Nacyjanalny akademičny Vialiki teatr opiery i baleta pačaŭ pracu nad pastanoŭkaj opiery «Aida», paviedamiŭ na pres-kanfierencyi 15 sakavika pieršy namieśnik hienieralnaha dyrektara teatra Uładzimir Ryłatka.

Pavodle jaho słoŭ, u «Aidzie» buduć vykarystanyja scenahrafija i kaściumy minułaha — opiera budzie stavicca pavodle eskizaŭ Jaŭhiena Čamadurava.

Paralelna z «Aidaj», premjera jakoj płanujecca ŭ kancy maja, idzie padrychtoŭka opiery «Sievilski cyrulnik». Stavić abodva śpiektakli buduć hałoŭny režysior teatra Michaił Pandžavidze i hałoŭny mastak Alaksandr Kaściučenka. Dyryžor-pastanoŭščyk opiery «Aida» — Viačasłaŭ Volič. Stać dyryžoram-pastanoŭščykam «Sievilskaha cyrulnika» teatr zaprasiŭ maładoha italjanskaha dyryžora Džanłuku Marčyjana, jaki, pavodle čutak, moža ŭznačalić teatr «Ła Skała». Čakajecca, što premjera «Sievilskaha cyrulnika» adbudziecca ŭ vieraśni — joju teatr adkryje novy siezon.

Letam pačniecca praca nad baletnymi pastanoŭkami «Šachierazada» i «Tamar». Kiravać pastanoŭkaj budzie Andrys Lijepa. Premjera hetych adnaaktovych baletaŭ płanujecca ŭ listapadzie.

Ryłatka nahadaŭ, što teatr opiery i baleta zaćvierdziŭ svaje fiestyvali — Niaśvižski i Kaladny. Pa tradycyi Niaśvižski fiestyval projdzie ŭ kancy červienia. Teatr pakaža śpiektakl «Dzikaje palavańnie karala Stacha», premjeru baleta «Trystan i Izolda», balet «Pachita», a taksama vialiki hała-kancert. Na fiestyvali ŭ Niaśvižy ŭpieršyniu projdzie kancert charavoj muzyki ŭ kaściole Božaha Cieła.

Na Kaladnym fiestyvali ŭ śniežni śpiavać u śpiektaklach «Aida», «Śniahurka», «Sievilski cyrulnik» zaprošany viadomyja opiernyja śpievaki, u tym liku z teatra «Ła Skała». Iduć pieramovy z kijeŭskim i pražskim opiernymi teatrami pra ich udzieł u fiestyvali ź viadomymi pastanoŭkami. U płanach teatra zaćvierdzić i baletny fiestyval, paviedamiŭ Ryłatka.

Клас
0
Панылы сорам
0
Ха-ха
0
Ого
0
Сумна
0
Абуральна
0

Chočaš padzialicca važnaj infarmacyjaj ananimna i kanfidencyjna?