20 krasavika ŭ pasolstvie Ukrainy ŭ Biełarusi prajšła kanfierencyja «25 hod Čarnobylskaj trahiedyi. Uroki i aktualii».
Kanfierencyja abjadnała ekśpiertaŭ, pradstaŭnikoŭ dypłamatyčnych słužbaŭ i žurnalistaŭ ź Minska, Vilni i Kijeva. Arhanizavała jaje pry padtrymcy pasolstva Ukrainy Biełaruskaja asacyjacyja žurnalistaŭ. Biełaruski bok pradstavili kandydat techničnych navuk z Abjadnanaha instytutu enierhietyčnych i jadziernych daśledavańniaŭ «Sosny» Barys Papoŭ, dacent Mižnarodnaha dziaržaŭnaha ekałahičnaha ŭniviersytetu imia Sacharava Andrej Cimoščanka, načalnik Departamientu MNS Valancin Ancipienka, doktar techničnych navuk, prafiesar, likvidatar avaryi na ČAES Hieorhi Lepin, teležurnalist, aŭtar filmaŭ pra Čarnobyl Pavieł Šaŭčuk i žurnalist, siabra BAŽ Anatol Hatoŭčyc. Z Kijeva dasłaŭ videaintervju prafiesar Jury Bandažeŭski. Litoŭski bok pradstavili daradca adździełu palityki enierhietyčnaj biaśpieki MZS Litvy Vilijus Samujła, namieśnik staršyni partyi «Ruch “zialonych” Litvy» Saulus Łapinis, dyrektar departamienta jadziernaj biaśpieki pry Dziaržinśpiekcyi pa biaśpiecy jadziernaj enierhietyki Sihitas Šlapavičus, dyrektar departamienta źniešnich suviaziej budučaj Visahinskaj AES Rymantas Vajtkus.
Pieršym słova ŭziaŭ pasoł Ukrainy ŭ Biełarusi Raman Biaśśmiertny. Jon pryhadaŭ svaju studenckiu maładość, kali jamu daviałosia ŭdzielničać u evakuacyi žycharoŭ paciarpiełych ad avaryi na ČAES terytoryj.
«Nielha davać amaralnym ludziam takuju strašnuju zbroju, navat kali jana słužyć mirnym metam. Jak možna było zdavać AES daterminova, prymiarkoŭvać jaje pusk da niejkaj daty?»
Udzielniki kanfierencyi padzialilisia na prychilnikaŭ i praciŭnikaŭ pabudovy AES u Astraŭcy, a taksama na tych, chto nie suprać raźvićcia atamnaj enierhietyki ŭ Biełarusi, ale ličyć heta niemahčymym pakul pry ŭładzie znachodzicca Łukašenka. Hetaj dumki prytrymlivajucca eks-śpikier Viarchoŭnaha Savieta, prafiesar Stanisłaŭ Šuškievič, a taksama były deputat VS SSSR, hramadski dziejač Mikałaj Pietrušenka.
Navukoŭcy Barys Papoŭ i Andrej Cimoščanka davodzili, što pabudova ŭłasnaj AES adpaviadaje intaresam biełaruskaha naroda, ale tak i nie zdoleli pierakanać apanientaŭ, čamu dla pabudovy stancyi byŭ abrany mienavita Astraviec.Jany pryznali, što ad Akademii navuk pytańnie kančatkovaha zaćviardžeńnia kankretnaj placoŭki nie zaležała, a Astravieččyna, nibyta, pryvablivaje budaŭnikoŭ AES nadziejnyn hruntam. Pytańnie pra toje, ci nie ŭjaŭlaje saboj niebiaśpieku hety rehijon, jaje siejsmaniebiaśpiečny, zastałosia biez adkazu.
Kateharyčna suprać pabudovy AES u Biełarusi vykazaŭsia prafiesar Bandažeŭski, apošnija daśledvańni jakoha śviedčać pra pavieličeńnie kolkaści ciažkich zachvorvańniaŭ u biełarusaŭ.Z krytykaj na adras inicyjataraŭ pabudovy Asravieckaj AES vystupili Hieorhi Lepin i Pavieł Šaŭčuk. Prafiesar Lepin vykazaŭ sumnieŭ, što Biełaruś zdoleje zabiaśpiečyć budučuju stancyju ŭłasnym piersanałam, a tamu varta rychtavacca da taho, što nam ad jaje zastaniecca tolki hałaŭny bol ad nieabchodnaści zachoŭvać niebiaśpiečnyja adkidy.
Pradstaŭniki litoŭskaha boku ŭ cełym nie suprać najaŭnaści ŭ biełarusaŭ «atamnych ambicyj», ale, pa słovach litoŭcaŭ, realizoŭvać ich nam treba ŭ 30 km ad svajoj stalicy, a nie pobač ź Vilniaj.
Pradstaŭnik litoŭskaha MZS Vilijus Samujła byŭ najbolš kateharyčnym. Pa jaho słovach, kali Biełaruś nie źmienić płanaŭ nakont Astraŭca, to dvuchbakovyja stasunki buduć tolki paharšacca.Ź Litvy prahučaŭ napamin, što AES, jakija nie majuć anałahaŭ u śviecie nielha budavać pobač z hustanasielenymi pasieliščami. A ŭ vypadku ź biełaruskaj stancyjaj havorka akurat pra taki varyjant.
Naprykancy kanfierencyi jaje arhanizatary vykazali spadzieŭ, što padobnyja sustrečy buduć ładzicca i nadalej.
