Vyzvaleńnie palityčnych źniavolenych i źniaćcie ź ich abvinavačańniaŭ — pieršaradnaje patrabavańnie Jeŭrasajuza, zajaviŭ upaŭnavažany ŭrada Hiermanii pa pravach čałavieka Markus Loninh 15 studzienia na pres-kanfierencyi ŭ Minsku.
«Heta nie niejkija ŭmovy, pry vykanańni jakich režym atrymaŭ by jakuju-niebudź vyhadu. Heta čystyja patrabavańni. Bo nie moža być u centry Jeŭropy krainy, u jakoj ludzi nie majuć prava vykazvać svaju dumku», — skazaŭ Loninh. Pavodle jaho słoŭ, Jeŭropa zaniepakojena tym, što zatrymanyja nie majuć dostupu da advakataŭ, a taksama nieviadomy stan ich zdaroŭja.

Jak paviedamiŭ Loninh, Hiermanija vystupaje nie tolki za viartańnie raniejšych sankcyj u dačynieńni da biełaruskich čynoŭnikaŭ, ale i za pašyreńnie koła asobaŭ, jakim budzie zabaronieny ŭjezd u Jeŭropu z pryčyny ich dačynieńnia da represij.

U toj ža čas, padkreśliŭ pradstaŭnik urada Hiermanii, Jeŭrasajuz budzie pracavać nad tym, kab biełaruskija hramadzianie nie nieśli strat ad dziejańniaŭ uład. U pryvatnaści, rastłumačyŭ jon, havorka idzie ab mahčymym spraščeńni pracedury vydačy viz biełarusam i pradastaŭleńni adličanym za ŭdzieł u demanstracyi z VNU studentam mahčymaści pradoŭžyć vučobu ŭ Jeŭropie.

Markus Loninh padčas svajho vizitu ŭ Minsk 14–15 studzienia sustreŭsia z pradstaŭnikami MZS, hramadzianskaj supolnaści i siemjami zatrymanych apazicyjanieraŭ.

«Ja atrymaŭ ujaŭleńnie ab tym, što adbyvajecca ŭ Biełarusi. Toje, što pačuŭ, pierasiahaje maje samyja strašnyja ŭjaŭleńni. Usio heta nahadvaje samyja zmročnyja savieckija časy, kali ŭryvalisia pa načach, zabirali ludziej prama z paścieli, a svajaki potym nie mahli vyśvietlić, što adbyvajecca ź ich blizkimi», — skazaŭ upaŭnavažany pa pravach čałavieka ŭrada FRH. Jak ličyć Loninh, nieabchodnaść uviadzieńnia sankcyj adpała b u tym vypadku, kali b byli vyzvaleny ŭsie zatrymanyja i paŭtorna praviedzieny novyja, sumlennyja i adkrytyja, vybary.

Клас
Панылы сорам
Ха-ха
Ого
Сумна
Абуральна

Chočaš padzialicca važnaj infarmacyjaj ananimna i kanfidencyjna?