Urad Biełarusi rekamiendavaŭ orhanam dziaržkiravańnia, arhanizacyjam, miascovym vykanaŭčym i rasparadčym orhanam na dobraachvotnaj asnovie pravieści 21 krasavika respublikanski subotnik na pracoŭnych miescach. Prapanoŭvajecca taksama ažyćciavić dobraŭparadkavańnie i pryviadzieńnie ŭ naležny stan skvieraŭ, parkaŭ, inšych zon masavaha adpačynku, prajeznaj častki vulic, tratuaraŭ i dvarovych terytoryj. Adpaviednaje rašeńnie ŭtrymlivajecca ŭ pastanovie Savieta ministraŭ ad 9 krasavika № 452, paviedamiła pres‑słužba ŭrada.

Zaroblenyja na pracoŭnych miescach u dzień praviadzieńnia respublikanskaha subotnika hrašovyja srodki ŭ dobraachvotnym paradku prapanavana pieraličyć u abłvykankamy i Minski harvykankam, jakija ŭ svaju čarhu nakirujuć 50% hetych srodkaŭ u Ministerstva finansaŭ.

Utrymańnie najmalnikam hrašovych srodkaŭ z zarabotnaj płaty rabotnikaŭ, dla jakich 21 krasavika 2007 hoda źjaŭlajecca pracoŭnym dniom, pravodzicca dobraachvotna ŭ pamierach, jakija vyznačać sami kalektyvy.

Zhodna z dakumientam, 50% hrašovych srodkaŭ, zaroblenych na respublikanskim subotniku, nakiroŭvajucca na dadatkovaje finansavańnie zadańniaŭ prezidenckaj prahramy «Dzieci Biełarusi» na 2006‑2010 hady, kapitalny ramont ustanovy adukacyi «Nacyjanalny dziciačy azdaraŭlenčy łahier «Zubrania», nabyćcio transpartnych srodkaŭ dla dastaŭki dziaciej u hetu ŭstanovu, vydańnie padručnikaŭ i vučebnych dapamožnikaŭ dla dziaciej, vyrašeńnie inšych pytańniaŭ pa sacyjalnaj padtrymcy dziaciej.

Jašče 50% hrašovych srodkaŭ zastajucca ŭ rasparadžeńni abłvykankamaŭ i Minskaha harvykankama i buduć vykarystany na ŭmacavańnie materyjalna‑techničnaj bazy dziciačych damoŭ, škoł‑internataŭ dla dziaciej‑sirot i dziaciej, jakija zastalisia biez apieki baćkoŭ, budaŭnictva žyłych damoŭ dla siemjaŭ, jakija vychoŭvajuć dziaciej‑sirot i dziaciej, jakija zastalisia biez apieki baćkoŭ, nabyćcio śpiecyjalnaha abstalavańnia i transpartnych srodkaŭ dla arhanizacyi padvozu dziaciej‑invalidaŭ va ŭstanovy adukacyi, a taksama rekanstrukcyju i ramont abjektaŭ, praduhledžanych prezidenckaj prahramaj «Dzieci Biełarusi» na 2006‑2010 hady, i vyrašeńnie inšych pytańniaŭ pa sacyjalnaj padtrymcy dziaciej i siemjaŭ, jakija vychoŭvajuć ich.

Rabočuju hrupu pa padrychtoŭcy i praviadzieńni subotnika ŭznačalić namieśnik premjer‑ministra Biełarusi Alaksandr Kasiniec.

Ministerstvu transpartu i kamunikacyj, abłvykankamam i Minskamu harvykankamu daručana zabiaśpiečyć u hety dzień bieśpierabojnuju rabotu pasažyrskaha transpartu.

U zastaŭcy vykarystany frahment plakatu z sajtu davno.ru

Клас
0
Панылы сорам
0
Ха-ха
0
Ого
0
Сумна
0
Абуральна
0

Chočaš padzialicca važnaj infarmacyjaj ananimna i kanfidencyjna?