Maładziožnaja kamisija Partyi BNF «Moładź BNF» na svaim V źjezdie, jaki prajšoŭ 9 krasavika ŭ Minsku, vyrašyła skasavać pasadu staršyni arhanizacyi i delehavać kaardynacyjnyja paŭnamoctvy radzie, što budzie źbiracca kožny miesiac.
U mierapryjemstvie ŭziali ŭdzieł 26 delehataŭ sa stalicy i rehijonaŭ. Pieršapačatkova kolkaść udzielnikaŭ musiła być 39, ale častka delehataŭ na źjezd nie pryjechali. Aprača pradstaŭnikoŭ łakalnych supołak «Moładzi BNF» na sustrečy prysutničała kiraŭnictva Partyi BNF, a taksama hości z ukrainskaha «Nacyjanalnaha aljansu».
«Šmat chto da nas dałučajecca va ŭzroście 27–28 hadoŭ, i za niekalki hod jany nie paśpiavajuć daraści, kab pačać rabić partyjnuju karjeru. Taksama šmat chto choča niejkaha drajvu i ŭstupaje ŭ moładzievuju arhanizacyju — my nie možam čałavieka nie pryniać i adpravić u partyju», — adznačyŭ były namieśnik staršyni «Moładzi BNF», a zaraz adzin z pradstaŭnikoŭ rady kamisii Anton Kalinoŭski. Ale delehatami była adchilena papraŭka ab pavieličeńni ŭzrostavaha parohu členaŭ maładziožnaj kamisii Partyi BNF da 33–35 hadoŭ.
Delehaty amal adnahałosna pryniali rezalucyju «Ab salidarnaści z palitźniavolenymi», u jakoj vykazali «hatoŭnaść rabić usio mahčymaje dla vyzvaleńnia palitviaźniaŭ, zatrymanych biełaruskaj milicyjaj i KDB i pryciahnutych da kryminalnaj adkaznaści pa sfabrykavanaj spravie ab masavych biesparadkach 19 śniežnia». Tekstam rezalucyi «Moładź BNF» zaćvierdziła, što arhanizacyja hatova «akazvać kankretnuju dapamohu achviaram režymu dy ich siemjam», a taksama «spryjać pryciahvańniu da adkaznaści ŭsich pradstaŭnikoŭ ułady, jakija pravodziać represiŭnuju palityku režymu».
Udzielniki źjezda taksama pryniali rezalucyju «Ruki preč ad „Vyspy Svabody“ ŭ centry Minsku!», u jakoj patrabujuć «nieadkładnaha skasavańnia palityčnaha matyvavańnia rašeńnia ab spynieńni arendy pamiaškańnia», dzie znachodzicca uprava Partyi BNF. U rezalucyi śćviardžajecca, što ŭdzielniki maładziožnaj kamisija Partyi BNF hatovy raspačać «biesterminovuju akcyju niehvałtoŭnaha supracivu», kali arenda pamiaškańnia nie budzie pradoŭžana.
