Kamisija pravodziła śledztva ŭ spravie tajamničaj śmierci ŭ Biełarusi aficera litoŭskaha Adździełu dziaržaŭnaj biaśpieki. Z apublikavanych kamisijaj materyjałaŭ vynikaje, što sprava maje našmat bolšyja maštaby i datyčyć pieradusim rasiejskich upłyvaŭ u litoŭskaj palitycy.

Pavodle deputataŭ, źviazanaja z «Hazpromam» litoŭskaja kampanija «Dujotekana» sprabuje kantralavać administracyju Litvy i jejnyja specsłužby. Vysoki ranham aficer Adździełu dziaržaŭnaj biaśpieki skazaŭ kamisii, što machlarstva «Dujotekana» maje dla biaśpieki Litvy jašče bolšaje značeńnie, čym sprava źniataha ŭ 2004 h. z pasady prezydenta Rałandasa Paksasa, jaki abvinavačvaŭsia ŭ tym, što hramadziŭ vakoł siabie ludziej, źviazanych z rasiejskimi specsłužbami.

Pavodle aficeraŭ kontravyviedki, jakija davali pakazańni pierad kamisijaj, kampaniju «Dujotekana», što zajmajecca dystrybucyjaj rasiejskaha hazu ŭ Litvie, «Hazprom» zasnavaŭ dziela taho, kab padkuplać miascovych palitykaŭ i čynoŭnikaŭ.

Aficery śćviardžajuć, što «Dujotekana» vykonvaje zahady Ŭładzimiera Jakunina, byłoha aficera raźviedki savieckaha KHB, a siońnia blizkaha supracoŭnika prezydenta Pucina.

Hałoŭnym sajuźnikam «Dujotekana», albo — jak śćviardžajuć litoŭskija medyi — hałoŭnym ahientam rasiejskaha ŭpłyvu ŭ Litvie mieŭsia być viceministar zamiežnych spravaŭ Albinas Januška. Čałaviek, jakoha ličać šeraj eminencyjaj litoŭskaha MZS.

Z pakazańniaŭ inšych aficeraŭ kontrraźviedki vynikaje, što Januška dziakujučy ŭpłyvam u ciapierašniaha prezydenta Vałdasa Adamkusa ŭkamplektavaŭ svaimi ludźmi kancylaryju prezydenta, a taksama kiraŭnictva Adździełu dziaržaŭnaj biaśpieki. Adzin z aficeraŭ pryznaŭsia, što jahonaje śledztva ŭ spravie «Dujotekana» było začynienaje pavodle zahadu kiraŭnictva tajemnaj palicyi.

U apublikavanych materyjałach kamisii jość taksama pakazańni aficeraŭ, jakija śćviardžajuć, što «Dujotekana» sprabavała nie dapuścić prodaž naftapierahonnaha zavodu ŭ Mažejkach polskamu kancernu «Orlen».

Proźvišča Albinasa Januški prysutničaje amal uva ŭsich dakładach kontravyviedki pra prodaž Mažejek. Pavodle aficeraŭ Adździełu dziaržaŭnaj biaśpieki, Januška chacieŭ, kab zavod kupiła firma z Kazachstanu. Na čale litoŭska‑kazaskaha kancernu musiŭ apynucca ciapierašni litoŭski viceministar haspadarki, jaki taksama naležyć da ludziej Januški.

Kamisija Sojmu ŭžo daŭno patrabavała ad prezydenta Adamkusa zvolnić z pasady kiraŭnika Adździełu dziaržaŭnaj biaśpieki Alvidasa Paciŭsa. Za jahonaje adklikańnie taksama musiŭ hałasavać parlament, ale ŭ apošniuju chvilinu ad hałasavańnia «za» adchiliłasia bolšaść deputataŭ z partyi centrystaŭ i levych.

Paciŭs zastaŭsia na pasadzie, adnak adpomściŭ tym, što vyjaviŭ dakumenty, jakija pavinny byli śviedčyć pra raniejšaje supracoŭnictva kiraŭnika kamisii Sojmu ŭ spravach biaśpieki z KHB. Apošniaja publikacyja dakumentaŭ śledztva jość akurat adkazam na hety krok Paciŭsa.

Клас
0
Панылы сорам
0
Ха-ха
0
Ого
0
Сумна
0
Абуральна
0

Chočaš padzialicca važnaj infarmacyjaj ananimna i kanfidencyjna?