Nophone. Nie telefon. Taki nasamreč pradajecca za 12 dalaraŭ – peŭna, dla tych, chto rasčaravaŭsia ŭ smartfonach, ale pryvyk da łapatki ŭ kišeni. Fota: hi-tech.mail.ru
Letaś ź inavacyjami kišennaj elektroniki było sumna. Hałoŭnaja navinka hodu — vialikija iPhone 6 i 6 Plus. Dla Apple vialikija ekrany byli doŭhačakanaj navinkaj, dla astatnich — budzionnaj rečaisnaściu. Niamnohija zaŭvažyli praktyčnuju karyść inavacyi Samsung — zahnutaha dyspłeja Galaxy Note Edge. Tak i nie zavajavaŭ rynak rasijski dvuchekranny YotaPhone. Naŭrad ci šmat ludziej zaraz pamiatajuć navinku Amazon, Fire Phone z čatyrma frantalnymi kamierami.
Što majem
Pieršyja navinki techničnaha charaktaru 2015 hoda — 12-jadziernyja pracesary (pakul rekord — 8-jadziernyja), ekrany razroźnieńniem 4K (pakul rekord — 2K) dy zvyšmahutny mabilny čyp Nvidia Tegra X1, zdolny vydavać karcinku na ŭzroŭni sučasnych kansolaŭ.
Smartfony stanuć bolš mahutnymi, tak. Praŭda, jany ŭžo zdolnyja zapuskać krutyja hulni kštałtu GTA San Andreas, dy takich hulniaŭ niašmat. Dyspłei stanuć lepšymi, tak. Praŭda, pabačyć asobnyja piksieli biez łupy čałaviečaje voka niazdolnaje navat na FullHD-dyspłei, čaho tam u dva razy bolš vyrazny 2K.
LG G Flex 2. Fota z sajta macdigger.ru
Adzinaj značnaj navinkaj pieršaj bujnoj techna-vystavy CES-2015 u Łas-Viehasie staŭ LG G Flex 2 – smartfon, jaki možna śmieła hnuć i nie bajacca kłaści ŭ zadniuju kišeniu. Praŭda, jon jość amal poŭnaj kopijaj pieršaha G Flex kanca 2013-ha, tolki «žaleza» pamacniej. Jašče Asus pradstaviŭ Zenfone Zoom – smartfon z trochkratnym aptyčnym zumam. Praŭda, ź minułaj viasny ŭ prodažy Samsung Galaxy K zoom, smartfon z 10-kratnym aptyčnym zumam.
Ad Apple u hetym hodzie varta čakać iPhone 6S. Tradycyjna vialikija inavacyi niasuć novyja «numary» ŭ madelach, a madeli «numar-es» niasuć tolki niaznačnyja «navaroty». Samsung musić pavarušycca, prodažy ich papiaredniaha fłahmanskaha smartfona Galaxy S5 byli daloka nie siensacyjnymi. Praŭda, pavodle čutak navat dyzajn Galaxy S6 budzie nahadvać S5, a techničnyja inavacyi brać prosta niama adkul.
Dy ładna «cary hary», im i tak žyviecca niepahana. Ale i mieniej bahatyja i paśpiachovyja nie ryzykujuć rabić niešta revalucyjnaje. Fłahmanskija smartfony jak zhadanaj LG, tak i HTC ci Sony prosta «chutčej, vyšej, macniej», a niejkija novyja «fiški» kali i źjaŭlajucca, to nie iduć u masy.
Čaho čakać
Dy paru «tuzoŭ u rukavie» 2015 hod dla technamanaŭ usio ž maje.
Project Ara. Fota z sajta slashgear.com
Vierahodna, samym niezvyčajnym telefonam hoda stanie (kali vyjdzie) Project Ara – modulny smartfon Google, jaki litaralna možna sabrać pa častkach. Naŭrad ci adrazu źjavicca šyroki vybar detalaŭ dla jaho, dy i prodaž moža być abmiežavany terytoryjaj ZŠA. Zatoje kali kupić taki, možna spadziavacca, što praz hod nie pryjdziecca kuplać novy, a dastatkova budzie pastavić tolki novy pracesar ci kruciejšuju kamieru.
Z vychadam Windows 10 uvosieni možna čakać abnaŭleńnia asartymientu Windows-płanšetaŭ, a mo i padzieńnia cen na płanšety z «darosłaj» nastolnaj Windows. Być moža, pytańnie «noŭtbuk ci płanšet» vyrašycca na karyść płanšeta dla trochi bolšaha adsotku ludziej.
Apple Watch. Fota z sajta wired.co.uk
Ale hałoŭnym hadžetam hodu chutčej za ŭsio stanie Apple Watch, razumny hadzińnik ad stvaralnikaŭ «ajfona». Jak u svoj čas iPhone zrabiŭ modnymi i zručnymi smartfony, jakija i tak daŭno byli na rynku, tak i Apple Watch moža razvarušyć rynak naručnaj techniki. Nažal, nieviadoma, čym mienavita moža razvarušyć: niečakanych funkcyj ci novych scenaroŭ vykarystańnia razumnych hadzińnikaŭ na prezientacyi Apple Watch pradstaŭlena nie było.
Chiba adzinaja funkcyja Apple Watch, jakaja źmienić śviet – intehracyja płaciožnaj sistemy Apple Pay. Zamiest płastykavaj kartki ci papiarovych kupiur možna budzie zrabić pakupku z dapamohaj hadzińnika (i kamisijaj u 0,15%). Mahčyma, taki sposab apłaty dabiarecca ŭ hetym hodzie da Jeŭropy, ale naŭrad ci da Biełarusi.
Dy ničoha strašnaha: u Biełarusi nie tak šmat uładalnikaŭ iPhone, zatoje paśla vychadu iPhone stała bahata ŭładalnikaŭ smartfonaŭ naohuł. Mahčyma, tak vyjdzie i z razumnymi hadzińnikami: Apple zrobić ich modnymi, astatnija paniasuć u masy. Peŭna, pakupkaj hoda-2015 stanie nie smartfon, a smart-hadzińnik.
