Ź jaho naradžeńniem surjozna zadumalisia ab palapšeńni žyllovych umovaŭ. Žyć upiacioch na 17 kvadratnych mietrach zdymnaha žylla zrabiłasia nie pad siłu. Dy i zakony ŭ nas prapisanyja dla šmatdzietnych siemjaŭ. Dziaržpadtrymka harantujecca. Dyk jakija mohuć być prablemy? Sabrać nieabchodnyja dakumienty, dačakacca damovy na dolevaje budaŭnictva, aformić kredyt u banku. Ale ŭsio akazałasia zusim nie tak prosta.

Spačatku ŭ administracyi Partyzanskaha rajona budavacca Harbacienkavym prapanavali ŭ mikrarajonie Masiukoŭščyna. A praź niejki čas apaviaścili: prykładna na paŭhoda raniej pačniecca ŭźviadzieńnie troch šmatpaviarchovych damoŭ u rajonie vulic Vaŭpšasava - Sołtysa: chočacie, raźmiarkujem vas tudy.

Harbacienkavy, viadoma, pahadzilisia. I ŭžo nie raz paškadavali.
Budoŭla, jakaja pačałasia ŭ krasaviku 2011 hoda, pavodle damovy pavinna była zaviaršycca ŭ sakaviku 2012-ha. Nasamreč ža navasielle adkładajecca až da viasny 2013-ha.

«Mała taho, što praz devalvacyju ŭ 2011 hodzie mietr žylla staŭ kaštavać spačatku 2,75 miljona, a paśla - 6,8 miljona, dyk jašče pytańnie z terminami... - adkryvaje dahavor dolevaha budaŭnictva Jaŭhien. - I heta pry tym, što dom u Masiukoŭščynie, ad jakoha my admovilisia, užo zdadzieny, choć uzvodzić jaho pačali paźniej za naš».

Situacyja ŭskładniajecca tym, što Harbacienkavych nastojliva prosiać pakinuć zdymnuju kvateru. Uładalniki chočuć vystavić jaje na prodaž: im terminova patrebnyja hrošy.

«Pierajechać my abiacali jašče paŭhoda tamu, kali mierkavali navasielle. A ciapier, kali haspadary daviedajucca, što pierasialicca ŭ novaje žyllo my zmožam tolki ŭ červieni, to, bajusia, vystaviać z rečami za dźviery», - chvalujecca Taćciana.

Źniać inšaje žyllo siamiejstvu ciapier nie pa kišeni. Z ahulnaha nievialikaha dachodu davodzicca płacić 200 dalaraŭ plus kamunalnyja pasłuhi za arendu ścipłaj 1-pakajovaj kvatery. I heta dla Harbacienkavych užo miaža. Jaŭhien - kiroŭca maršrutnaha taksi, Taćciana - u adpačynku pa dohladzie za dziciem. Adkul hrošy? Dy i źmianiać ciapier žyllo ŭ śpiešnym paradku - prablema. Bo jość jašče terytaryjalnaja pryviazka: starejšaha syna - u škołu, u sadok - dvaich małodšych...

Razam z Taćcianaj i Jaŭhienam doŭhačakanaha navasiella čakajuć 249 siemjaŭ. Čamu nie vykonvajucca zajaŭlenyja abaviazacielstvy pa terminach zdačy abjekta?

«Pavodle ekśpiertnaha zaklučeńnia Hałoŭdziaržbudekśpiertyzy budaŭnictva kvartała žyłoj zabudovy ŭ miežach vulica Sołtysa - zavułak Sołtysa - Vaŭpšasava składaje 27 miesiacaŭ, pry hetym padrychtoŭčy pieryjad dla kožnaha z žyłych damoŭ - 1 miesiac, - kaža dyrektar UKB Partyzanskaha rajona Vital Śmirnoŭ. - Ale my ŭziali na siabie pavyšanyja abaviazacielstvy pabudavać abjekt praz hod. Pry ŭmovie, što buduć svoječasova ažyćciaŭlaca finansavańnie i pastaŭka nieabchodnych materyjałaŭ. Finansavyja kalizii 2011 pryviali da prablemaŭ z tym i inšym. Na momant, kali pačałosia budaŭnictva, zavody admovilisia zaklučać dahavory na pastaŭku materyjałaŭ (u pryvatnaści, na žalezabietonnyja plity i armaturnyja vyraby) biez stoadsotkavaj pieradapłaty. Adbyŭsia adtok za miažu kvalifikavanych rabočych budaŭničych śpiecyjalnaściaŭ. Hetymi abstavinami i abhruntavany pieranos zajaŭlenych terminaŭ. U minułym hodzie budoŭlu my viali amal biez hrošaj, a značyć, bolš pavolna, čym mierkavałasia, bo vypłaty srodkaŭ byli nierytmičnyja...»

Nieapraŭdanyja čakańni? Hladzim: na pieršym liście dahavora dolevaha budaŭnictva, jaki jość na rukach u ludziej, prapisany termin jaho zaviaršeńnia - sakavik 2012 hoda. U inšym dakumiencie, jaki jany, kažuć, u vočy nie bačyli, inšaja ličba - 27 miesiacaŭ.
Vierać, viadoma, damovie, budujuć u adpaviednaści ź im svaje płany, raźmiarkoŭvajuć padrosłych dziaciej u sadki i škoły ŭ rajonie novabudoŭlaŭ, a paśla ŭ aŭralnym paradku pieravodziać bližej da miesca žycharstva.

Znosiny z čynoŭnikami ŭsich uzroŭniaŭ budaŭnictva na vulicy Sołtysa nie paskarajuć.

Harbacienkavy stukalisia sa svaim pytańniem u roznyja dźviery. Dzieści atrymlivali farmalny adkaz, dzieści - paprostu kryŭdu. Taćciana nie moža zrazumieć takoha staŭleńnia: «Mnie adkrytym tekstam niejak skazała adna dama: "Vy, šmatdzietnyja, zanadta nachabnyja". Maŭlaŭ, chočacie i kredyt ilhotny, i kvateru za hod pabudavać. Adkul hetaja złość? My ž nie prosim miłaści. Płacić za žyllo budziem sami. A na subsidyju i ilhotny kredyt majem prava pavodle zakonu".
Клас
Панылы сорам
Ха-ха
Ого
Сумна
Абуральна

Chočaš padzialicca važnaj infarmacyjaj ananimna i kanfidencyjna?