Staŭka refinansavańnia ŭ Biełarusi 16 sakavika pavyšanaja na paŭtara pracentnaha punkta, z 10,5% da 12%. Takoje rašeńnie pryniata Nacyjanalnym bankam «u metach adekvatnaha reahavańnia na pavyšeńnie ŭzroŭniu inflacyi, što nazirałasia ŭ pačatku hoda».

Jak adznačajecca ŭ paviedamleńni ŭpraŭleńnia infarmacyi Nacbanka, indeks spažyvieckich cen u lutym 2011 hoda skłaŭ 102,7%. Heta hałoŭnym čynam źviazana z rostam taryfaŭ na žyllova-kamunalnyja pasłuhi z pryčyny pavieličeńnia cany kupli pryrodnaha hazu, jaki impartujecca z Rasijskaj Fiederacyi, i ŭździejańniem pavieličeńnia suśvietnych cen na enierhanośbity i pradukty charčavańnia.

«Pavyšeńnie staŭki refinansavańnia na 1,5 pracentnaha punkta źviazana ź nieabchodnaściu biezumoŭnaha vykanańnia klučavoha pryncypu pracentnaj palityki Nacyjanalnaha banka — padtrymańnie stavak hrašovaha rynku na stanoŭčym uzroŭni ŭ realnym vyražeńni dla nadziejnaj abarony rublovych układaŭ nasielnictva ŭ bankach ad inflacyi», — adznačaje Nacbank.

«Na fonie niaŭchilnaha vykanańnia paramietraŭ kursavoj palityki, praduhledžanych asnoŭnymi kirunkami hrašova-kredytnaj palityki Biełarusi na 2011 hod, takaja miera pryviadzie da dalejšaha ŭzmacnieńnia pryvabnaści rublovych źbieražeńniaŭ u paraŭnańni z układami ŭ zamiežnaj valucie», — havorycca ŭ pres-relizie.

Staŭka refinansavańnia ź`iaŭlajecca instrumientam hrašova-kredytnaha rehulavańnia, pry dapamozie jakoha Nacyjanalny bank uździejničaje na staŭki mižbankaŭskaha rynku, a taksama staŭki pa depazitach jurydyčnych i fizičnych asob i kredytach, jakija dajuć im kredytnyja arhanizacyi.

U adpaviednaści z asnoŭnymi kirunkami hrašova-kredytnaj palityki na 2011 hod, praduhledžana źnižeńnie staŭki refinansavańnia da kanca hoda da 8–10% hadavych.

15 vieraśnia 2010 hoda staŭka refinansavańnia ŭ Biełarusi była ŭstanoŭlena na ŭzroŭni 10,5%. Z pačatku 2010 hoda hety pakazčyk źnižaŭsia šeść razoŭ (u lutym, krasaviku, mai, lipieni, žniŭni, vieraśni).

19 lutaha vice-prem`ier Siarhiej Rumas, vystupajučy ŭ parłamiencie, zajaviŭ, što va ŭradzie nie vyklučajuć mahčymaści pavieličeńnia sioleta staŭki refinansavańnia. Nahadaŭšy, što ŭ 2015 hodzie stavicca zadača źnizić staŭku refinansavańnia da 6–8%, jon adznačyŭ: «Ale tut situacyja budzie poŭnaściu zaležać ad situacyi ŭ ekanomicy. Mahčyma, sioleta z ulikam inflacyi staŭku refinansavańnia pryjdziecca pavialičyć».

Pavodle słoŭ Rumasa, jon prychilnik «taho, što lhotnyja pracentnyja staŭki pa kredytach raspuskajuć i ni da čaho dobraha nie pryvodziać». U pryvatnaści Rumasu viadomyja vypadki, kali rynačny kredyt vykarystoŭvaŭsia najlepšym čynam. «Ale jość dziaržpradpryjemstvy, jakija biaruć ilhotnyja kredyty, asvojvajuć ich, a pabudavanuju vytvorčaść nielha efiektyŭna vykarystoŭvać», — dadaŭ vice-prem`ier. Urad, padkreśliŭ jon, «budzie abmiažoŭvać biaspłatnuju razdaču hrošaj».

Клас
0
Панылы сорам
0
Ха-ха
0
Ого
0
Сумна
0
Абуральна
0

Chočaš padzialicca važnaj infarmacyjaj ananimna i kanfidencyjna?