14 žniŭnia spartyŭnyja ŚMI paviedamili, što siłavikami zatrymany spartovy mieniedžar chakiejnaha «Dynama», u minułym viadomy žurnalist, redaktar «Priessboła» Uładzimir Bieražkoŭ.
U Śledčym kamitecie painfarmavali, što havorka viadziecca pra raskradańnie sumy 45 miljonaŭ biełaruskich rubloŭ. Varta adznačyć, što zusim niadaŭna ŭ izalatary časovaha ŭtrymańnia apynuŭsia hienieralny dyrektar «Dynama» Maksim Subotkin.
«Naša Niva» zhadvaje cikavyja staronki bijahrafii Uładzimira Bieražkova.
Zasnavalnik i redaktar «Priessboła»
My kažam Bieražkoŭ – ujaŭlajem «Priessboł». Havorym «Priessboł» – ujaŭlajem Bieražkova. Dzieviatnaccać hadoŭ hety čałaviek uznačalvaŭ samuju papularnuju i paznavalnuju spartyŭnuju hazietu krainy.
Bieražkoŭ naradziŭsia ŭ 1965 hodzie ŭ Minsku. Skončyŭ žurfak BDU. Dva hady adsłužyŭ u vojsku. A apošnija hady isnavańnia SSSR pracavaŭ u dziaržaŭnym infarmacyjnym ahienctvie BIEŁTA, tam jon pracavaŭ u adździele ź dziŭnaj nazvaj — vajskova-patryjatyčnaha vychavańnia i sportu.
«Jamu na momant stvareńnia «Priessboła» było 25 hadoŭ. Małady Vałodzia, jak i ciapier, — čałaviek, jaki absalutna ničoha nie baicca. Čałaviek, jaki nikoli nie zdradzić. Čałaviek, jaki addaść apošniaje siabru ŭ vypadku patreby. Kłasny mužyk, vielmi nadziejny, z mazhami. Jon prydumaŭ i pradumaŭ uvieś pačatkovy «Priessboł», — zhadvaŭ pra svajho kalehu i siabra Dźmitry Bieleńki.
Sapraŭdy, «Priessboł» staŭ admietnaj staronkaj u historyi biełaruskaj žurnalistyki. Čytačy nudzilisia ad spravazdač «Fizkulturnika Biełoruśsii», «Sovietskij sport» nie pisaŭ pra Biełaruś. A tut takoje śviežaje vydańnie z admietnymi aŭtarami, jakoje i čorta nie baicca. Cikava, što pieršy raz vychad «Priessboła» byŭ prypynieny jašče ŭ sakaviku 1994 paśla niekalkich krytyčnych materyjałaŭ pra Kiebiča.
Niahledziačy na toje, što Bieražkoŭ byŭ aŭtaram idei (navat nazvu prydumaŭ jon), pieršym hałoŭnym redaktaram «Priessboła» staŭ Alaksandr Barysievič, tolki paśla jaho sychodu ŭ 1995-m kiraŭnictva pierajšło da Bieražkova.
U 2014 Bieražkoŭ syšoŭ z «Priessboła» ŭ chakiejnaje «Dynama». Jon jašče škadavaŭ, što tak i nie prydumaŭ, što možna zrabić z papiarovaj hazietaj, kab pakinuć jaje na płyvu.
Pryjšoŭ prystaŭ, apisaŭ čajnik
Z «Priessbołam» nieadnarazova sudzilisia mnohija ŭpłyvovyja ludzi ŭ biełaruskim sporcie i ŭładzie.
Adzin z najbolš adčuvalnych udaraŭ byŭ naniesieny na pačatku 2005 hoda, kali sud Centralnaha rajona Minska vymusiŭ hazietu «Priessboł» vypłacić 30 miljonaŭ rubloŭ ministru finansaŭ, kiraŭniku fiederacyi himnastyki Mikałaju Korbutu, ułasna sam Bieražkoŭ musiŭ spłacić 10 miljonaŭ (4,6 tys. dalaraŭ pa tym kursie). Na toj čas heta niemałyja hrošy. «Priessboł» pakarali za publikacyju pra toje, što ŭ fiederacyi himnastyki ŭładkavalisia ludzi ź ciomnym minułym.
Spłacić usiu sumu adrazu Bieražkoŭ nie moh, tamu da jaho na kvateru prychodzili milicejskija prystavy, jakija apisvali ŭsiu majomaść, uklučajučy čajnik.
Jašče adnu historyju Bieražkoŭ raskazvaŭ u intervju «NN». Jana zdaryłasia paśla publikacyi materyjałaŭ tak zvanaj «spravy krata». Ab tym, jak hulcy zbornaj Biełarusi mahli ŭ 2003 hodzie zdać matčy Čechii i Małdovie.
«Hety čałaviek prapanavaŭ prajści na vulicu, dzie i musiŭ pieradać mnie hrošy. Heta byŭ by naŭprostavy dokaz taho, što čałaviek daje chabar. Užo hetaha dastatkova, kab jaho brać i ŭžo potym dakazvać inšyja złačynstvy. My sieli ŭ maju mašynu, niedaloka ad redakcyi. Hety čałaviek pačaŭ sprabavać pieradać mnie hrošy. U toj samy čas na mašynu nalacieli AMAPaŭcy ŭ maskach. Jany nadzieli na mianie kajdanki, pakłali tvaram na asfalt, niekalki razoŭ udaryli pa nyrkach. Ja zrazumieŭ, što trapiŭ u niejkuju pastku. Mianie advieźli va ŭpraŭleńnie pa baraćbie z ekanamičnaj złačynnaściu. Tam i pačali raźbiracca. Akazałasia, što hety złačynca napisaŭ zajavu, što ja vymahaju ŭ jaho chabar. Takaja voś vyjšła situacyja, u jakoj šmat dziŭnaha. Praź niejki čas mianie vyzvalili, bo pierakanalisia, što ja pracuju ŭ ramkach śledstva, tym bolš hrošy nie braŭ.
