Vy nie pavierycie, što hetuju meblu robiać u Biełarusi FOTY 6

Aŭtar: Natalla Łubnieŭskaja, fota Nadziei Bužan

Biełaruskija meblevyja majstry raspracavali zručny anłajn-kanstruktar Geometree Variation. Ciapier kožny moža ŭ realnym časie stvarać dyzajny kamodaŭ i šafaŭ dla svajho doma. 

Usie elemienty, jakija jość u kanstruktary, — heta ŭnikalnyja raspracoŭki dyzajnieraŭ, jakija natchnialisia tradycyjami roznych častak śvietu. Vy znojdziecie tut i afrykanskija, i aŭstralijskija matyvy.

Voś takuju šafu možna sabrać virtualna samastojna.

Detali padabranyja tak, što lubaja kambinacyja vyhladaje pryhoža, admietna i hustoŭna. Tak što možna śmieła ekśpierymientavać, nie bajučysia pamylicca. Sami pasprabujcie.

Stvaryć dyzajn mebli ŭ kanstruktary

Kanstruktar.

Kanstruktar — prajekt ułaśnikaŭ firmy «Vudbiery» Alaksieja Barkoŭskaha i Ihara Šumaka.

Ułaśniki firmy «Vudbiery» Alaksiej Barkoŭski i Ihar Šumak.

Drevam jany ŭ duecie zajmajucca z nulavych. Alaksiej raniej pracavaŭ na vytvorčaści kaśmietyki, paśla handlavaŭ parkietam. Ihar budavaŭ damy i vyrablaŭ padłohi.

«U mianie dzied ciaślar, usie svajaki pa baćkavaj i matčynaj linijach źviazanyja z drevam. Možna skazać, ja z małakom maci apiłki ŭdychaŭ, — žartuje Ihar. — I kali ŭžo ŭ parkiecie vyrabiŭ usiu liniejku, stała zrazumieła, što ŭ nas vielmi šmat napracovak u płanie azdableńnia. Niemahčyma ŭsio ŭkłaści ŭ parkiet, bo časam takuju kolkaść manipulacyj z drevam treba zrabić, što ŭ hrošach na kvadratny mietr heta kładziecca niepadjomnym ciažaram».

Meblu firma pačała vyrablać u 2016-m. Pieršy zedlik, sabrany svaimi rukami, dahetul staić u šourumie. Pačynali sa stylu łoft.

«Bo heta samaje prostaje, što možna było rabić. Hruba kažučy, mietaličny karkas, niejkija dzieraviaki navierch — i nijakich prablem, — tłumačyć Ihar. — Tady jašče na łoft asabliva nie było mody — tolki siarod dyzajnieraŭ. Jany stvarali efiektnyja prajekty: nie stajała zadačy rabić tanna — heta byli surjoznyja, składanyja vyraby. Jak z šafami-kupe: niekali jany byli elitnaj častkaj interjeru, a potym stali adnymi z samych tannych šafaŭ».

Napačatku ŭ «Vudbiery» zamaŭlali repliki viadomych fabryk. Paśla, nabiŭšy ruku, majstry stali vyrablać rečy svajho dyzajnu. Stvaryli liniejku indyvidualnaj mebli, a praz peŭny čas zadumalisia pra bolš dastupnyja varyjanty.

«Indyvidualny dyzajn — heta źmiena ŭsich pamieraŭ, koleraŭ. A heta darahaja ručnaja praca. Dla mnohich heta niepadjomnyja hrošy. Tamu ŭ nas źjaviłasia ideja stvaryć sieryjnuju meblu, aŭtamatyzavać pracesy, kab i vybar byŭ, i narmalny košt», — tłumačyć Ihar.

Hałoŭnaja fiška prajekta Geometree Variation — anłajn-kanstruktar. Na sajcie možna sabrać madel na svoj hust: pahulacca z fasadam, koleram, harnituraj. U adnym korpusie moža być niekalki sotniaŭ kambinacyj — z absalutna roznymi charaktarami.

Źbiarycie sami meblu ŭ kanstruktary.

«Anłajn-kanstruktar adrazu raźličvaje košt. Kali čałaviek razumieje, što nie moža sabie dazvolić reč u takoj kamplektacyi, jon moža pierajhrać i sfarmiravać vyrab na svoj biudžet. Cana moža adroźnivacca ŭ paŭtara razy. Na sajcie my prapanujem dać madeli nazvu. Kali jana dobraja, my raźmiaščajem hety varyjant z nazvaj ad klijenta», — kaža Alaksiej.

Liniejku mebli raspracoŭvali ciaham hoda razam z dyzajnierkaj Natallaj Kukreš. Kirunak — etna-madern. Dla aŭstralijskaj tematyki natchnieńniem stali raboty tamtejšaj sučasnaj mastački Liny Ńjadbi, dla anhlijskaj — šaŭrony na paradnaj formie karaleŭskich hvardziejcaŭ. Na inšych fasadach možna ŭbačyć matyvy marskich chvalaŭ i hieohlifaŭ (hihanckich rukatvornych vyjaŭ na ziamli). Aproč zvyčajnych ručak — jarkija matylki i małpy.

Usie rečy vyrablajucca ź biełaruskaha dubu — vytvorčaść «Vudbiery» znachodzicca ŭ Rečycy. Tam i rodnyja miaściny Ihara, i drevanarychtoŭčaja baza pad bokam.

«Sam korpus vyrablajecca z masivu. Fasady — z MDF ź cikavaj apracoŭkaj: pakryćcio taktylna pryjemnaje, padobnaje na minierał. Furnitura niamieckaja», — raskazvajuć na pradpryjemstvie.

Kali indyvidualnaja mebla vyrablajecca dva miesiacy, to ź sieryi kanstruktara — try tydni. U płanach skaracić čas čakańnia ŭsiaho da adnaho tydnia.

«U nas niama zadačy prymusić čałavieka pieryjadyčna niešta kuplać, — tłumačyć Ihar fiłasofiju majsterni. — My zakłapočanyja resursami i ich raschodam. Nie chaciełasia b, kab nas asacyjavali z suśvietnym trendam na biaskoncuju vytvorčaść. Kali čałaviek praź niejkuju kolkaść hod vyrašyć źmianić interjer, jon moža zamović u nas fasady inšaha koleru, kab nie mianiać reč całkam».

Meblu z novaj sieryi ŭžo zamaŭlajuć. Praŭda, pakupniki pakul aściarožničajuć: vybirajuć spakojnyja kambinacyi. Ale ŭ majsterni ŭpeŭnienyja, što za etna-madernam budučynia.

«Heta nastupnaja chvala dyzajnu. Takija emacyjnyja vyraby ŭ Italii na vystavach tolki-tolki pačynajuć źjaŭlacca. Jašče nie ŭsie stamilisia ad adsutnaści ručak, usim treba «prakciš-kvadraciš», — uśmichajecca Ihar. — Ale trend na etna-matyvy ŭžo pačynajecca va ŭsim».

Stvaryć dyzajn mebli ŭ kanstruktary

Клас
0
Панылы сорам
0
Ха-ха
0
Ого
0
Сумна
0
Абуральна
0

Chočaš padzialicca važnaj infarmacyjaj ananimna i kanfidencyjna?