Košty padniali jak aficyjnyja dylery, tak i handlary na druhasnym rynku.

Pryčyna — navina pra rost myta na ŭviezienyja aŭtamabili, jaki čakajecca ŭ lipieni. Aproč taho, źjaviłasia infarmacyja, što abmiažujuć impart aŭtaŭ. Heta praduhledžvaje sumiesnaja pastanova Savietu Ministraŭ i Nacyjanalnaha banku «Ab raźlikach u imparcie niekatorych tavaraŭ» ad 25 lutaha 2011 h.

Jak paviedamili ŭ pres-centry Saŭmina, u śpis tavaraŭ, dla jakich uvodziać istotnyja abmiežavańni ŭ apłacie zamiežnaju valutaju, trapili i aŭtamabili. «Abmiežavańni pieravažna zakranuć kamiercyjnyja aŭtamabili, pryznačanyja dla pieravozu hruzaŭ abo pasažyraŭ. Tak zvanyja „busy“, dzie jość ad dziesiaci miescaŭ. Abmiežavańni nieabchodnyja, kab stabilizavać płaciežny bałans krainy», — adznačyli ŭ razmovie supracoŭniki pres-centru.

Ekśpierty ž prahnazujuć rezkaje skaračeńnie impartu lehkavych aŭtaŭ i, jak vynik, deficyt prapanovy i rost cenaŭ.

«Za apošni tydzień aŭtamabili daraželi trojčy. Najbolš heta zakranuła tak zvanyja biudžetnyja i siamiejnyja aŭty — miniveny dziesiacihadovaj daŭnaści vypusku. Adnak i novyja aŭtamabili padaraželi. Padobnuju situacyju my nazirali letaś, kali čutki pra myta ŭžo raspaŭsiudžvalisia. Sioleta pra pavyšeńnie zajavili kankretna. Tamu chutčej za ŭsio, myta ŭsio ž padymuć. Ludzi heta razumiejuć, praz heta idzie i masavy zakup patrymanych aŭtaŭ u Polščy i Litvie, a taksama padvyšeńnie koštaŭ», — adznačyŭ aŭtaahladalnik Valer Hłuchoŭski.

Adnak aŭtaamatary jašče spadziajucca, što pastanovu pra abmiežavańnie impartu admieniać abo prybiaruć ź jaje punkt pra aŭtamabili. Kali ž hetaha nie adbudziecca, zapas kamiercyjnych aŭtaŭ pry zvykłym popycie moža zadavolić patreby rynku tolki da siaredziny krasavika.

Клас
0
Панылы сорам
0
Ха-ха
0
Ого
0
Сумна
0
Абуральна
0

Chočaš padzialicca važnaj infarmacyjaj ananimna i kanfidencyjna?