Top-5 inviestycyjnych pravałaŭ minskich uładaŭ 6

Čym hučniej abiacańni, tym bolšaja vierahodnaść, što jany nie buduć vykananyja. Mienavita tak davodzicca ŭsprymać inviestycyjnyja damovy, jakija hod za hodam zaklučajuć minskija ŭłady.

Šmatmiljardnyja kantrakty ŭ rešcie rešt akazvajucca pustyškami.

A dziaržava pačynaje pošuk čarhovaha inviestara, kab praz hod ci dva raźvieści ruki ŭ baki — dziełavy partnior znoŭ «kinuŭ». «Naša Niva» ŭzhadała samyja ambitnyja prajekty haradskich uładaŭ, jakija na vychadzie skončylisia hučnym pšykam.

"Minsk-Sici"

Dysnejłend

Stadyjon "Traktar" Uładzimira Ramanava

"Itera-Tauerz"

"Majak Minska"

1. Minsk-Sici

Prajekt pabudovy hihanckaha biznes-rajona mieŭ niekalki varyjantaŭ vykanańnia — ad biełaruskaha da hałandskaha, ale što pra ich raskazvać, kali ideja źviałasia da pabudovy niekalkich panelek na ŭskrainie vydzielenaj placoŭki? Hod za hodam uhasała i abiacanyja abjomy finansavańnia «budoŭli stahodździa».

U pieršych paviedamleńniach pra «Minsk-Sici» ŭ 2007 hodzie milhała ličba "$30 miljardaŭ", a praz paru hadoŭ nazyvalisia ŭžo $5 miljardaŭ.

Inviestar — rasijska-turkmienskaja «Itera» — byŭ hatovaja karmić ułady abiacankami i dalej, ale paśla čarhovaha kitajskaha papiaredžańnia kantrakt byŭ razarvany ŭ adnabakovym režymie. I choć staršynia harvykankama Mikałaj Ładućka z honaram zajaŭlaje, što maje šerah zvarotaŭ inšych inviestycyjnych kampanij z roznych krain, hodnych kandydataŭ tam naŭrad ci sustrenieš. Suśvietnyja karparacyi pakul abychodziać Biełaruś bokam, a ŭłasnymi siłami taki prajekt nie realizuješ.

2. Biełaruski Dysnejłend

Historyja hetaha prajektu jašče bolš markotnaja. Jak ni šukali,

achvotnych ukłaści $917 miljonaŭ u park zabavak pad Łahojskam tak i nie znajšłosia.

Park dynazaŭraŭ, zamak Śniežnaj karalevy i honačnaja trasa pryhoža vyhladali tolki na papiery.

Ideju minčukoŭ pierachapiŭ staršynia Viciebskaha abłyvykankama Alaksandr Kosiniec, jaki vyrašyŭ budavać vializny park kala abłasnoha centra. Ale i hety prajekt nie zacikaviŭ nivodnaha inviestara.

3. Spartyŭnaja impieryja Uładzimira Ramanava

Litoŭski bankir Uładzimir Ramanaŭ naabiacaŭ załatyja hory jašče papiaredniamu staršyniu Minskaha harvykankama Michaiłu Paŭłavu. Zhodna z ahučanymi płanami,

da kanca 2011 hoda na miescy stadyjona «Traktar» musiła paŭstać 45-tysiačnaja futbolnaja arena z hatelem pobač.

Litoviec spačatku źbiraŭsia budavać mienšy pa źmiaščalnaści stadyjon, ale na słovach pahadziŭsia z prośbami minskich uładaŭ. Čas išoŭ, a pracy tak i nie pačynalisia. U vyniku jon nie vykanaŭ ni pieršaje, ni druhoje abiacańnie. Sioleta Ramanaŭ kančatkova spyniŭ finansavańnie minskaha futbolnaha kłuba «Partyzan», jakim vałodaŭ, i ciapier nijakich spraŭ ź Biełaruśsiu mieć nie choča. A spartyŭna-zabaŭlalny kompleks za 250 miljonaŭ jeŭra zastaniecca šukać novaha inviestara.

4. «Itera Tauerz»

Naftavaja kampanija «Itera» zastaniecca ŭ pamiaci minskich uładaŭ nie tolki jak niaŭdały kampańjon pa zhornutamu budaŭnictvu «Minsk-Sici». Jašče adzin prajekt, budaŭnictva pieršych ŭ historyi Biełarusi chmaračosaŭ kala stancyi mietro «Frunzienskaja», taksama padychodzić da svajho zaŭčasnaha finała.

Ideja stvareńnia dźviuch hihanckich kruhłych viežaŭ pa 50–60 pavierchaŭ transfarmavałasia ŭ budaŭnictva 32-paviarchovaha žyłoha doma, dahetul niaskončanaje.

Padčas minułahodniaha deficytu budmateryjałaŭ budoŭla całkam spyniłasia na niekalki miesiacaŭ. Ciapier pracy nad domam patrochi iduć, ale ad tempaŭ prodažu kvateraŭ «Itera» daloka nie ŭ zachapleńni.

Radujucca tolki žychary susiednich damoŭ, jakija ŭ svoj čas zmahalisia suprać architekturnaha «voraha». Vajavać nie daviałosia — inviestar sychodzić sam.

5. «Majak Minska»

Budaŭnictva futurystyčnych chmaračosaŭ z renderaŭ «Majaka Minska» adkłałasia na niavyznačany termin. Ale navat kali ruki budaŭnikoŭ dojduć na ich, to raniejšyja płany nichto realizoŭvać nie budzie. Heta ŭ 2008 hodzie dla taho, kab załahodzić minskija ŭłady, nikomu nie viadomy inviestar «Zomieks Inviestmient» abiacaŭ patracić $4 miljardy i pastavić kala Nacyjanalnaj biblijateki viežu na 80 pavierchaŭ vyšynioj 300 mietraŭ. A pobač ź joj na renderach byli namalavanyja vosiem 40-paviarchovych damoŭ.

Ciapier patencyjny prajekt «usoch» da 35 pavierchaŭ, ale inviestar nie realizuje i jaho. Adzin za adnym zdajucca ŭ ekspłuatacyju tolki dziesiacipaviarchovyja žyłyja damy z pryhožymi nazvami «Rembrandt», «Van Hoh» i «Mane», ale heta, vidavočna, daloka nie toje, čaho čakali minskija ŭłady.

***

Śpis daloka nie poŭny. Pravalvalisia i mnohija inšyja zadumy — budaŭnictva žyłoha kompleksa «Suzorje» na miescy kinastudyi «Biełaruśfilm», uźviadzieńnie stadyjona z Nacyjanalnym vystavačnym centram u Ščomyślicy… Vyklikajuć padazreńnie, naprykład, i dziejańni amancaŭ, jakija zadarma atrymali elitny ŭčastak na vulicy Janki Kupały, a ciapier adciahvajuć budaŭničyja pracy miesiac za miesiacam. A ŭłady, pryčym nie tolki minskija, ale i respublikanskija, nienavučanyja horkim vopytam, praciahvajuć biehčy za lubym inviestaram, chaj i kamičnym, jaki abiacaje stvaryć na terytoryi stalicy N'ju-Vasiuki.

Jahor Marcinovič

Chočaš padzialicca važnaj infarmacyjaj ananimna i kanfidencyjna? Pišycie redaktaru «Našaj Nivy» ŭ TH