Rašeńnie uładaŭ ab pieradačy ŭładalniku «Trajpła» kantrolnaha pakieta akcyj zavoda prachodzić apošnija stadyi ŭzhadnieńnia, paviedamlaje "Zaŭtra tvajoj krainy". Krynica va ŭładnych strukturach nie paćvierdziła, ale i nie abvierhła cikavaści aliharcha da adnaho z najbujniejšych biełaruskich pivavarnych zavodaŭ. «Chutka ŭsio daviedajeciesia», — zaintryhavaŭ surazmoŭca.

Čamu dziaržava śpiašajecca admovicca ad «Krynicy»?

Ekśpierty miarkujuć, što apošniaj kroplaj, jakaja pierapoŭniła čašu ciarpieńnia uładaŭ i jakaja zaachvociła ich narešcie pasprabavać pradać zavod pryvatnamu inviestaru, mahli stać vyniki pracy «Krynicy» ŭ minułym hodzie.

Pa vynikach 2011 najbujniejšy vytvorca piva na biełaruskim rynku, jakim «Krynica» źjaŭlałasia z 1976 hoda, upieršyniu sastupiŭ liderstva hrupie kampanij «Chajnekien». Rynkavaja dola dvuch zavodaŭ «Chajnekiena» u Babrujsku i Rečycy ŭ prodažach na ŭnutranym rynku skłała 23% (u 2006 hodzie dola «Siabra» i «Rečycapiva» była 16,5%), tady jak u «Krynicy» — usiaho 22,2% (u 2006 hodzie — amal 40%).

U paraŭnańni z 2010-m hodam, kali prybytak «Krynicy» składaŭ 5,7 młrd. rubloŭ, u minułym hodzie zavod pracavaŭ u stratu — minus 1,6 młrd. rubloŭ.

U hetym hodzie hrupa «Chajnekien» pa-raniejšamu trymaje pieršynstva pa pastaŭkach na ŭnutrany rynak. Pa vynikach studzienia-maja tolki adzin babrujski zavod kancerna realizavaŭ u Biełarusi 4,5 młn dał piva. «Krynica» pradała za hety pieryjad 4,1 młn dał unutry krainy, a taksama 1,7 młn dał piva na ekspart.

Košt budzie na paradak nižej, čym dva-try hady tamu

Umovy mahčymaha prodažu «Krynicy» samomu ŭpłyvovamu biełaruskamu biznesoŭcu Juryju Čyžu nieviadomyja. Ale treba mierkavać, što miascovy aliharch zrabiŭ uładam bolš vyhadnuju prapanovu, čym tureckaja kampanija Efes Breweries. Turki pradastavili ŭradu Biełarusi prapanovu pa košcie i płan pa pierśpiektyŭnym raźvićci zavoda ŭ kancy minułaha hoda, ale atrymali admovu: biełaruskija ułady nie zadavoliła suma, jakuju hatovy byŭ zapłacić za «Krynicu» piatnaccaty ŭ śviecie vytvorca piva.

U toj ža čas ekśpierty adznačajuć: kolki b ciapier ni davaŭ za hety pivavarny zavod Čyž, suma budzie na paradak mienšaj za tuju, jakuju dziaržava mahła b vyhandlavać pry pryvatyzacyi zavoda jašče dva-try hady tamu.

Kolki razoŭ pradavali «Krynicu»?

Epapieja z pryvatyzacyjaj «Krynicy» — doŭhaja i nasyčanaja padziejami historyja.

U 2001 hodzie biełaruskija ŭłady pradali kantrolny pakiet zavodu rasijskaj kampanii «Bałtyka», kab praź niekatory čas anulavać svajo rašeńnie. «Bałtycy» daviałosia źviartacca ŭ mižnarodnyja sudy, kab viarnuć inviestavanyja ŭ pradpryjemstva amal 11 młn dołaraŭ.

U 2003 hodzie zavod byŭ pieradadzieny ŭ piacihadovaje daviernaje kiravańnie «Pryjorbanku». Hetaja «nahruzka» razhladałasia jak svojeasablivaja płata za ŭvachodžańnie na biełaruski rynak aŭstryjskaj hrupy Raiffeisen. Akramia taho, treba było adniekul brać hrošy, kab raspłacicca z «Bałtykaj» za zaviezienaje abstalavańnie.

Pa zakančeńni piacihadovaha terminu z «Pryjorbankam» paŭstaŭ varyjant z pryciahnieńniem u jakaści inviestara kampanii SABMiller. Pryčym, hałoŭnym pasiarednikam — partnioram suśvietnaha kancerna nazyvaŭsia tahačasny hałoŭny biełaruski aliharch Uładzimir Piefcijeŭ. Ale SABMiller i Piefcijeŭ ŭ vyniku nie ryzyknuli, a z traich inšych pretendentaŭ, jakija padali letam 2009 hoda zajaŭki na tender pa adboru kirujučaha menedžara dla «Krynicy», arhanizatary tarhoŭ nikoha nie vybrali. Tendar zaviaršyŭsia biez ab'vieščańnia pieramožca.

Клас
0
Панылы сорам
0
Ха-ха
0
Ого
0
Сумна
0
Абуральна
0

Chočaš padzialicca važnaj infarmacyjaj ananimna i kanfidencyjna?