Pažar zdaryŭsia minułaj nočču. Mašyna kandydata Alaksieja Cichanienkava była pryparkavanaja na leciščy kala vioski Kabylaki ŭ Aršanskim rajonie.
«Lecišča znachodzicca na terytoryi dačnaha kaaperatyva „Budaŭnik“. Ja nie pamiataju, kab u nas raniej hareli mašyny. Na pačatku druhoj hadziny nočy ja pačuŭ tresk i niejkija chłapki. Zirnuŭ u akno — haryć maja mašyna. Vyklikaŭ ratavalnikaŭ i milicyju. Mašynu patušyli, ale sałon uvieś vyharaŭ», — apavioŭ Alaksiej Cichanienkaŭ.
Nieviadomyja złamyśniki pavybivali šyby, kab ukinuć usiaredzinu trochlitrovuju płastykavuju butelku z haručaj vadkaściu.
Alaksiej Cichanienkaŭ padazraje ŭ padpale dvuch bratoŭ, adzin ź jakich — supracoŭnik milicyi. Pra heta jon i zajaviŭ śledčym. Abodvuch bratoŭ 11 vieraśnia sprabavali apytać praz detektar chłuśni, ale małodšy admoviŭsia ad hetaj pracedury.
Napiaredadni, 10 vieraśnia, pa telebačańni tranślavali teledebaty kandydataŭ pa Aršanskaj haradskoj vybarčaj akruzie z udziełam davieranaj asoby Cichanienkava, viciebskaha pravaabaroncy Paŭła Levinava. Debaty atrymalisia vostryja: kandydatka Ludmiła Dabrynina, staršynia Aršanskaha harsavieta, u kateharyčnaj formie admoviłasia adkazvać na pytańnie pra zachavańnie pravoŭ čałavieka ŭ Respublicy Biełaruś.
Pavał Levinaŭ nie vyklučaje, što padpał mašyny kandydata moh stacca nastupstvam tranślacyi teledebataŭ.
