami i śpiavaje pra luboŭ da Rasii, što moža papsavać jaho šansy na pieramohu.
Slimane — Mon Amour (Francyja)
Hety trek — prosta pryhožaja pieśnia pra kachańnie, jakuju vykonvaje talenavity śpiavak z fajnym hołasam. Užo heta vyłučaje francuzskaha kankursanta siarod krain, jakija zładzili svaim vykanaŭcam numary z tancorami, trukami i piratechnikaj usich maściej.
Śliman nazyvaje svaju pieśniu «luboŭnym listom da jeŭrapiejskich sercaŭ». Numar francuza nahadvaje vystup niderłandca Dunkana Łoŭrensa na Jeŭrabačańni-2019 — tady śpiavak z pryhožaj pieśniaj Arcade (viadoma, pra kachańnie) vyjhraŭ konkurs. Moža, i Ślimanu pašancuje?
Bambie Thug — Doomsday Blue (Irłandyja)
Bukmiekiery staviać Bembi Tah na siomaje miesca ŭ śpisie favarytaŭ konkursa. Śpiavačka identyfikuje siabie jak niebinarnaha čałavieka i traplaje pad krytyku za prasłaŭleńnie satanizmu i mahii ŭ pieśnie, ale ž trek nasamreč hučyć unikalna i zapaminajecca.
Bolš za 400 irłandskich artystaŭ padpisali pietycyju ŭ adras Bembi Tah z prośbaj bajkatavać Jeŭrabačańnie — arhanizatary konkursu traplajuć pad krytyku, bo nie zabanili na im Izrail za bajavyja dziejańni ŭ Hazie, ale zabanili Rasiju za vajnu va Ukrainie (jeŭrabosy adkazvajuć, što heta dźvie roznyja situacyi). Bembi Tah taksama padtrymlivaje Palestynu, ale ličyć, što i prychilniki Palestyny musiać być na konkursie.
Marcus & Martinus — Unforgettable (Šviecyja)
Užo šmat hadoŭ Šviecyja pastaŭlaje na Jeŭrabačańnie jakasnyja pop-chity, niezdarma za plačyma šviedaŭ siem pieramoh na konkursie. I ŭ hety raz jany nie padviali. Badziory i tancavalny šviedski trek — historyja pra asobu z atrutnym kachańniem, jakuju niemahčyma zabyć.
Pradstaŭniki Šviecyi Markus i Marcinus — nasamreč narviežski duet, heta braty-bliźniaty. Jany vystupajuć pieršymi ŭ finale, i taki numar moža padpsavać šansy bratoŭ na dobry vynik.
Windows95man — No Rules! (Finlandyja)
Finski dydžej Windows95man, ź jakim vystupaje akcior Hienry Piispanien, paspračajecca ź niderłandcam Jostam Klajnam za tytuł hałoŭnych frykaŭ Jeŭrabačańnia-2024. I, zdajecca, pieramoža: na nacyjanalnym adbory duet vyłaziŭ u pačatku pieśni z hihanckaha jajka, pakrytaha tkaninaj, padobnaj da džynsavaj. Adzin z salistaŭ vytancoŭvaŭ u cišotcy z zabluranaj staroj emblemaj Windows i ŭ majtkach, inšy — u dziŭnym płaščy z hetaj ža tkaniny.
Usio heta hučyć fantasmaharyčna, ale, miarkujučy pa videa z nacadboru, publika była ŭ zachapleńni ad dueta. Kali tak, moža, i Jeŭropa acenić frykavatych finaŭ?
«Naša Niva» — krynica jakasnaj infarmacyi i bastyjon biełaruščyny
PADTRYMAĆ «NN»Čytajcie taksama:
Biełaruski śpiavak Ap$ent pra svaje zarobki: Rekord na miesiac — $30 tysiač
