Pačaty 5 krasavika ŭ Mahilovie sud nad supracoŭnikami milicyi za niezakonnaje zatrymańnie ŭ śniežni 2006 hoda hrupy hramadskich aktyvistaŭ praciahniecca ŭ paniadziełak, 9 krasavika.

Siońnia ŭ zale suda byli dapytany šeść milicyjanieraŭ. «Pakazańni supracoŭnikaŭ milicyi nie adpaviadali tamu, što było napisana ŭ ich rapartach, — paviedamiŭ BiełaPAN mahiloŭski pravaabaronca Barys Buchiel. — Jany pastajanna błytalisia. Hety praces — navuka dla milicyjanieraŭ, kab u budučym jany zadumvalisia nad tym, iści na parušeńnie zakona ci nie i ci vykonvać sumnieŭnyja zahady svaich kiraŭnikoŭ. Jany jašče doŭha buduć abmiarkovać hety sud pamiž saboj».

9 krasavika budzie dapytany jašče adzin supracoŭnik milicyi, jaki nie źjaviŭsia ŭ sud.

Nahadajem, 16 śniežnia 2006 hoda pa darozie na Minsk na adlehłaści niekalki kiłamietraŭ ad rajcentra Białyniči było spyniena maršrutnaje taksi, u jakim znachodziłasia 13 čałaviek. Jany nakiroŭvalisia na ŭstanoŭčuju kanfierencyju Sajuza levych partyj u Čarnihaŭ (Ukraina). Supracoŭniki DAI prapanavali viarnucca ŭ Mahiloŭ dla pravierki dakumientaŭ na mikraaŭtobus. Viartajučysia ŭ abłasny centr, pasažyry maršrutnaha taksi vyrašyli vyjści na adnym z prypynkaŭ horada, kab samastojna dabracca da čyhunačnaha vakzała i ŭ Žłobinie siesci na ciahnik da Čarnihava. Kali pasažyry vychodzili ź mikraaŭtobusa, da prypynku padjechała jašče adna mašyna DAI, i delehataŭ, vyłučanych na kanfierencyju, supracoŭniki milicyi pačali zapichvać u mikraaŭtobus, prymianiajučy fizičnuju siłu. Zatrymanym było skazana, što jany pavinny być dastaŭleny ŭ RAUS dla pravierki dakumientaŭ. Siarod tych, chto siłaj byŭ pasadžany ŭ mikraaŭtobus, apynulisia Alaksandr Karaloŭ, Alaksiej Paŭłoŭski, Iryna Kačarova i Juryj Darašenka. Paśviedčańni kandydataŭ u deputaty miascovych savietaŭ na supracoŭnikaŭ DAI nijak nie padziejničali.

Клас
0
Панылы сорам
0
Ха-ха
0
Ого
0
Сумна
0
Абуральна
0

Chočaš padzialicca važnaj infarmacyjaj ananimna i kanfidencyjna?