Adkazam na hrubyja dziejańni i palityku Łukašenki musiać stacca žorstkija supolnyja sankcyi ZŠA i Eŭraźviazu.
Pra heta šaściora amerykanskich senataraŭ pišuć u liście viarchoŭnaj pradstaŭnicy ŭ zamiežnych spravach i palitycy biaśpieki Eŭraźviazu Ketryn Eštan.

«19 studzienia 2011 h.

Baranesie Ketryn Eštan

Viarchoŭnaj pradstaŭnicy ŭ zamiežnych spravach i palitycy biaśpieki

Pavažanaja spadarynia Eštan,

My pišam Vam, kab vykazać naša pierakanańnie ŭ važnaści mocnaha, pryncypovaha, supolnaha adkazu z boku Eŭrapiejskaha Źviazu i Złučanych Štataŭ na represii ŭ Biełarusi. My byli hłyboka ŭściešanyja supolnaj zajavaj, jakuju Vy i dziaržaŭny sakratar Hiłary Klintan pryniali ŭ minułym miesiacy, dzie byli asudžanyja žorstkija dziejańni biełaruskich uładaŭ paśla prezydenckich vybaraŭ 19 śniežnia, i supolnaj zajavaj, pryniataj Vami raniej u hetym miesiacy ŭ adkaz na zakryćcio misii ABSE ŭ Miensku. My dumajem, što takaja ščylnaja transatlantyčnaja kaardynacyja maje nadzvyčajnuju važnaść. U maksymalna mahčymaj stupieni Złučanyja Štaty i Eŭrapiejski Źviaz musiać havaryć adzinym hołasam z uładaj i narodam Biełarusi.

Z hetaj samaj pryčyny my taksama miarkujem, što za mocnymi vykazvańniami, užytymi Złučanymi Štatami i Eŭraźviazam na praciahu apošnich tydniaŭ, musiać być užytyja hetkija ž mocnyja transatlantyčnyja dziejańni,
jakija buduć mieć vielmi realnyja i značnyja nastupstvy dla prezydenta Łukašenki i inšych biełaruskich uradoŭcaŭ, jakija niasuć adkaznaść za parušeńni pravoŭ čałavieka, vidavočnyja falšavańni padčas śniežańskich vybaraŭ i zatrymańnie apazycyjnych kandydataŭ u prezydenty i partyjnych lideraŭ. U pryvatnaści hetyja dziejańni musiać ułučać u siabie ŭzmacnieńnie sankcyjaŭ u dačynieńni da režymu i ŭzmacnieńnie padtrymki biełaruskamu narodu.

Jak Vy viedajecie, u kastryčniku 2008 hodu Eŭrapiejski Źviaz prypyniŭ dziejańnie niekatorych sankcyjaŭ u dačynieńni da vysokich biełaruskich uradoŭcaŭ u spadziavańni raźvivać lepšyja stasunki ź Mienskam i zaachvočvać pašyreńnie demakratyčnych svabodaŭ u Biełarusi. Uličvajučy aburalnyja pavodziny režymu Łukašenki na praciahu apošnich tydniaŭ, my spadziajemsia, što Eŭrapiejski Źviaz nieadkładna adnović adrasnyja sankcyi ŭ dačynieńni da kiraŭnictva Biełarusi, ułučna z zamarožvańniem rachunkaŭ i vizavymi zabaronami, a taksama da členaŭ siemjaŭ kiraŭnikoŭ režymu ŭ tych vypadkach, kali na heta buduć abhruntavanyja pryčyny.

Razam z tym my ličym važnym užyć i dadatkovyja zachady.

U pryvatnaści, my zaklikajem Eŭrapiejski Źviaz padtrymać Złučanyja Štaty i zabaranić dačynieńni z kantralavanym dziaržavaj kancernam „Biełnaftachim“, krajnie važnym dla finansavaha dabrabytu režymu prezydenta Łukašenki.
Z uvahi na toje, što Eŭrapiejski Źviaz ujaŭlaje saboj hałoŭny rynak pradukcyi „Biełnaftachimu“, supolnyja sankcyi ZŠA i Eŭraźviazu stalisia b mocnym papiaredžańniem prezydentu Łukašenku, što transatlantyčnaja supolnaść bolš nie źbirajecca ciarpieć jaho hrubyja dziejańni i palityku.

U dadatak da ŭzmacnieńnia sankcyjaŭ, Złučanyja Štaty i Eŭraźviaz taksama pavinny prykłaści supolnyja namahańni, kab damahčysia nieadkładnaha vyzvaleńnia ŭsich apazycyjnych kandydataŭ u prezydenty i partyjnych lideraŭ, a taksama vykazać adnaznačnuju salidarnaść z šmatlikimi inšymi advažnymi biełarusami, jakija čakajuć ad transatlantyčnaha śvietu siły i padtrymki. My byli hłyboka ŭściešanyja dziejańniami polskich uładaŭ u hetym sensie i spadziajemsia, što rešta transatlantyčnaj supolnaści pojdzie za prykładam Varšavy. U pryvatnaści my ličym, što Eŭraźviazu i Złučanym Štatam varta adnavić i pavialičyć materyjalnuju i techničnuju padtrymku palityčnaj i hramadzianskaj supolnaści i pravaabarončym arhanizacyjam Biełarusi. Jak Vy viedajecie, hetkaja padtrymka lažała ŭ asnovie palityki ZŠA i Eŭraźviazu až da letašnich sprobaŭ uciahnuć režym Łukašenki ŭ dyjaloh. Biełaruski narod musić viedać, što Eŭrapiejski Źviaz i Złučanyja Štaty stajać popleč na jahonym baku ŭ zmahańni za svabodu, i što my hatovyja akazać jamu zaŭvažnuju i adčuvalnuju padtrymku, kab dapamahčy jamu pieramahčy ŭ hetym zmahańni.

Dziakujem za Vašuju ŭvahu da hetaj nieadkładnaj spravy.

Džozef Liberman, senatar

Džon MakKejn, senatar

Džan Šahin, senatar

Ryčard Łuhar, senatar

Ryčard Derbin, senatar

Rober Kejsi-małodšy, senatar

Kopii: Ježy Buzeku, staršyni Eŭrapiejskaha Parlamentu i ministram zamiežnych spravaŭ krainaŭ Eŭraźviazu»

Клас
0
Панылы сорам
0
Ха-ха
0
Ого
0
Сумна
0
Абуральна
0

Chočaš padzialicca važnaj infarmacyjaj ananimna i kanfidencyjna?