Mižnarodnaja arhanizacyja pracy (MAP) moža zaklikać da sankcyj suprać Biełarusi i druhi raz u svajoj historyi prymianić parahraf № 33 statuta arhanizacyi. Ab hetym 19 listapada paviedamiŭ staršynia Biełaruskaha kanhresa demakratyčnych prafsajuzaŭ Alaksandr Jarašuk.

«Sioleta MAP kinuty vyklik. Upieršyniu za apošnija hady ad Biełarusi ŭ MAP nie była nakiravana spravazdača ab vykanańni rekamiendacyj Mižnarodnaj arhanizacyi pracy, jakaja ŭ papiarednija hady stvarała choć niejkuju imitacyju dyjałohu», — zajaviŭ Jarašuk.

Na jaho dumku, dakład nie byŭ nakiravany ŭ MAP tamu, što pytańnie ab prafsajuznym ruchu ŭ Biełarusi nie razhladałasia na Mižnarodnaj kanfierencyi pracy, što prajšła ŭ červieni ŭ Ženievie, paśla čaho biełaruski ŭrad «paličyŭ miechanizm SAP złamanym».

Pavodle słoŭ Jarašuka, Mižnarodnaja arhanizacyja pracy ŭžo vykarystała adnosna Biełarusi praktyčna ŭvieś arsienał praduhledžanych u svaim statucie srodkaŭ. U suviazi z tym, što situacyja z prafsajuznym rucham u krainie horšaje, ab čym havorycca ŭ dakładzie pa vynikach pasiadžeńniaŭ Administracyjnaj rady MAP, Jarašuk nie vyklučaje prymianieńnia pracedury, praduhledžanaj parahrafam № 33 statuta arhanizacyi.

U pryvatnaści, parahraf № 33 praduhledžvaje rekamiendacyi da dziejańniaŭ, jakija Administracyjnaja rada MAP «paličyć metazhodnymi» dla krain, što admaŭlajucca kiravacca rekamiendacyjami Mižnarodnaj arhanizacyi pracy. «Za ŭsiu historyju arhanizacyi hety parahraf byŭ prymienieny adzin raz adnosna Mjanmy (Birmy). MAP zaklikaŭ da ŭviadzieńnia ekanamičnych sankcyj suprać hetaj krainy, pad ciskam jakich situacyja z pravami prafsajuzaŭ u Mjanmie stała lepšać. Nie chaciełasia b, kab Biełaruś pajšła darohaj Birmy», — adznačyŭ Jarašuk. Adnak, dadaŭ jon, sioleta źjavilisia novyja tryvožnyja abstaviny, jak situacyja na zavodzie «Hranit», jakija dajuć prava acanić stanovišča prafsajuznaha ruchu ŭ Biełarusi jak katastrafičnaje. «Biełaruski ŭrad samaŭstaraniŭsia ad vyrašeńnia prablem i daŭ padstavu dla takich žorstkich acenak», — reziumavaŭ Jarašuk.

Na pytańnie, ci nie baicca lidar Biełaruskaha kanhresa demakratyčnych prafsajuzaŭ nastupstvaŭ svaich vykazvańniaŭ, Jarašuk adkazaŭ: «Nas nieadnarazova sprabavali źniščyć. Vystajali tady, vystaim i ciapier. My nie vinavatyja, što isnujom. Toje, što my chočam žyć pa Kanstytucyi, nie naša prablema, a prablema ŭłady. Dla nas vidavočna, što lepš nie vypraboŭvać los i nie sprabavać ašukać ceły śviet, a prosta viarnuć biełaruskim rabočym svabodu».

Клас
Панылы сорам
Ха-ха
Ого
Сумна
Абуральна

Chočaš padzialicca važnaj infarmacyjaj ananimna i kanfidencyjna?