Karespandent «NN» panaziraŭ, jak adbyvajecca padlik hałasoŭ na adnym ź minskich učastkaŭ.
19:27. Adčyniajem dźviery škoły № 4 na vulicy Čyrvonaarmiejskaj. Heta pobač z Administracyjaj prezidenta, nasuprać histfaku BDU. Učastak № 160. «Dobry dzień, dzie ŭ vas tut hałasavańnie?»

Zvyčajna ŭ škołach jano adbyvajecca ŭ faje adrazu pry ŭvachodzie, ci ŭ spartzale. Nam ža pakazvajuć na strełački na ścianie, kali kiravacca imi, to traplaješ na druhi pavierch. Padymajemsia. Vuzki kalidor, stały vybarčaj kamisii la ścienki, urna dla hałasavańnia. Niedzie daloka-daloka siadziać naziralniki.

«My z haziety, chočam za padlikam pasačyć». Staršynia kamisii Tamara Burdyka pilna ŭzirajecca ŭ našy paśviedčańni. «Niejkija jany nie takija, jak va ŭsich». «Dziaržaŭnaha ŭzoru», — adkazvajem.
«Vy ž apazicyjnyja presa», — ci to pytajecca, ci śćviardžaje inšaja žančynka z kamisii. Što rabić z nami, nie viedajuć. Urešcie vydzielili dva kresły i pasadzili prosta na ŭvachodzie, ale nie dapuścili da naziralnikaŭ. Kab zarehistravacca? idziom u nastaŭnickuju, nibyta dvoješniki.

Žurnał rehistracyj zabrany, ale našy proźviščy ŭnosić nie śpiašajucca. «Ja pajdu parajusia, ci možna», — kaža staršynia kamisii. Niaŭchilna blizicca čas da zakryćcia ŭčastka. «Dyk my nie možam biez dazvołu staršyni». Tamara Arsienieŭna ž niekudy źnikła. «Siarhiej, zrabi choć adzin zdymak, pakul nas nie vyhnali, prašu fatohrafa», — Siarhiej robić.

U 19:54 prychodziać pieršyja i apošnija ŭdzielniki vybaraŭ, jakich my paśpieli zaŭvažyć. Tyja błanki, što ŭdałosia ŭbačyć, nie zieŭrali pustatoj, ale i kožny radok zapoŭnieny ŭ ich nie byŭ. Fifci-fifci. Mo jość zapavietnaja pałova, a mo i niama.
«Nu što, začyniajem užo?» — śpiašajucca nastaŭnicy. «Paŭchvilinki zastałosia», — adkazvaje inšaja. U kamisii z 12 čałaviek 10 žančyn jašče jość małady chłopiec z bakienbardami i sivy mužčyna, što paźniej budzie nasić skryni.
Na Kupałaŭskaj akruzie troje kandydataŭ. I kožnaha ź ich možna adnieści da praŭładnych. Heta dziejnaja deputatka-kamunistka Valancina Lavonienka, hałoŭny doktar «18-aj haradskoj palikliniki» Vadzim Kaściukoŭ i načalnik Leninskaha adździeła Departamienta MUS Valery Daškoŭski. Mišu Paškieviča z «Havary praŭdu» nie zarehistravali.
Apazicyi niama nijakaj, i ŭsio adno reakcyja naściarožanaja. «A čo vy na naš učastak pryjšli? Bližej usiaho da mietro?» — pytajucca ŭ nas. Kab lišnie raz nikoha nie pierakonvać zhadžalna kivaju hałavoj.

20:00. Aściarožna, dźviery začyniajucca. Nas nie čapajuć. Stały ŭmieła ssoŭvajuć u adno miesca. Utvarajecca taki kvadrat. Naziralniki padychodziać bližej da stała. Pryznajusia, apošni raz naziraŭ za vybarami ŭ 2007 (miascovyja, va Uruččy), dyk tady hladzieli my za pracesam padliku ź vialikaj adlehłaści.

Ciapier naziralniki stajać prosta za śpinami pradstaŭnikoŭ kamisii, choć ty dychaj im u patylicy. Čałaviek z dobrym zrokam moža pabačyć i biuleteni. Chacia čaho bajacca, kali kandydaty ŭsie svaje.

«Kolki ich usiaho [kandydataŭ — „NN“]? Troje?» — pytajecca "naziralnik" u kalehi. I što jon tut rabiŭ ceły dzień, kali navat kolkaść nie vyvučyŭ? Ahułam jaŭku napisali 53,6%. Napeŭna, prykładna takaja budzie pa ŭsim Minsku ŭ aficyjnych libach.

Na ŭčastku 1647 vybarcaŭ. Ź ich 348 (21%) prahałasavała daterminova, jašče da siemiarych pryjšli sa skryniaj dadomu.

Hałasy ličać asobna: daterminovaje, chatniaje, asnoŭny dzień. Kali vykładajuć sa skryń, dyrektarka stroha papiaredžvaje: «Tolki party nie padrapajcie». «Oj, a tut biuleteń z sardečkam. Ličyć jaho sapraŭdnym?» — kaža maładaja błandzinka. «Tak», — adkazvajuć joj.

Dyk voś u daterminovym za deputatku Lavonienku prahałasavała amal 70%, u asnoŭny dzień — 44%. I jak takaja roźnica moža być, mo chto patłumačyć?
U abjadnanych ličbach vyjšła, što Valancina Ściapanaŭna nabrała 54,4%, jaje supiernik-doktar Kaściukoŭ — 25,4%.

Dzieści ŭ 21:05 padlik hałasoŭ skončany. «Mužčyny, zaniasicie party ŭ kabiniet bijałohii», — danosicca hołas niastomnaj kiraŭnicy.

Viartajemsia praz Kastryčnickuju. La Doma aficeraŭ stajać siem mašyn ź milicyjaj. A raptam što. Kamunalniki ŭ žoŭtych kamizelkach miatuć vosieńskaje liście. «Vybary skončylisia, kažuć», — kidaje im Hudzilin. U adkaz nichto na jaho navat nie pahladzieŭ. Usim pofih.
Клас
0
Панылы сорам
0
Ха-ха
0
Ого
0
Сумна
0
Абуральна
0

Chočaš padzialicca važnaj infarmacyjaj ananimna i kanfidencyjna?