Arhkamitet “Čarnobylskaha Šlachu” źviarnuŭsia ź piśmom da Alaksandra Łukašenki. Arhanizatary «Čarnobylskaha Šlachu» zaprasili Łukašenku pryniać udzieł u žałobnym mierapryjemstvie, a taksama dać spravazdaču ab tym, jak byli realizavanyja prahramy dapamohi z-za miažy, a taksama ab tym, kolki i jak było patračana srodkaŭ z nacyjanalnaha biudžetu na likvidacyju nastupstvaŭ katastrofy.

Šanoŭny Alaksandr Ryhoravič!

26 krasavika 2007 hoda spaŭniajucca 21-ja ŭhodki z trahičnaha dnia ŭ historyi sučasnaj Biełarusi. Daty, jakaja stała losavyznačalnaj u žyćci tysiačaŭ biełarusaŭ. U 1986 hodzie ŭ hety dzień na Čarnobylskaj atamnaj elektrastancyi adbyłasia najbujniejšaja ŭ historyi technahiennaja katastrofa, naniesła niepapraŭnyja straty našaj krainie. Prykładna 2/3 radyjeaktyŭnych vykidaŭ asieli na našaj ziamli, zabrudziŭšy prykładna piatuju častku terytoryi z 20% nasielnictva. Amal usiu Biełaruś nakryła pieršaja chvala karotkažyćciovych radyjenuklidaŭ, častku jakich asadžali na našaj terytoryi prymusova, kab nie pajšli na Maskvu. Usio rabiłasia pad prykryćciom złačynnaj sakretnaści, i ludzi nie mahli abaranicca ad hetaha ŭdaru.

Pačynajučy z 1989 hodu demakratyčnyja siły Biełarusi ŭšanoŭvajuć datu katastrofy na ČAES. Kožny hod pad čas mitynhaŭ i šeściaŭ demakratyčnyja siły vykazvali patrabavańni da ŭłady. Heta byli patrabavańni raskazać praŭdu pra katastrofu i jaje nastupstvy, patrabavańni viarnuć lhoty likvidataram katastrofy i pierasialencam z zony zabrudžańnia radyjenuklidami.

Na pačatku 90-ch hadoŭ Złučanyja Štaty Amieryki i Jeŭrapiejski sajuz vydatkoŭvali vialikija srodki na roznyja humanitarnyja prahramy dziela pieraadoleńnia nastupstvaŭ katastrofy. Adnak ani pierasialeńnia ludziej z zabrudžanych terytoryjaŭ, ani krokaŭ pa abaronie ich zdaroŭja zroblena nie było. Naadvarot: ułady admianili ilhoty čarnobylcam i zajavili, što niama anijakaj niebiaśpieki dla žyćcia na zabrudžanych terytoryjach.

My patrabujem Vas, jak kiraŭnika dziaržavy, dać spravazdaču ab tym, jak byli realizavanyja šmatlikija prahramy dapamohi z-za miažy, a taksama ab tym, kolki i jak było patračana srodkaŭ z nacyjanalnaha biudžetu na likvidacyju nastupstvaŭ katastrofy?

My ŭpeŭnieny, što takaja spravazdača tolki padkreślić u vačach mižnarodnaj supolnaści ŭjaŭleńnie ab Biełarusi, hatovaj na realnyja kroki demakratyzacyi, vykazanych u tym liku ŭ zvarocie Jeŭrakamisii ad 17 listapada 2006 hoda.

Ad imia arhanizataraŭ Čarnobylskaha Šlachu zaprašajem Vas pryniać udzieł u žałobnym mierapryjemstvie.

Staršynia arhkamitetu Čarnobylskaha šlachu,

siabra Partyi BNF,

prafiesar Ivan Nikitčanka.

Клас
0
Панылы сорам
0
Ха-ха
0
Ого
0
Сумна
0
Абуральна
0