«Padazravany na pieršym ža dopycie daŭ pryznalnyja pakazańni. Jon zajaŭlaje, što ažyćciaviŭ vybuch u Viciebsku ŭ vieraśni 2005 hoda, vybuch na praśpiekcie Pieramožcaŭ 3 lipienia 2008 h. i vybuch na stancyi mietro «Kastryčnickaja» 11 krasavika 2011 h. «, — skazała krynica.

Pa słovach krynicy, zatrymanaha vyličyli paśla prahladu videamateryjałaŭ na ŭsich stancyjach mietro za papiarednija teraktu niekalki dzion. Vyśvietliłasia, što jon rehularna vychodziŭ ź mietro na stancyi mietro «Frunzienskaja». Na hetaj stancyi było ŭstalavana vonkavaje nazirańnie, supracoŭniki jakoha ŭ aŭtorak ŭbačyli čałavieka, padobnaha na padazravanaha, praviali jaho da miesca žycharstva i vyklikali śpiecpadraździaleńnie MUS «Ałmaz». Zatrymańnie pravodziŭ «Ałmaz».

Na zdymnaj kvatery, dzie pražyvaŭ 25-hadovy padazravany była zatrymanaja maładaja žančyna, jakaja ŭjaŭlajecca jaho «dziaŭčynaj».

U chodzie dopytu padazravany paviedamiŭ, što pieršy terakt jon ździejśniŭ u Viciebsku ŭ vieraśni 2005 hoda. Paśla hetaha, zastaŭšysia biespakaranym, jon adsłužyŭ u biełaruskaj armii. Viarnuŭšysia z vojska, pa jaho słovach, u Internecie znajšoŭ źviestki ab tym, jak zrabić bolš mahutnaje vybuchovaje prystasavańnie, vyrabiŭ jaho i pryvioŭ u dziejańnie 3 lipienia 2008 hoda ŭ Minsku, u dzień śviatkavańnia Dnia Niezaležnaści.

Pavodle słovaŭ padazravanaha, jon zmoh paźbiehnuć abaviazkovaj daktyłaskapii ŭsiaho mužčynskaha nasielnictva Biełarusi, jakaja była praviedziena paśla vybuchu ŭ 2008 hodzie.

Krynica paviedamlaje, što psichijatry ŭžo praviali razmovy z padazravanym.

— Sa słovaŭ psichijatraŭ, jon źjaŭlajecca razumnym. Svaje dziejańni jon tłumačyć zadavalnieńniem, jakoje jamu dastaŭlajuć čałaviečyja pakuty. Psichijatry paraŭnali padazravanaha z kinavobrazam Hanibała Lektara, — skazaŭ surazmoŭca. — Padazravany śćviardžaje, što dziejničaŭ u adzinočku. Palityčnych matyvaŭ svaich dziejańniaŭ jon nie vyłučaje.

Pa nieŭdakładnienych dadzienych, padazravany da słužby ŭ vojsku žyŭ u Viciebsku i pierajechaŭ u Minsk, adbyŭšy terminovuju słužbu.

Клас
0
Панылы сорам
0
Ха-ха
0
Ого
0
Сумна
0
Абуральна
0

Chočaš padzialicca važnaj infarmacyjaj ananimna i kanfidencyjna?