Jašče niadaŭna, vystupajučy pierad studentami EHU, zasnavalnik i ŭładalnik partała Tut.by śćviardžaŭ, što ŭ Biełarusi pabudavany «raj dla abyvaciela», jašče ŭčora Juryj Anatolevič hrudźmi kidaŭsia baranić niekatorych asabliva nabližanych da karmuški ajčynnych biźniesmienaŭ ad sankcyj ES, a siońnia adkryta franduje, dazvalajučy krajniuju stupień apazicyjnaha abureńnia: «…Naša dziaržava znachodzić miljony na ladovyja pałacy i baraćbu z padletkami ŭ sacyjalnych sietkach, ale nie zachacieła znajści kapiejki, kab kamandziravać kiraŭnikoŭ i śpiecyjalistaŭ dla ŭdziełu ŭ biełaruskaj siekcyi na „ŭschodniejeŭrapiejskim Davosie“, Biełaruś na hetym pavažanym forumie pradstaviać nie źviazanyja z ekanomikaj ludzi, jakich naŭrad ci budzie zajmać rost biełaruskaha ekspartu, raźvićcio ekanamičnaha supracoŭnictva abo inviestycyi ŭ Biełaruś».

Voś hetaja fronda całkam niezrazumiełaja.

Naš «Raj dla abyvaciela» maje vyrazna vyjaŭlenuju pakietnuju prapanovu. Nizki košt kamunalnych pasłuh nie moža iści ŭ adryvie ad zabarony na sacyjalnuju aktyŭnaść, z-za taho, što datacyi na kamunałku kampiensujucca vysokimi koštami ŭ inšych miescach. «Ladovyja pałacy» nieadździelnyja ad admovy farmavać ekanamična pryvabnaje asiarodździe, bo ŭ prazrystaj, razumnaj ekanamičnaj prastory buduć spačatku ličyć ekanamičnuju metazhodnaść, a tolki potym układvać hrošy ŭ budoŭlu.

Tak što aburajecca Juryj Anatoljevič zusim darma.

I jašče adna remarka, pryśviečanaja bolš rańniamu kidku Zisiera na ESaŭskuju ambrazuru, sens jakoha zvodziŭsia da taho, što sankcyi ES niezakonnyja, bo niama ni adnaho dokazu ŭdziełu t.zv. «kašalkoŭ» u finansavańni režymu.

Nahadaju skandał, jaki paŭstaŭ, kali «Staličnaje telebačańnie» skrała kancept amierykanskaha sieryjała «Teoryja vialikaha vybuchu» i vypuściła samabytnaje, šmatviektarnaje i dziŭna padobnaje šou. Čak Łory, aŭtar «Teoryi vialikaha vybuchu», źviarnuŭsia za abaronaj svaich pravoŭ, «Uornier Brazers» napružyła jurystaŭ, jakija, vyvučyŭšy prablemu, zrabili zaklučeńnie:

— «Staličnaje telebačańnie» — pryvatny telekanał, jaki pracuje pad kiravańniem dziaržavy. Sudzicca biessensoŭna.

Chutčej za ŭsio, takuju formułu ŭžyvajuć u ES u dačynieńni da Piefcijeva, Čyža dy inšych.

Dziŭnaje robicca ŭ hałavie ŭ Juryju Anatoljeviča.

Клас
Панылы сорам
Ха-ха
Ого
Сумна
Абуральна

Chočaš padzialicca važnaj infarmacyjaj ananimna i kanfidencyjna?