A taksama pavialičyć termin pražyvańnia ŭ Minsku da 10 hadoŭ dla pastanoŭki na čarhu.Minharvykankam prapanuje źnizić u stalicy kryter patreby ŭ žylli dla pastanoŭki na čarhu z 15 da 10 kv.m na adnaho čałavieka. Taksama prapanujecca pavialičyć termin pražyvańnia ŭ Minsku z 5 da 10 hadoŭ dla atrymańnia prava pastanoŭki na čarhu. Pra heta paviedamiŭ staršynia Minharvykankama Mikałaj Ładućka siońnia padčas naŭprostaj linii z nasielnictvam stalicy.
Mer stalicy kanstatavaŭ, što ŭ Minsku čarha tych, chto maje patrebu ŭ palapšeńni žyllovych umovaŭ źjaŭlajecca samaj vialikaj u Biełarusi — kala 280 tys. čałaviek. Tamu ŭźnikła nieabchodnaść praanalizavać pryčynu jaje rezkaha rostu.
Za 10 hadoŭ u Minsk pryjechała kala 180 tys. čałaviek, u tym liku 160 tys. čałaviek z rehijonaŭ krainy i 20 tys. inšaziemcaŭ. «Naturalna, absalutnaja bolšaść hetych ludziej stała na čarhu», — skazaŭ Mikałaj Ładućka.
Minharvykankam praanalizavaŭ situacyju ŭ bujnych haradach krain SND. «My vyjšli na rašeńnie, što pryncypova pazicyi pa kryterach patreby z savieckich časoŭ tam nie pierahladalisia», — adznačyŭ staršynia Minharvykankama.
Pavodle jaho słovaŭ, harvykankam unios prapanovy źnizić kryter patreby i pavialičyć termin pražyvańnia ŭ Minsku dla pastanoŭki na čarhu. «Ale kančatkovaje rašeńnie jašče nie pryniataje», — zaŭvažyŭ mer Minska.
Razam z tym, Mikałaj Ładućka padkreśliŭ, što ciapierašniuju čarhu ŭ stalicy «nichto kasavać nie budzie».
Što da inšych miechanizmaŭ nakiravańnia na budaŭnictva žylla ź dziaržpadtrymkaj, to tut mahčymyja varyjanty, ličyć mer stalicy. Tak, u liku čarhavikoŭ 40 tys. siemjaŭ pražyvajuć u internatach, a 20 tys. siemjaŭ nie majuć va ŭłasnaści nivodnaha kvadratnaha mietra. «Akramia hetaha, my prapanoŭvali ŭličvać nieruchomaść minčukoŭ, jakuju jany majuć u Minskim rajonie. A siońnia ŭ Minskim rajonie va ŭłasnaści žycharoŭ stalicy bolš za 9 młn kv.m nieruchomaści. Heta nie dačnyja domiki, a damy», — adznačyŭ staršynia Minharvykankama.
«Tamu pytańnie znachodzicca ŭ stadyi abmierkavańnia, kab pryniać aptymalnaje rašeńnie», — skazaŭ Mikałaj Ładućka. Jon taksama dadaŭ, što ŭ 2011 hodzie ŭ Biełarusi pavinien zapracavać zakon ab ipatecy.
