2-hi Festyval biełaruskamoŭnaj reklamy i kamunikacyj AD.NAK! ad siońniašniaha dnia raspačynaje pryjom konkursnych pracaŭ. Pracy buduć prymacca da 6 červienia. Asnoŭny festyvalny dzień padviadzieńnia vynikaŭ — 23 červienia. Konkursnaja prahrama 2011 hodu budzie značna pašyranaja za košt novych temaŭ i kirunkaŭ.

Metaj pieršaha festyvalu AD.NAK! było imknieńnie akreślić stanovišča biełaruskamoŭnaj reklamy i sabrać maksymalnuju kolkaść pracaŭ i ŭdzielnikaŭ. Na konkurs było padadziena 105 rabot 59 udzielnikaŭ, u konkursie maładych reklamistaŭ — 15 rabot ad 9 udzielnikaŭ i kamandaŭ. Viadoŭca imprezy zaŭvažyŭ:

«Arhanizatary źjaŭlajucca vialikimi aptymistami, bo jany pracujuć na perspektyvu. U krainie, dzie ŭvohule z reklamaj nia husta, pravodzić festyval biełaruskamoŭnaj reklamy — heta hieraizm. Ale reklama i kamunikacyi na biełaruskaj movie jość».

U pieršym feście brali ŭdzieł i ŭsiaśvietna viadomyja brendy — Samsung, Renault, Ceresit. Na prezentacyi byli prademanstravanyja najlepšyja videa- i aŭdyjoroliki, plakaty, lahatypy, pradstaŭleny pieramožcy ŭ roznych naminacyjach. Pa vynikach vypuścili buklet. Kaardynatar kampanii «Budźma» Alena Makoŭskaja miarkuje:

«Pavodle acenak „Marketing.by“, pracaŭ sioleta budzie nia mienš, čym na minułym festyvali. My na heta spadziajemsia. Nam vielmi cikavaja sytuacyja, bo my publikavali vyniki sacyjalahičnaha daśledavańnia: 37% biełarusaŭ ličać, što reklama pavinna być pieravažna pa-biełarusku. I hetaja infarmacyja byccam by niedzie „zavisła ŭ pavietry“: ci jaje nia čujuć, ci nia chočuć niejkim čynam asensoŭvać. Tamu my ŭsio ž taki imkniemsia pryjści da ludziej i pakazać, što sapraŭdy biełaruskaja mova jość vielmi jakasnym instrumentam kamunikacyjaŭ, jana źviartaje na siabie ŭvahu, jana ŭsprymajecca absalutna dobra i pazytyŭna spažyŭcami».

Sioleta festyval biełaruskamoŭnaj reklamy AD.NAK! atrymaŭ lahičny praciah i raźvićcio. Razam sa zvyčajnaj reklamaj i PR značnaja ŭvaha budzie nadavacca pracam, skiravanym na papularyzacyju roznych kulturnickich prajektaŭ, kaža kiraŭnik internet-resursu «Marketing.by» Siarhiej Skarachod:

«My naŭmyśla ŭziali kren u bok roznych kulturnickich prajektaŭ, usiaho, što źviazana z kulturaj i mastactvam. My chočam, kab vakoł festyvalu ciaham hetych troch miesiacaŭ adbyvałasia burnaje žyćcio, jarkija padziei, jakija b załučyli maładych reklamistaŭ».

Sioleta značnaja pašyryłasia kolkaść naminacyjaŭ u katehoryjach «Internet-reklama», «Reklamnyja PR-kampanii, proma-akcyi dy inšyja prajekty». Aproč reklamy i pramocyi, u feście voźmuć udzieł inšyja kamunikatyŭnyja prajekty: fotaplenery, vystavy, vydavieckija, kina-, videa-, teatralnyja pastanoŭki, kulturnickija, hramadzkija prajekty. Upieršyniu budzie dziejničać admysłovaja naminacyja «Biełaruskaaryjentavanaja reklama i kamunikacyja», jakaja źviartaje ŭvahu na vykarystańnie asablivaściaŭ biełaruskaj kultury, historyi, tradycyjaŭ i mentalnaści biełarusaŭ. Alena Makoŭskaja kaža:

«Sioleta symbalem našaha festyvalu budzie nie adzin kličnik, a šmat. Našy kličniki — heta svojeasablivaja metafara. Z adnaho boku, heta toje, što robiać markietolahi, reklamisty. Ź inšaha boku — heta naša žadańnie spraŭdzić svaje mety — zrabić biełaruskamoŭnuju reklamu pryvabnaj, pryciahalnaj i dziejsnaj».

A dla tych, chto abyjakava stavicca da svaich karanioŭ, ustanoviać antypremiju «Kaša suvoraŭskaja» — joju adznačać najbolš nieprafesijnyja pracy i padychody ŭ reklamie.

Клас
0
Панылы сорам
0
Ха-ха
0
Ого
0
Сумна
0
Абуральна
0

Chočaš padzialicca važnaj infarmacyjaj ananimna i kanfidencyjna?