Ministr sportu i turyzmu Aleh Kačan u razmovie z žurnalistami nazvaŭ niaŭdałym vynikam 14-je miesca chakiejnaj zbornaj Biełarusi na čempijanacie śvietu, addaŭ na vodkup śpiecyjalistam acenku raboty trenierskaha štaba nacyjanalnaj kamandy Kary Chejkili i zajaviŭ ab niepaźbiežnaści skaračeńnia kolkaści lehijanieraŭ u minskim «Dynama».

«30 maja adbudziecca pašyranaje pasiadžeńnie vykankama Fiederacyi chakieja Biełarusi, na jakim buduć dadzienyja acenki vystupleńnia našaj kamandy.

Što datyčycca asabista majho mierkavańnia, to vynik, viadoma, niaŭdały.
Što rabić z trenierskim štabam? Pa hetym pytańni ŭ ŚMI ŭžo vykazvalisia i sami spartsmieny, i śpiecyjalisty. Ja nie znachodziŭsia ŭnutry trenierskaha štaba, tamu mahu mierkavać ab jaho rabocie tolki pa vyniku. Nakont taho, ci było štości prahresiŭnaje pryŭniesiena novym trenieram Kary Chiejkila, heta treba razmaŭlać sa śpiecyjalistami i niepasredna chakieistami, jakija pracavali pad kiravańniem roznych trenieraŭ — jak našych, tak i zamiežnych. Jany, napeŭna, daduć bolš realnuju acenku», — miarkuje Aleh Kačan.

Hod tamu pad kiraŭnictvam biełaruskaha śpiecyjalista Eduarda Zankaŭca zbornaja Biełarusi zaniała na čempijanacie śvietu 14-je miesca. Takoha ž vyniku nacyjanalnaja družyna dasiahnuła i ciapier, ale pad kiraŭnictvam užo finskaha nastaŭnika. Aleh Kačan prakamienciravaŭ efiekt ad pierastanoŭki na kapitanskaj pasadzie: «Treba adznačyć, što i ŭ hetym hodzie ŭ štab uvachodzili biełaruskija śpiecyjalisty, naprykład, toj ža Alaksandr Andryjeŭski, jaki pracavaŭ i ŭ kamandzie Zankaŭca. A naohuł prymaŭku ab tym, što vyjhrajuć chakieisty, a prajhraje trenier, nichto nie admianiaŭ.

Kali suma nie źmianiajecca, značyć, u składajemych chtości vinavaty».

Pavodle słoŭ ministra, admoŭny ŭpłyŭ na vystupleńnie zbornaj Biełarusi zrabiła i zanadta vialikaja kolkaść lehijanieraŭ u minskim «Dynama», chakieistami jakoha napałavinu ŭkamplektavana nacyjanalnaja družyna. «Moža, i heta paŭpłyvała. Jašče napiaredadni čempijanatu śvietu było pryniata rašeńnie ab tym, kab trenier nacyjanalnaj kamandy Kary Chiejkila ŭznačaliŭ i bazavy kłub zbornaj. Spadziajusia, heta dapamoža ŭ budučym atrymać toj vynik, jakoha my čakajem siońnia. Ci možna havaryć ab tym, što ciapier „Dynama“ pierahledzić kolkaść lehijanieraŭ u bok źmianšeńnia? Liču, u nas inšaha vybaru prosta niama.

Kab nacyjanalnaja zbornaja hulała macniej, my pavinny rychtavać dla jaje hulcoŭ u turniry takoha vysokaha ŭzroŭniu, jak KCHŁ, kab chakieisty hulali zładžana, razumieli adzin adnaho. Važna, kab padrychtoŭka viałasia ŭ adzinym klučy.
Choć, viadoma, našy balelščyki čakajuć vysokaha vyniku nie tolki ad nacyjanalnaj zbornaj na čempijanacie śvietu, ale i pośpiechaŭ minskaha „Dynama“ ŭ KCHŁ. Bo heta adzin z samych naviedvalnych kłubaŭ u Jeŭropie, i jaho nievyraznaja hulnia moža źnizić cikavaść z boku balelščykaŭ, jakija iduć na „Minsk-Arenu“ za stanoŭčymi emocyjami», — skazaŭ Aleh Kačan.

Na prośbu žurnalistaŭ udakładnić, jakuju kolkaść lehijanieraŭ u minskim «Dynama» Aleh Kačan ličyć prymalnaj, ministr adkazaŭ: «Ab hetym užo było skazana kiraŭnikom dziaržavy.

U 2012–2013 hadach my pavinny vyjści na kolkaść 5–6 zamiežnych hulcoŭ, nie bolš.
Skažacie, užo kala 10 lehijanieraŭ majuć kantrakty na majučy adbycca siezon? Ja jak člen nahladalnaha savieta minskaha „Dynama“ mahu skazać, što my hetu temu jašče nie zakryli.
U bližejšy čas pytańnie budzie razhledžana, i pryniata rašeńnie».

Hod tamu aceńvajučy vystupleńnie biełaruskich chakieistaŭ na čempijanacie śvietu-2011, Aleh Kačan stroha i emacyjanalna raskrytykavaŭ nizkuju samaaddaču hulcoŭ. Hetym razam ministr byŭ miakčejšy ŭ acenkach. «Ja hladzieŭ usie hulni našaj kamandy. Samaaddača i ŭzrovień patryjatyzmu, ja navat tak skazaŭ by, byli vyšejšyja, čym u minułym hodzie. Prynamsi, u mianie takoje mierkavańnie skłałasia, asabliva pa matčy suprać zbornaj Finlandyi, dy i suprać inšych mocnych kamand. Tak, u matčy sa Słavakijaj uščent pravalili druhi pieryjad, ale ž słavaki ŭ vyniku stali finalistami čempijanatu śvietu. Vidavočnym lidaram na hetym čempijanacie śvietu była Rasija, ale ž Słavakija vybiła z płej-of takoha mocnaha sapiernika, jak kanadcaŭ, rodapačynalnikaŭ chakieja. Tym nie mienš, źmiakčalnych abstavin niaŭdałaha vystupleńnia ja nie baču. Kali b trenierski štab taktyčna spracavaŭ niedzie bolš prafiesijna, to vynik byŭ by vyšejšy. Niachaj nie trapili b u pieršuju vaśmiorku, ale ŭvajšli b choć dziasiatku. Heta byŭ by ŭžo krok napierad» , — adznačyŭ ministr sportu.

Kamientujučy samavolny adjezd Andreja Miezina z nacyjanalnaj zbornaj pa chodu čempijanatu śvietu,

Aleh Kačan ustrymaŭsia ad rezkich acenak.
«Asabista z Andrejem ja pakul nie razmaŭlaŭ. Viedaju, što ź im užo havaryli kiraŭniki „Dynama“, u bližejšy čas ź Miezinym parazmaŭlaje i staršynia fiederacyi chakieja Jaŭhien Varsin. Spadziajusia, paśla hetaha ŭdasca vyśvietlić, što stała pryčynaj jaho ŭčynku. Źmiakčalnyja akaličnaści? U svoj čas jon šmat zrabiŭ dla nacyjanalnaj zbornaj, dla krainy. Ale pakul ja nie razumieju, što pasłužyła padstavaj dla adjezdu z raźmiaščeńnia zbornaj u čas čempijanatu śvietu ŭ Chielsinki».
Клас
0
Панылы сорам
0
Ха-ха
0
Ого
0
Сумна
0
Абуральна
0

Chočaš padzialicca važnaj infarmacyjaj ananimna i kanfidencyjna?