Havorka nie pra Ziuhanava z Žyrynoŭskim, a pra realnuju apazicyju. Tuju, jakuju nie padpuskajuć da Dumy i na Pieršy kanał.

Kab atrymać lehitymnych lidaraŭ, apazicyja vyrašyła pravieści vybary. Hałasavać možna było ŭ asiarodkach niezaležnaha hramadstva i praź internet — u hetym była fiška i navacyja.
Apazicyjnych siadzibaŭ niašmat i ich lohka było prykryć. A voś internet-hałasavańnie było dastupnym u kožnym kutku Rasii. Jaho sprabavali zabłakavać ddos-atakami — ale arhanizatary adbili ich. Hetyja vybary stali vynikam raźvićcia internetu i internet-ŚMI.
Usiaho ŭ hetych vybarach uziali ŭdzieł 81 tysiač čałaviek.
Varta adznačyć, što dla ŭdziełu ŭ hałasavańni tre było zarehistravacca ŭ Centralnaj vybarnaj kamisii. Na rehistracyju padali krychu bolš za 170 tysiač čałaviek, ź ich było vieryfikavana (heta značyć, dapuščana da hałasavańnia) 97500 vybarščykaŭ. Astatnija akazalisia miortvymi dušami — vybarcam musova było paćvierdzić svaju asobu.
Hałasavańnie išło pa čatyroch śpisach: ahulnahramadzianskim, za jaki hałasavali ŭsie i ŭ jakim vybirali 30 deputataŭ, a taksama ŭ libieralnym, levym i nacyjanalistyčnym śpisach.
Tut za adpaviedny śpis hałasavali tolki vybarščyki, jakija zarehistravalisia, adpaviedna, jak libierały, levyja abo nacyjanalisty. Pa hetych śpisach vybirali 5 deputataŭ ad kožnaha.
U vyniku takoj sistemy było harantavana pradstaŭnictva roznych palityčnych płyniaŭ apazicyi ŭ Kaardynacyjnaj radzie.
Arhanizatary vybaraŭ pasprabavali pieranieści na rasiejskuju hlebu vopyt partyjnych pieradvybaraŭ z ZŠA. Tam, jak viadoma, spačatku adbyvajecca adbor unutry palityčnaj partyi (demakrataŭ ci respublikancaŭ, jakija de-fakta ŭjaŭlajuć saboj šyrokija, raznarodnyja kaalicyi roznych płyniaŭ i hrupovak), a paśla ŭžo dźvie partyi spaborničajuć miž saboj.
U Amierycy pieradvybary prachodziać z dapamohaj ahulnych vybarčych kamisij. U Rasii ž apazicyi pryjšłosia dziejničać va ŭmovach cisku i niesvabody.

81 tysiača čałaviek, jakija ŭziali ŭ ich udzieł, — heta mała ci šmat?

Davajcie sprajektujem na Biełaruś. Rasija ŭ 15 razoŭ bolšaja za našu krainu. Ich 80 tysiač — heta jak tysiač 5–6 u nas.
Vidać, u vypadku arhanizacyi takich vybaraŭ u Biełarusi na apazicyjnyja ŭčastki pryjšło b bolš ludziej, niahledziačy na toje, što ŭ nas dyktatura. Navat u inicyjatyŭnych hrupach apazicyjnych kandydataŭ u nas zvyčajna bolš udzielnikaŭ. Ale i rasijskaja ličba — hruntoŭnaja baza dla adboru.
Usiaho było vyłučana 209 kandydataŭ. Kab stać kandydatam, tre było ŭnieści ŭ vybarčy fond achviaravańnie — 10 tysiač rubloŭ (kala troch miljonaŭ na biełaruskija).
Za hetyja kandydackija hrošy ŭdałosia prafinansavać dziejnaść vybarkama i ŭčastkaŭ. Byŭ stvorany Centralny vybarny kamitet. Vybary adbylisia ŭ subotu-niadzielu, ale z pryčyny chakierskich atak na sajt apazicyjnaha vybarkama internet-hałasavańnie padoŭžyli da paniadziełka. Bolšaść afłajnavych učastkaŭ mieściłasia ŭ vialikich haradach. Niekalki takich učastkaŭ adkryła emihracyja za miažoj. A voś anłajn možna było prahałasavać ź luboha miesca. U pryncypie,
nadziejnaja identyfikacyja asoby i nadziejnaść internet-hałasavańnia, abaronienaść jaho ad manipulacyj, i stała pryčynaj udačy hetych vybaraŭ.

Chto ž pieramoh?

Pieršaje miesca ŭ ahulnahramadzianskim śpisie z 43 tysiačami hałasoŭ zaniaŭ Alaksiej Navalny — uzychodnaja zorka rasijskaj palityki —
błohier, jaki vyjaviŭ nie adnu machinacyju pucinistaŭ ź dziaržaŭnymi hrašyma. U trojku lidaraŭ uvajšli taksama litaratar Dźmitryj Bykaŭ i eks-čempijon śvietu pa šachmatach Hary Kasparaŭ.
Na 4-m miescy charyzmatyčnaja televiadučaja Ksienia Sabčak — dačka viadomaha palityka 90-ch, jaki, darečy, pryvioŭ u vialikuju palityku Uładzimira Pucina.

Siarod inšych znakavych postaciaŭ u budučaj Radzie — Barys Niamcoŭ (16 miesca na vybarach), Andrej Iłaryjonaŭ (19), Udalcoŭ (20), Uładzimir Tor (5-je miesca ŭ nacyjanalistyčnym śpisie).

Darečy, miedyjnaja raskrutka zusim nie harantavała pieramohi. Pieradvybarnyja debaty na internet-kanale «Doždž» vyjavili mocnyja i słabyja baki pretendentaŭ.
Ale samaje hałoŭnaje, što vybary adbylisia, i akazalisia cikavym pačynańniem.
I prykładam dla pierajmańnia dla inšych aŭtarytarnych krain — u tym liku i dla biełaruskaj apazicyi.
Praŭda, možna mierkavać, što ŭ Biełarusi sproba arhanizacyi takich vybaraŭ sutyknułasia b, imavierna, z našmat bolšym procidziejańniem uładaŭ, źviahoj u dziaržaŭnych ŚMI, zastrašvańniem studenctva, błakavańniem sajta vybarkama i h.d. Adnak u vyniku ŭdačy apazicyja atrymała b lehitymnaha lidara.
Tamu nie vyklučana, što sproba paŭtaryć rasijski dośvied budzie zroblena i ŭ nas.

U vypadku kali hałasavańnie budzie lohka dastupnym u internecie i biaśpiečnym, jano moža akazacca davoli masavym i pryciahnuć vialikuju ŭvahu hramadstva.

Клас
Панылы сорам
Ха-ха
Ого
Сумна
Абуральна

Chočaš padzialicca važnaj infarmacyjaj ananimna i kanfidencyjna?