Mikałaj Karyšaŭ pracuje na «Hranicie» ŭ čyhunačnym cechu pahruzki. Kantrakt u jaho skančajecca 4 traŭnia. Jon pierakanany, što zvalniajuć jaho z-za prynaležnaści da prafsajuzu:

«Mnie paviedamili, što kantrakt nie padaŭžajuć z-za dyscyplinarnych spahnańniaŭ. Faktyčna za miesiac ja atrymaŭ až try spahnańni.

Za siem hadoŭ nie było nivodnaha spahnańnia, a tut adrazu try za miesiac.
Kali mnie vypisvali hetyja spahnańni, to ja kazaŭ načalniku, što heta naŭmysna robicca, kab padvieści pad zvalnieńnie. A jon siadzić, uśmichajecca i narmalna heta…», — kaža Karyšaŭ.

Mikałaj Karyšaŭ adznačaje, što jamu navat nie pradstavili kopii papier ab dyscyplinarnych spahnańniach. Z zapytam jon źviartaŭsia da administracyi.

«Adnak mnie paviedamili, što ich vydaduć mnie tolki pavodle rašeńnia sudu. Zrazumieła, što ja budu padavać u sud. Budu pisać i ŭ prakuraturu, što ŭ adnosinach da mianie prymianiajuć dyskryminacyju pavodle prynaležnaści da prafsajuzu», — kaža Karyšaŭ.

Kiraŭnik supołki niezaležnaha prafsajuzu na «Hranicie» Aleh Stachajevič, taksama niadaŭna zvolnieny z pradpryjemstva, kaža, što prafsajuz budzie baranić svajho siabra:

«Kryŭdzić Mikałaja my nie dazvolim. I naša piarvičnaja arhanizacyja, i Biełaruski niezaležny prafsajuz, i Biełaruski kanhres demakratyčnych prafsajuzaŭ stanuć na jaho abaronu.
U nas jość baza dokazaŭ ab falsyfikacyjach hetych dyscyplinarnych spahnańniaŭ. Tamu ŭ sudzie my budziem baranić jaho pravy."

Spadar Stachajevič kaža, što padobnaja sprava rychtujecca suprać jašče adnaho siabra niezaležnaha prafsajuzu — Hienadzia Paŭłoŭskaha: «I na jaho zaraz falsyfikujuć dakumenty ab dyscyplinarnym spahnańni. Jaho siońnia vyklikali, i, jak ja razumieju, sprabujuć padvieści pad prahuł. Chacia jon adsutničaŭ pa poźvie ŭ Łunincy, z čym načalstva było aznajomlena. U poźvie było paznačana, što jon tam znachodziŭsia z 10-j da 16-j hadziny. Tym nie mieniej, suprać jaho fabrykujuć dakumenty."

Pry kancy 2011 hodu niekalki socień pracaŭnikoŭ pradpryjemstva pa zdabyčy budaŭničaha kamieniu «Hranit» u Mikaševičach (Bieraściejskaja vobłaść) napisali zajavy, što vychodziać z aficyjnaha prafsajuzu. Takim čynam jany vykazali pratest suprać pamieru zarobkaŭ, pahardlivaha staŭleńnia z boku administracyi i biaździejańnia aficyjnaha prafsajuzu.

Rabočyja abviaścili, što stvarajuć na pradpryjemstvie supołki Biełaruskaha niezaležnaha prafsajuzu. Adrazu ž siabry niezaležnaha prafsajuzu pačali adznačać cisk z boku administracyi.

Клас
0
Панылы сорам
0
Ха-ха
0
Ого
0
Сумна
0
Абуральна
0

Chočaš padzialicca važnaj infarmacyjaj ananimna i kanfidencyjna?