Nielehalny biznes, pavodle dadzienych rasijskaha boku, pastaŭleny na šyrokuju nahu. «Abjomy pradukcyi, što ŭvozicca, nosiać całkam pramysłovy charaktar»,
 — zajaviŭ u sieradu kiraŭnik Rasspažyŭnahladu, hałoŭny dziaržaŭny sanitarny doktar RF Hienadź Aniščanka.

Nielehalnyja pastaŭki, jak pakazała rasśledavańnie, ažyćciaŭlalisia na terytoryju RF ź Biełarusi, majučy akcyznyja marki, z ukazańniem imparciora z RB — TAA «Kłasičnyja viny», piša rasijskaja hazieta «Vzhlad».

U Rasii ŭžo niekalki hadoŭ dziejničaje zabarona na pastaŭki vinaŭ i minieralnaj vady z Hruzii. Jana była ŭviedzienaja praz pretenzii da jakaści.

Aniščanka skazaŭ, što kantrafaktnyja partyi «Baržomi» vyjavili orhany Dziaržepidnahladu padčas kantrolna-nahladnych mierapryjemstvaŭ na charčovych rynkach u rehijonach i, pierš za ŭsio, u Maskvie.

«Akramia taho, vyjaŭlenyja butelki tolki z nacyjanalnymi etykietkami biez akcyznych marak, jakija praź nieefiektyŭnuju pracu mytnych słužbaŭ kantrabandna zavoziacca na terytoryju Rasii, schavanyja pad aharodninnaj pradukcyjaj i sadavinoj», — skazaŭ Aniščanka.

«Niahledziačy na sumiesnuju pracu z kalehami ź Biełarusi, mabyć, prymanych mieraŭ niedastatkova», — zajaviŭ jon.

Hienadź Aniščanka skazaŭ, što ź biełaruskaj kampanijaj, jakaja nielehalna pastaŭlaje hruzinskuju minieralnuju vadu, buduć «raźbiracca pa ŭsich siehmientach biznesu, jakija jość u hetaha pradpryjemstva ŭ Rasijskaj Fiederacyi».

«Što da krainy, što pastaŭlaje hety falsifikat u Rasijskuju Fiederacyju, to jana apošnim časam asabliva hanaryłasia svaim siabroŭstvam u SHA i zachavańniem usialakich praviłaŭ», — skazaŭ Aniščanka, majučy na ŭvazie Hruziju.

«Mabyć, jak i varta było čakać, heta ŭsiaho tolki biespadstaŭnaja demahohija najvyšejšych słužbovych asobaŭ dadzienaha nacyjanalna-terytaryjalnaha ŭtvareńnia»,
 — skazaŭ kiraŭnik Rasspažyŭnahlada.

Jon zajaviŭ, što administracyi rasijskich rynkaŭ, na jakich byli vyjaŭlenyja nielehalnyja partyi «Baržomi», buduć pradjaŭlenyja pretenzii. «Hetyja miery nie buduć spryjać farmavańniu imidžu dobrasumlennych pradprymalnikaŭ, jakija vykonvajuć rasijskaje sanitarnaje zakanadaŭstva», — skazaŭ Aniščanka.

Na pytańnie pra toje, ci moža ŭ pierśpiektyvie hruzinskaja minieralnaja vada viarnucca na rynak RF, Aniščanka adkazaŭ: «Usio moža być. Umovy nieadnarazova nazyvalisia. Ale nie kryminalnym šlacham — heta nie zasłuhoŭvaje zaachvočvańnia».

Raniej kiraŭnik Rasspažyŭnahlada skazaŭ, što hruzinskaje vino i minieralnaja vada mohuć viarnucca na rasijski rynak, kali projduć usie pracedury kantrolu jakaści i dopusku.

Клас
0
Панылы сорам
0
Ха-ха
0
Ого
0
Сумна
0
Абуральна
0

Chočaš padzialicca važnaj infarmacyjaj ananimna i kanfidencyjna?