«Ja ŭžo treciaha advakata źmianiła, ale i da jaho niama davieru. Jany kali tolki čujuć ab našaj spravie, adrazu źmianiajucca ŭ tvary. Ich možna zrazumieć — na advakataŭ idzie vialiki cisk», — kaža maci Mai Abromčyk.

21-hadovaj studentcy histfaka BDU Mai 19 śniežnia złamali nahu. Jana kaža — hetak bili jaje śpiecnazaŭcy. Paśla hetaha jašče try hadziny vazili pa načnym Minsku ŭ aŭtazaku, admaŭlajučy ŭ prośbie pra daktaroŭ. Chutkuju dapamohu vyklikali tolki ŭ turmie na Akreścina.

 Maja ŭ špitali praź niekalki dzion paśla zdareńnia.

Maja ŭ špitali praź niekalki dzion paśla zdareńnia.

Mahčyma, hety fakt tak i zastaŭsia b nieviadomym, jak mnohija inšyja fakty z Płoščy, kab nie siabry dziaŭčyny. Jany źviazalisia z žurnalistami i historyja studentki ablacieła ŭvieś śviet. Maja stała simvałam.

Naha hoicca, choć Maja dahetul nie moža pieramiaščacca biez mylicaŭ. Dziaŭčynie pryjšłosia pieravieścisia na zavočnaje adździaleńnie fakulteta. A voś kryminalnuju spravu pa fakcie źbićcia tak i nie raspačali.

«Skarha ŭ prakuraturu Maskoŭskaha rajona Minska była padadzienaja jašče 21 śniežnia. Adtul jaje pieranakiravali ŭ milicyju i dałučyli da spravy ab masavych biesparadkach. Paśla jana viarnułasia ŭ prakuraturu», — raskazvaje sama Maja Abromčyk.

U pryncypie, dla adkryćcia spravy dastatkova było b dakumientalna paćvierdžanaha dyjahnazu, jaki Mai zrabili ŭ pieršyja ž dni paśla atrymańnia traŭmy.

Darečy, znajści vinavatych u źbićci było b niaciažka. Maju Abromčyk zatrymali nie na samoj płoščy Niezaležnaści, a bližej da SIZA na vulicy Vaładarskaha. Źbivali razam ź jaje blizkim siabram, Andrejem Zadziarkoŭskim. Mienavita za jaho zastupiłasia Maja, paśla čaho atrymała sieryju ŭdaraŭ. Paśla ich jana ŭžo nie zmahła samastojna stajać. Sa słovaŭ Andreja i Mai, źbivali ich dva śpiecnazaŭcy. Jany ž advodzili Andreja ŭ aŭtazak, a jon nios Maju na rukach. Ź izalatara dziaŭčyna trapiła ŭ balnicu. A voś jaje siabru Andreju pryjšłosia pasiadzieć na sutkach, i pratakoł na jaho byŭ składzieny.

U im i znajšlisia proźviščy dvuch słužačych 8-ha ŭzvoda PMSN HUUS Minharvykankama I.V.Mazajły i A.M.Jakaŭleva. Hetyja ludzi ŭ aficyjnym pratakole zatrymańnia paznačyli, što viečaram 19 śniežnia ŭ rajonie płoščy Niezaležnaści zatrymali Andreja Zadziarkoŭskaha.

Viadoma, možna skazać, što Jakaŭleŭ i Mazajła prosta raśpisalisia ŭ padrychtavanych błankach. Pavodle infarmacyi pravaabarončaha Centra pravavoj transfarmacyi, Jakaŭleŭ viečaram 19 śniežnia raśpisaŭsia ŭ zatrymańni 16 čałaviek, a Mazajła — 12. Tym nie mienš, śledstva mahło b pasprabavać vyśvietlić, ci datyčnyja zhadanyja śpiecnazaŭcy da žorstkaha źbićcia dziaŭčyny.

Adnak Mai admovili navat u tym, kab jaje siabar Andrej byŭ śviedkam na pracesie. «Prakuror kaža, što pavodle pratakołaŭ zatrymańnia nas zaviali ŭ aŭtazaki ŭ 22.30. I ja nie mahu paklikać Andreja śviedkam, bo śćviardžaju, što mianie źbivali i zatrymlivali kala 12-j nočy», — śćviardžaje Maja.

Čas 22.30 fihuruje i ŭ takich «palityčnych» spravach. Mienavita taki čas paznačany ŭ jakaści momantu zatrymańnia hramadzian Rasii A.Breusa i I.Haponava. Cikava, što śviedkam na ich pracesie vystupaje toj samy A.Jakaŭleŭ, proźvišča jakoha paznačana ŭ pratakole zatrymańnia siabra Abromčyk. Padčas razhladu spravy rasijan u sudzie ich advakaty pastavili čas zatrymańnia pad sumnieŭ. Na videa, što demanstravałasia padčas pracesu, vyrazna paznačana, što A.Breus znachodziŭsia na Płoščy i paśla 22.30.

Ciapier siamja Mai Abromčyk čakaje 19 sakavika. Da hetaha dnia prakuratura pavinna vyznačycca z adkryćciom kryminalnaj spravy pa fakcie žorstkaha źbićcia dziaŭčyny. U vypadku admovy Maja budzie mieć jašče miesiac na abskardžvańnie. Dziaŭčyna spadziajecca, što srodki, sabranyja ludźmi dla apłaty advakataŭ, nie prapaduć.

Клас
0
Панылы сорам
0
Ха-ха
0
Ого
0
Сумна
0
Абуральна
0

Chočaš padzialicca važnaj infarmacyjaj ananimna i kanfidencyjna?