Ja pierastrachavaŭsia z usich bakoŭ. Dumaju, kali b ja zrabiŭ choć adzin niapravilny krok, to ŭžo siadzieŭ by ŭ turmie», — kazaŭ Bieražkoŭ «NN» u 2007 hodzie.
Hulaŭ u chakiej z Łukašenkam
Mienavita chakiej, a nie futboł byŭ zaŭsiody pryjarytetnym vidam sportu dla Uładzimira Bieražkova. Doŭhi čas (1993—2001) jon navat byŭ namieśnikam staršyni ŭ Biełaruskaj fiederacyi chakieja. Heta toj čas, kali naša zbornaja dasiahała pieršych pośpiechaŭ, prabivałasia na čempijanaty śvietu i Alimpijadu.
I sam Bieražkoŭ nikoli nie byŭ suprać pahaniać šajbu. Davodziłasia jamu heta rabić, jak u kamandzie Alaksandra Łukašenki, hetak i suprać jaho.
U intervju «Salidarnaści» jon zhadvaŭ: «Hulać u chakiej z Łukašenkam cikava. Vielmi cikava. Łukašenka — heta epocha. Łukašenka — heta vidny dziaržaŭny dziejač. Łukašenka — heta najcikaviejšaja asoba, hłyba. Mahčymaść zhulać ź im u chakiej daje niebyvałyja ŭražańni i dośvied. Plus, nie budu chavać, heta ciešyć samalubstva».
Na pytańnie, ci nie instruktujuć chakieistaŭ, kab jany nie išli ŭ sutyki z kiraŭnikom dziaržavy, Bieražkoŭ adkazvaŭ: «Prafiesijanały, da jakich ja siabie horda zaličvaju, nie stanuć utykacca ŭ amatara padčas hulni. Ja hulaŭ z Łukašenka jak z amataram».
Varta zaŭvažyć, što ŭ 2014 hodzie Bieražkoŭ trapiŭ u vuzkaje koła redaktaraŭ biełaruskich ŚMI, što brali intervju ŭ Łukašenki. Adnojčy «Priessboł» nazvaŭ Łukašenku čałaviekam hoda.
Na pytańnie, jakija ŭ vas palityčnyja pohlady, Bieražkoŭ adkazvaŭ: «Jany adsutničajuć».
Siamja
Na fota — Mikita Bieražkoŭ..
Baćka Uładzimira Piatro Bieražkoŭ byŭ rodam ź vioski Rečyca Połackaha rajona. Jon taksama skončyŭ žurfak BDU. Byŭ adkaznym sakratarom u haziecie «Sovietskaja Biełoruśsija». A praź niejki čas uvohule ŭznačaliŭ ahienctva BIEŁTA. Navat za savieckim časam Piatro Bieražkoŭ mieŭ mahčymaść vyjazdžać za miažu. Naprykład, na siesii AAN u Ńju-Jork. Bieražkoŭ kazaŭ, što baćka nie nadta radavaŭsia, što syn abraŭ prafiesiju žurnalista.
Starejšy syn Uładzimira Bieražkova naradziŭsia, kali tamu było 19-hadoŭ. Mikita niejki čas pracavaŭ pres-sakratarom minskaha «Dynama», jašče da taho, jak tudy pryjšoŭ baćka. Letaś Mikita Bieražkoŭ staŭ łaŭreatam CHII Mižnarodnaha fiestyvalu spartyŭnych filmaŭ «Atłant». Bolšuju častku času Mikita Bieražkoŭ bavić u Maskvie.
Taksama ŭ Bieražkova dvoje jašče niepaŭnaletnich dziaciej — 13-hadovy Piatro i 10-hadovaja Hanna.
Išoŭ u «Dynama» pad łozunhami baraćby z karupcyjaj
U minskaje «Dynama» Bieražkoŭ pryjšoŭ navodzić paradak. Hazieta doŭhi čas krytykavała papiarednich načalnikaŭ kamandy — Alaksieja Torbina i Ihara Matuškina. Maŭlaŭ, raźviali bardak u samym bahatym kłubie krainy.
Uvohule, Bieražkoŭ nieadnakroć krytykavaŭ raźmierkavańnie finansavańnia ŭ biełaruski chakiej. «Hrošy zaścinajuć vočy», — adnojčy jon emacyjna skazaŭ.
«Narodnyja hrošy sychodziać u čornuju dzirku», — heta taksama słovy Bieražkova.
Pa stanie na minuły hod aficyjnaja zarpłata Bieražkova ŭ «Dynama» składała 17 miljonaŭ rubloŭ.
Paśla skančeńnia minułaha siezona Bieražkoŭ razdavaŭ intervju, što novuju kamandu my pačynajem budavać užo ciapier. Mabyć, dabudoŭvać daviadziecca ŭžo novym asobam.
