Žychar Pružanskaha rajona zatrymany pa padazreńni va ŭdziele ŭ bajavych dziejańniach na terytoryi Ukrainy. Pra heta paviedamiŭ siońnia žurnalistam načalnik UUS Bresckaha abłvykankama Fiodar Balejka.
Načalnik Pružanskaha RUUS Alaksandr Huk paćvierdziŭ «Našaj Nivie», što zatrymany vajavaŭ na baku tak zvanaj «Danieckaj narodnaj respubliki».
Supracoŭniki kryminalnaha vyšuku Pružanskaha RAUS zatrymali mužčynu 11 studzienia ŭ Minsku. Cikava, što niepracujučy 35-hadovy žychar Pružanskaha rajona znachodziŭsia ŭ vyšuku za niavypłatu alimientaŭ.
«Kali jaho pryvieźli ŭ Pružany, pačali pracavać, vyśvietliłasia, što jon prymaŭ udzieł u bajavych dziejańniach na terytoryi Danieckaj i Łuhanskaj abłaściej u składzie bajavych atradaŭ. Maje ŭznaharody, paćvierdziŭ heta padčas apytańniaŭ. Dziejańni jaho buduć kvalifikavacca ŭ adpaviednaści z Kryminalnym kodeksam», — paviedamiŭ načalnik UUS.
