Mikałaj Bambiza — usio ž adstaŭka 18

Hienieralny dyrektar Nacyjanalnaha parka «Biełaviežskaja pušča» Mikałaj Bambiza adpraŭleny ŭ adstaŭku. Infarmacyja pra heta źjaviłasia na sajcie «Našaj Nivy» jašče ŭ paniadziełak, ale dva dni nie mieła aficyjnaha paćvierdžańnia. Tym nie mienš učora Bambiza raźvitaŭsia z kalektyvam i pakinuŭ pasadu.

Pavodle infarmacyi «Turizm i otdych», novaje miesca pracy Bambizy źviazana z «Biełahraprambankam». Vykonvajučym abaviazki dyrektara pryznačany namieśnik pa ideałohii Alaksandr Zocikavič Šarynda.

Mikałaj Bambiza

Karjerny ŭźlot čynoŭnika pačaŭsia ŭ 1989 hodzie, kali 35-hadovy Bambiza byŭ abrany dyrektaram Prypiackaha dziaržaŭnaha łandšaftna-hidrałahičnaha zapaviednika. Kiraŭnik zapomniŭsia tym, što aktyŭna raźvivaŭ palaŭničy turyzm i łabiravaŭ adstreł žyviołaŭ u zapaviedniku. Nieŭzabavie miaściny zabrała pad svaju apieku Kiraŭnictva spravami prezidenta, a ŭ kastryčniku 1996 hoda zapaviednik byŭ rearhanizavany ŭ nacyjanalny park. Jašče praz hod na miažy parka było pabudavana drevapierapracoŭčaje pradpryjemstva.

U 2000 hodzie Bambiza vyrašyŭ iści ŭ deputaty i niečakana… pravaliŭsia na vybarach.

U jakaści «kampiensacyi» ŭ 2001 hodzie Łukašenka pryznačyŭ jaho dyrektaram Biełaviežskaj puščy. Pry im byŭ dazvoleny adstreł zubroŭ u zapaviedniku i stała aktyŭna vyrubacca pušča.

Pra samadurstva Bambizy chodziać lehiendy. Voś jakoje ŭražańnie skłałasia ŭ adnaho z rasijskich padarožnikaŭ paśla razmoŭ ź miascovymi žycharami:

«Naprykład, Mikałaj Bambiza vydaŭ pastanovu, pavodle jakoj miascovyja žychary nie mohuć bieź jaho piersanalnaha dazvołu pradać svajo pryvatnaje žyllo. Pachody za hrybami i jahadami taksama stroha rehłamientavanyja: Bambiza padzialiŭ les na kvadraty i zamacavaŭ ich za nasielenymi punktami. Heta značyć dzie tabie pradpisana, tam i źbiraj darunki pryrody, a stupić naleva-naprava — navat nie dumaj!

Raspaviadali i pra toje, jak Bambiza stavicca da svajho proźvišča.

Kali ŭ jakoj-niebudź zajavie miascovaha žychara pišuć: „Ad voś takoha i voś takoha dyrektaru NP BP Bambizie“ [Bambiza, pa-biełarusku, — łajankavaje słova na vysokaha, vialikaha čałavieka, užyvajecca ŭ niehatyŭnym sensie»], jon prosta rvie dakumient, nie čytajučy dalej — maŭlaŭ, skłaniać majo proźvišča nielha»

.

Kłan Bambizaŭ adzin z samych mocnych «siamiejnych padradaŭ» u biełaruskaj uładzie. Rodny brat, Ściapan Bambiza, dyrektar Prypiackaha Nacyjanalnaha parka. Jašče vyšej pajšoŭ stryječny brat. Ivan Bambiza byŭ prezidentam «Biełnaftachima» (1997–2004) i vice-premjeram (2004–2010)

Vital Nieścieraŭ

Chočaš padzialicca važnaj infarmacyjaj ananimna i kanfidencyjna? Pišycie redaktaru «Našaj Nivy» ŭ TH