Zhodna z sakretnymi dakumientami dziarždepartamienta ZŠA, apublikavanymi sajtam Wikileaks, MAHATE jašče ŭ 2008 hodzie papiaredžvała Japoniju, što jaje atamnyja elektrastancyi nie vytrymajuć udaru mahutnaha ziemlatrusu,
paviedamlaje The Telegraph.

Jak piša hazieta, AES «Fukusima-1», na jakoj spačatku adbyŭsia pažar, a paźniej niekalki vybuchaŭ, mahła vytrymać ziemlatrus mahnitudaj 7,0. Ziemlatrus u Japonii 9 sakavika mieŭ mahnitudu 9,0.

U 2008 hodzie MAHATE abaviazała Japoniju abnavić sistemy biaśpieki AES. Ciapier Japonii daviadziecca dać spravazdaču pierad arhanizacyjaj, ci dastatkova było zroblena dla praduchileńnia vybuchaŭ.

Papiaredžańnie ab niedastatkovaj nadziejnaści japonskich AES prahučała ŭ Tokia padčas sustrečy «vialikaj vaśmiorki» ŭ 2008 hodzie.

Wikileaks cytuje słovy nienazvanaj krynicy, jakaja padčas sustrečy vykazała zaniepakojenaść tym, što sistemy abarony ad ziemlatrusaŭ ASE ŭ Japonii za apošnija 35 hadoŭ abnaŭlalisia ŭsiaho try razy.

«Jon (pradstaŭnik MAHATE) rastłumačyŭ, što MAHATE ciapier zajmajecca pierahladam sistemy biaśpieki AES, jakija za apošnija 35 hadoŭ abnaŭlalisia Japonijaj usiaho try razy», — havorycca ŭ telehramie amierykanskaha čynoŭnika.

Taksama tam paviedamlajecca, što Japonija vystupiła suprać sudovaha rašeńnia pra zakryćcio AES na zachadzie krainy, jakaja, pavodle pravierki, nie mahła vytrymać udaru ziemlatrusu.

«Japonskaje ahienctva pa jadziernaj biaśpiecy zajaviła, što ŭsie nieabchodnyja abnaŭleńni byli praviedzienyja, i reaktar na AES funkcyjanuje ŭ narmalnym režymie», — havorycca ŭ telehramie. Japonija admianiła pastanovu suda ŭ 2009 hodzie.

Akramia hetaha, u kampramacie Wikileaks pryvodziacca słovy japonskaha parłamientaryja Tara Kana, jaki ŭ kastryčniku 2008 hoda ŭ hutarcy z amierykanskimi dypłamatami paviedamiŭ, što japonski ŭrad chavaje dadzienyja ab niaštatnych situacyjach na japonskich AES.

Клас
0
Панылы сорам
0
Ха-ха
0
Ого
0
Сумна
0
Абуральна
0

Chočaš padzialicca važnaj infarmacyjaj ananimna i kanfidencyjna?