Z-za niapeŭnaści na valutnym rynku aktyŭnaść na druhasnym rynku nieruchomaści za apošnija dva tydni źniziłasia bolš jak na 35%, paviedamiŭ u intervju BiełaPAN dyrektar hrupy kampanij «Tvaja stalica» Uładzimir Davidovič.
Jon rastłumačyŭ, što rynak druhasnaha žylla «tradycyjna pryviazany da dołara, i bolšaść ździełak pravodziacca ŭ valucie». «Pakul situacyja z kursam nie stabilizujecca, pakupniki i pradaŭcy nie zrazumiejuć, da čaho jaho pryviazvać, pakul nie źjavicca svabodnaja kanviersoŭnaść, rynak druhasnaha žylla budzie faktyčna stajać», — zaznačyŭ śpiecyjalist.
Źniziłasia kolkaść ździełak i z pryčyny zhortvańnia kredytavańnia. «Pakupnik vyrašyŭ pačakać», — miarkuje Davidovič. Na jaho dumku, svabodnyja srodki ŭ valucie, jakija byli ŭ nasielnictva, na hety momant u asnoŭnym nakiroŭvajucca na kuplu aŭtamabilaŭ.
Na piarvičnym rynku, zaznačyŭ ekśpiert, budaŭnictva kvater praciahvajecca, a «z realizacyjaj jość prablemy». «Niechta realizuje žyllo, a niechta prytrymlivaje prodaž», — paviedamiŭ Davidovič.
Pavodle jaho słoŭ, u pieršym kvartale «ceny na druhasnym rynku krychu ruchalisia ŭvierch», i pavodle vynikaŭ sakavika siaredniaja cana prapanovy ŭ Minsku dasiahnuła 1.453 dołaraŭ za 1 kv. m, siaredniaja cana ździełki — 1.315 dołaraŭ za 1 kv. m. Pry hetym rynak prademanstravaŭ aktyŭnaść: kolkaść ździełak u paraŭnańni z anałahičnym letašnim pieryjadam pavialičyłasia na 30–40%.
«U hetaj situacyi rabić prahnozy na najbližejšy čas nielha. Prahnazavać možna tolki, kali istotnyja pakazčyki stabilnyja», — zaznačyŭ Davidovič.
